ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ໃນຕອນເຊົ້າຂອງວັນສຸກທີ 9 ກໍລະກົດ 2021 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ ໄດ້ມີກອງປະຊຸມປຶກສາຫາລືກ່ຽວກັບການກະກຽມສະເຫລີມສະຫລອງວັນລັດຖະທໍາມະນູນ ແຫ່ງຊາດ ຄົບຮອບ 30 ປີ (15/08/1991-15/08/2021) ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ທັງເປັນຫົວໜ້າຄະນະຮັບຜິດຊອບສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ;  ເຂົ້າຮ່ວມມີທ່ານ ກິແກ້ວ ໄຂຄຳພິທູນ  ຮອງນາ ຍົກລັດຖະມົນຕີ, ທ່ານ ສຈ. ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດ ໝາຍ; ປະທານສານປະຊາຊົນສູງສຸດ, ຫົວໜ້າອົງການໄອຍະການປະຊາຊົນສູງສຸດ, ບັນດາທ່ານລັດຖະມົນຕີກະຊວງທີ່ກ່ຽວຂ້ອງ, ເລຂາທິການສະພາແຫ່ງຊາດ, ອົງການຈັດຕັ້ງມະຫາຊົນ, ເຈົ້າຄອງນະຄອນຫລວງວຽງຈັນ, ຮອງປະທານກຳມາທິການກົດໝາຍ ແລະ ແຂກຖືກເຊີນເຂົ້າຮ່ວມ.

ກອງປະຊຸມຄັ້ງນີ້, ໄດ້ຮັບຟັງການຜ່ານຮ່າງແຜນຄາດຄະເນການແບ່ງຄວາມຮັບຜິດຊອບໃຫ້ ຄະນະຮັບຜິດຊອບສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ, ຜ່ານຮ່າງແຜນການກະກຽມ ແລະ ດໍາເນີນງານສະເຫຼີມສະຫຼອງວັນລັດຖະທໍາມະນູນແຫ່ງຊາດ ຄົບຮອບ 30 ປີ, ຜ່ານຮ່າງຂໍ້ຕົກລົງ ຂອງຄະນະປະຈໍາສະພາແຫ່ງຊາດ ວ່າດ້ວຍການແຕ່ງຕັ້ງອະນຸກໍາມະການ ແລະ ກອງເລຂາ ແລະ ຜ່ານຮ່າງຄໍາແນະນໍາ ວ່າດ້ວຍການສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ.

ທ່ານປະທານສະພາແຫ່ງຊາດ ໄດ້ກ່າວວ່າ: ການປະກາດໃຊ້ລັດຖະທຳມະນູນ ສະບັບທຳອິດ ຂອງລະບອບປະຊາທິປະໄຕປະຊາຊົນ ໃນວັນທີ 15 ສິງຫາ 1991 ແມ່ນເຫດການປະຫວັດສາດທີ່ສຳຄັນຍິ່ງຂອງຊາດເຮົາ ເຊິ່ງເປັນການຢັ້ງຢືນ, ຮັບຮູ້ເຖິງຜົນງານອັນຍິ່ງໃຫຍ່ຂອງປະຊາຊົນລາວບັນດາເຜ່ົາ ໃນພາລະກິດຕໍ່ສູ້ກູ້ຊາດ, ຍືດເຍື້ອຍາວນານ, ດຸເດືອດ, ເອົາເປັນເອົາຕາຍ, ຫຍຸ້ງຍາກສັບສົນ ແລະ ເສຍສະຫລະອັນໃຫຍ່ຫລວງ ຂອງພະນັກງານ, ນັກຮົບປະຕິວັດ ແລະ ປະຊາຊົນລາວບັນດາເຜ່ົາວິລະຊົນ ກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ ຕາມທິດກ້າວຂຶ້ນສູ່ຈຸດໝາຍສັງຄົມນິຍົມ ທີ່ພັກເຮົາໄດ້ກຳນົດໄວ້, ທັງເປັນການຢືນຢັນເຖິງເອກະລາດແຫ່ງຊາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດອັນແສນຮັກຂອງພວກເຮົາຕໍ່ສາກົນ; ສະນັ້ນ, ເພື່ອພ້ອມກັນນຳພາ-ຊີ້ນຳ ການກະກຽມ ແລະ ການຈັດຕັ້ງສະເຫລີມສະຫລອງວັນລັດຖະທຳມະນູນແຫ່ງຊາດ ຄົບຮອບ 30 ປີ ໃນວັນທີ 15 ສິງຫາ 2021 ນີ້ ຢ່າງສົມກຽດສັກສີ ແລະ ບັນລຸຜົນສຳເລັດຕາມຈຸດປະສົງລະດັບຄາດໝາຍ ສະເໜີໃຫ້ບັນດາທ່ານຄົ້ນຄວ້າ, ປະກອບຄຳເຫັນ ເພື່ອຕົກລົງ ໃຫ້ໄດ້ນຳໃຊ້ພາຍຫລັງສຳເລັດກອງປະຊຸມຄັ້ງນີ້ ເພາະວ່າເວລາສະເຫລີມສະຫລອງວັນລັດຖະທໍາມະນູນ ແມ່ນຍັງເຫລືອພຽງແຕ່ເດືອນປາຍເທົ່ານັ້ນ.

ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ກໍໄດ້ປະກອບຄຳຄິດຄຳເຫັນຢ່າງກົງໄປກົງມາ ແລະ ມີຈຸດສຸມ, ສາມາດນໍາໄປປັບປຸງໃສ່ບັນດາເນື້ອໃນຂອງຮ່າງເອກະສານຕ່າງໆ, ເຮັດໃຫ້ກອງປະຊຸມໄດ້ຮັບຜົນສໍາເລັດ ຕາມລະດັບຄາດໝາຍ.

ແຫຼ່ງຂ່າວທີ່ມາ: ສະພາແຫ່ງຊາດ