ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ກອງປະຊຸມສົນທະນາປຶກສາຫາລືທາງໄກ (Video Conference) ກ່ຽວກັບຄຳສັ່ງຂອງນາຍົກລັດ ຖະມົນຕີ ວ່າດ້ວຍມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19 ສະບັບເລກທີ 15/ນຍ, ລົງວັນທີ 21/04/2021 ໄດ້ຈັດຂຶ້ນວັນທີ 9 ມິຖຸນາ 2021 ທີ່ຫ້ອງປະຊຸມຄະນະປະຈຳ ສະພາແຫ່ງຊາດ (ສພຊ) ໂດຍການເປັນປະທານຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ເຂົ້າຮ່ວມມີທ່ານ ລິນຄຳ ດວງສະຫວັນ ປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ທ່ານ ລີເບີ ລີບົວປາວ ປະທານກຳມາທິການແຜນການ ການເງິນ ແລະ ການກວດສອບ, ທ່ານ ນາງ ທຸມມາລີ ວົງພະຈັນ ປະທານກຳມາທິການວັດທະນະທຳ-ສັງຄົມ, ມີບັນດາທ່ານຮອງປະທານກຳມາທິການ, ບັນດາປະທານສະພາປະຊາຊົນຂັ້ນແຂວງ (ສພຂ) ທົ່ວປະເທດ, ຫົວໜ້າ-ຮອງຫົວໜ້າກົມ, ບັນດາກຳມະການຂອງກຳມາທິການປະຈຳ ສພຂ, ບັນດາເລຂາທິການ ສພຂ ແລະ ພະນັກງານວິຊາການຈຳນວນໜຶ່ງ.

ຈຸດປະສົງກໍເພື່ອສົນທະນາປຶກສາຫາລືກ່ຽວກັບຄຳສັ່ງຂອງນາຍົກລັດຖະມົນຕີ ວ່າດ້ວຍມາດຕະການສະກັດກັ້ນ,ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19; ເປີດກວ້າງການປຶກສາຫາລື ເພື່ອຄົ້ນຄວ້າວິທີການຈັດຕັ້ງປະຕິບັດນະໂຍບາຍໃຫ້ໄດ້ຮັບຜົນດີ. ໃນກອງປະຊຸມ ພາຍຫລັງທີ່ປະທານກອງປະຊຸມໄດ້ກ່າວຈຸດປະສົງ ແລະກ່າວເປີດກອງປະຊຸມ ບັນດາຜູ້ເຂົ້າຮ່ວມກໍໄດ້ຜັດປ່ຽນກັນປະກອບຄຳຄິດຄຳເຫັນຢ່າງມີຈຸດສຸມ ແລະ ກົງໄປກົງມາຕໍ່ຄຳສັ່ງເລກທີ 15/ນຍ, ລົງວັນທີ 21/04/2021ວ່າດ້ວຍມາດຕະການສະກັດກັ້ນ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19, ການຈັດຕັ້ງປະຕິບັດນະໂຍບາຍຕ່າງໆຂອງຂະແໜງການກ່ຽວຂ້ອງກຳນົດອອກ ເປັນຕົ້ນຈຸດອ່ອນ ຂໍ້ຄົງຄ້າງທີ່ແຂວງຂອງຕົນຍັງປະສົບຄວາມຫຍຸ້ງຍາກ, ການຈັດຕັ້ງປະຕິບັດມາດຕະການສະກັດກັ້ນ,ຄວບຄຸມ ແລະ ວິທີການຮັບມືຕໍ່ກັບການລະບາດຂອງພະຍາດໂຄວິດ-19 ໃນໄລຍະຜ່ານມາ ທີ່ແຂວງຂອງຕົນສາມາດປະຕິບັດໄດ້.

ແຫຼ່ງຂ່າວທີ່ມາ: ສະພາແຫ່ງຊາດ