ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ໃນຕອນເຊົ້າຂອງວັນທີ 3 ສິງຫາ 2021 ຢູ່ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີກອງປະຊຸມສຳມະນາຍົກສູງຄຸນນະພາບດ້ານເນື້ອໃນໃຫ້ແກ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ (ສພຊ) ຊຸດທີ IX ໂດຍການເປັນປະທານກ່າວເປີດກອງປະຊຸມຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ເຂົ້າຮ່ວມມີຮອງປະທານສະພາແຫ່ງຊາດ, ປະທານ-ຮອງປະທານກຳມາທິການ, ເລຂາທິການສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ (ສສຊ), ເລຂາທິການສະພາປະຊາຊົນແຂວງ ແລະ ພາກສ່ວນກ່ຽວຂ້ອງ.
ໃນກອງປະຊຸມ, ໄດ້ຮັບຟັງການເຜີຍແຜ່ຄຳສັ່ງຂອງກົມການເມືອງສູນກາງພັກ 2 ສະບັບຄື: ຄຳສັ່ງເລກທີ 01/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນຳພາ-ຊີ້ນຳ ຂອງຄະນະພັກແຕ່ລະຂັ້ນ ໃນການຈັດຕັ້ງປະຕິບັດມາດຕະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ຄຳສັ່ງເລກທີ 02/ກມສພ, ລົງວັນທີ 26 ກໍລະກົດ 2021 ວ່າດ້ວຍການເພີ່ມທະວີການນຳພາ-ຊີ້ນຳ ຂອງຄະນະພັກແຕ່ລະຂັ້ນ ຕໍ່ການສະກັດກັ້ນ ແລະ ແກ້ໄຂບັນຫາຢາເສບຕິດ.
ຕາມວາລະກອງປະຊຸມ, ໂດຍການສືບຕໍ່ເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ໄດ້ຮັບຟັງການລາຍງານຂອງລັດຖະບານ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຈາກຕາງໜ້າກະຊວງແຜນການ ແລະ ການລົງທຶນ; ຈາກນັ້ນ, ບັນດາທ່ານ ສສຊ ໄດ້ສຸມໃສ່ປະກອບຄຳຄິດຄຳເຫັນຢ່າງມີຈຸດສຸມ ແລະ ກົງໄປກົງມາ.
ຕອນບ່າຍຂອງວັນດຽວກັນ, ໂດຍການສືບຕໍ່ເປັນປະທານຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ ກອງປະຊຸມໄດ້ຮັບຟັງການລາຍງານຂອງລັດຖະບານກ່ຽວກັບການແກ້ໄຂບັນຫາຢາເສບຕິດ ແລະ ສະເໜີຮ່າງກົດໝາຍວ່າດ້ວຍຢາເສບຕິດ ຈາກຕາງໜ້າກະຊວງປ້ອງກັນຄວາມສະຫງົບ; ຈາກນັ້ນ, ບັນດາທ່ານ ສສຊ ໄດ້ປະກອບຄຳຄິດຄຳເຫັນຕໍ່ບົດລາຍງານ ແລະ ຮ່າງກົດໝາຍດັ່ງກ່າວ.
ກອງປະຊຸມຈະໄດ້ດຳເນີນໄປຈົນຮອດວັນທີ 4 ສິງຫາ 2021 ຈຶ່ງຈະສຳເລັດ.

ແຫຼ່ງຂ່າວທີ່ມາ: ສະພາແຫ່ງຊາດ