ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 11 ກຸມພາ 2021 ທີ່ຫ້ອງໂຖງໃຫຍ່ຂອງຕຶກອາຄານສະພາແຫ່ງຊາດລາວ (ຫລັງໃໝ່) ໄດ້ມີພິທີສະເຫລີມສະຫລອງວັນບຸນປີໃໝ່ ປະຈຳຊາດຫວຽດນາມ ດ້ວຍການວີດີໂອທາງໄກ ເພື່ອອວຍພອນປີໃໝ່ຫວຽດນາມ ປີ 2021 ແກ່ຄະນະນຳກະຊວງກໍ່ສ້າງຫວຽດນາມ, ຄະນະຄຸ້ມຄອງໂຄງການປຸກສ້າງຫໍສະພາແຫ່ງຊາດຫລັງໃໝ່ ຝ່າຍຫວຽດນາມ ແລະ ແມ່ທັບນ້ອຍ 11, ຜູ້ຮັບເໝົາກໍ່ສ້າງ ພ້ອມດ້ວຍພະນັກງານ ແລະ ກຳມະກອນທີ່ປະຈຳຢູ່ໂຄງການໃນໄລຍະປີໃໝ່  ທັງເພື່ອເປັນການເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ແລະ ຫວຽດນາມ-ລາວ ໃຫ້ນັບມື້ນັບແຕກດອກອອກຜົນ ແລະ ມີປະສິດທິຜົນຍິ່ງໆຂຶ້ນ; ເຂົ້າຮ່ວມພິທີໃນຄັ້ງນີ້ ຝ່າຍລາວມີສະຫາຍ ປານີ ຢາທໍ່ຕູ້ ປະທານສະພາແຫ່ງຊາດລາວ, ສະຫາຍ ສົມພັນ ແພງຄຳມີ ຮອງປະທານສະພາແຫ່ງຊາດລາວ ທັງເປັນຄະນະກຳມະການຊີ້ນຳໂຄງການປຸກສ້າງຫໍສະພາແຫ່ງຊາດຫລັງໃໝ່, ສະຫາຍ ນາງ ສວນສະຫວັນ ວິຍະເກດ  ເລຂາທິການສະພາແຫ່ງຊາດ ທັງເປັນຫົວໜ້າຄະນະຄຸ້ມຄອງໂຄງການປຸກສ້າງຫໍສະພາແຫ່ງຊາດລາວຫລັງໃໝ່ ພ້ອມດ້ວຍຄະນະ ສ່ວນຝ່າຍຫວຽດນາມມີສະຫາຍ ເລ ກວາງ ຮຸ່ງ ຮອງລັດຖະມົນຕີກະຊວງກໍ່ສ້າງ ແຫ່ງ ສສ.ຫວຽດນາມ, ສະຫາຍ ຫງວຽນ ກວັກ ຢຸງ ຜູ້ບັນຊາການແມ່ທັບນ້ອຍ 11, ສະຫາຍ ພັອ.        ຫງວຽນ ຈ້ຽນ ຮອງຜູ້ບັນຊາການແມ່ທັບນ້ອຍ 11, ສະຫາຍ ພັອ. ຫວໍ ວັນ ຖົ້ງ ທີ່ປຶກສາປ້ອງກັນຊາດ ສສ.ຫຽດນາມ ປະຈຳ ສປປລາວ ພ້ອມດ້ວຍແຂກຖືກເຊີນເຂົ້າຮ່ວມ.

ໃນໂອກາດນີ້, ສະຫາຍ ສົມພັນ ແພງຄຳມີ ໄດ້ກ່າວວ່າ: ໂຄງການປຸກສ້າງຫໍສະພາແຫ່ງຊາດຫລັງໃໝ່ ມາຮອດປີນີ້ເປັນປີມ້ວນທ້າຍຂອງໂຄງການ ເຖິງວ່າໜຶ່ງປີກວ່າຜ່ານມາ ສະພາບການພະຍາດໂຄວິດ-19 ໄດ້ສ້າງຜົນກະ ທົບຢ່າງຫລວງຫລາຍຕໍ່ການດຳເນີນການໂຄງການ ແຕ່ທຸກພາກສ່ວນໄດ້ພ້ອມກັນສູ້ຊົນເພື່ອຜ່ານຜ່າທຸກຄວາມຫຍຸ້ງ ຍາກ ເພື່ອເຮັດສຳເລັດໜ້າທີ່ການເມືອງທີ່ພັກ-ລັດ ແລະ ປະຊາຊົນສອງຊາດລາວ-ຫວຽດນາມ ມອບໝາຍໃຫ້ ໂດຍສະ ເພາະຜູ້ປະຕິບັດໂຄງການຕົວຈິງ ກໍຄືແມ່ທັບນ້ອຍ 11, ບັນດາຜູ້ຮັບເໝົາຍ່ອຍຕ່າງໆທີ່ເຮັດໜ້າທີ່ແບບເນື່ອງນິດລຽນ ຕິດ, ບໍ່ມີມື້ພັກຜ່ອນ, ບໍ່ມີບຸນ ຫລື ເທດສະການຕ່າງໆ, ຕ້ອງຫ່າງໄກຄອບຄົວ ພໍ່, ແມ່ ແລະ ລູກເຕົ້າ ເພື່ອມາຮັບໜ້າທີ່ ອັນມີກຽດຢູ່ແຫ່ງນີ້. ພວກຂ້າພະເຈົ້າຕີລາຄາສູງ ເຊິ່ງນີ້ເປັນການເສຍສະຫລະອັນຫຍິ່ງໃຫ່ຍຂອງບັນດາສະຫາຍ ເພື່ອປະ ກອບສ່ວນເສີມຂະຫຍາຍສາຍພົວພັນມິດຕະພາບອັນຫຍິ່ງໃຫ່ຍ, ຄວາມສາມັກຄີພິເສດ ແລະ ການຮ່ວມມືຮອບ ດ້ານລະ ຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ອ້າຍນ້ອງ ທີ່ນັບມື້ນັບແຕກດອກອອກຜົນສືບ ທອດຮອດຮຸ່ນລູກ, ຫລານຂອງພວກເຮົາ. ຕາງໜ້າພັກ, ສະພາແຫ່ງຊາດ, ລັດຖະບານ ຂໍສະແດງຄວາມຍ້ອງຍໍຊົມບັນດາ ສະຫາຍຕໍ່ຜົນງານທີ່ຜ່ານມາ ແລະ ເຊື່ອໝັ້ນວ່າໂຄງການຫໍສະພາແຫ່ງຊາດ ຂອງພວກເຮົາຈະສາມາດສຳເລັດ ແລະ ເລີ່ມ ນຳໃຊ້ໄດ້ດີທີ່ສຸດ ໃນການຮັບໃຊ້ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX ທີ່ຈະມາເຖິງນີ້; ພ້ອມນີ້, ກໍຈະເປັນໂຄງການສັນຍາລັກ ແຫ່ງສາຍພົວພັນມິດຕະພາບ ລະຫວ່າງສອງຊາດລາວ ແລະ ຫວຽດນາມອ້າຍນ້ອງ ພວກເຮົາ.

ພ້ອມດຽວກັນນັ້ນ, ທັງສອງຝ່າຍໄດ້ອວຍພອນໄຊອັນປະເສີດໄປເຖິງບັນດາສະຫາຍການນຳພັກ-ລັດ ແລະ ປະຊາຊົນຫວຽດນາມອ້າຍນ້ອງ ໂດຍສະເພາະກໍແມ່ນສະຫາຍໃນຄະນະຄຸ້ມຄອງໂຄງການກໍ່ສ້າງຫໍສະພາແຫ່ງຊາດລາວ ຫລັງໃໝ່ ຕະຫລອດເຖິງກຳມະກອນທີ່ພວມປະຕິບັດໜ້າທີ່ ຈົ່ງມີສຸຂະພາບທີ່ເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດທຸກປະການ ຂໍອວຍພອນໃຫ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມ ມືຮອບດ້ານ ລະຫວ່າງສອງ​ພັກ, ສອງ​ລັດ ​ແລະ ປະຊາຊົນ​ສອງ​ຊາດ ລາວ-ຫວຽດນາມ ຈົ່ງໝັ້ນ​ຄົງ​ຄະ​ນົງ​ແກ່ນ ​ແລະ ສວຍສົດງົດງາມຕະຫລອດໄປ.

ແຫຼ່ງຂ່າວທີ່ມາ: ສະພາແຫ່ງຊາດ