ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 2 ເມສາ 2021 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີພິທີມອບ-ຮັບໜ້າທີ່ລະຫວ່າງທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ຊຸດທີ VIII  ແລະ ທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ຊຸດທີ IX ໂດຍການເຂົ້າຮ່ວມຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍບັນດາທ່ານຮອງປະທານກຳມາທິການ, ຮອງເລຂາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ພາຍໃນຄະນະເລຂາທິການເຂົ້າຮ່ວມ.

ໃນພິທີ, ທ່ານ ນາງ ສວນສະຫວັນ ວິຍະເກດ ໄດ້ກ່າວມອບໜ້າທີ່ ເຊິ່ງມີເນື້ອໃນບາງຕອນວ່າ: ຄະນະເລຂາທິການ ມີບົດບາດເປັນເສນາທິການໃຫ້ສະພາແຫ່ງຊາດ, ຄະນະປະຈຳສະພາແຫ່ງຊາດ ໃນການຄົ້ນຄວ້າ-ສັງລວມເນື້ອໃນຮອບດ້ານ, ສ້າງສິ່ງອຳນວຍຄວາມສະດວກ, ຄຸ້ມຄອງວຽກງານບຸກຄະລາກອນ, ບໍລິຫານ, ແຜນການ, ການເງິນ ແລະ ອື່ນໆ. ຕະຫລອດໄລຍະ 5 ປີຜ່ານມາ ໂດຍໄດ້ຮັບການຊີ້ນຳ-ນຳພາຈາກຄະນະພັກ, ຄະນະປະຈຳສະພາແຫ່ງຊາດ ແລະ ຄວາມເປັນເອກະພາບສູງພາຍໃນຄະນະ, ການຮ່ວມມືຂອງພະນັກງານ-ລັດຖະກອນ ຂອງຄະນະເລຂາທິການ ກໍຄືພາກສ່ວນຕ່າງໆ ພາຍໃນ ແລະ ພາຍນອກສະພາແຫ່ງຊາດ ເຮັດໃຫ້ການປະຕິບັດໜ້າທີ່ໄດ້ຮັບຜົນສຳເລັດຫລາຍດ້ານ ເປັນຕົ້ນແມ່ນຄົ້ນຄວ້າ, ປັບປຸງ ໂຄງປະກອບກົງຈັກ ແລະ ບຸກຄະລາກອນຂອງຄະນະເລຂາທິການສະພາແຫ່ງຊາດ ປະກອບມີຄະນະນໍາ 3 ທ່ານ ຍິງ 1 ທ່ານ ໃນນີ້, ຮອງເລຂາທິການສະພາແຫ່ງຊາດ 2 ທ່ານ; ດ້ານກົງຈັກມີ 6 ກົມ, ພະນັກງານ-ລັດຖະກອນທັງໝົດ 136 ທ່ານ ຍິງ 58 ທ່ານ. ນອກຈາກນັ້ນ, ຄະນະເລຂາທິການສະພາແຫ່ງຊາດ ຍັງເຮັດໜ້າທີ່ໃນການຄຸ້ມຄອງພະນັກງານ-ລັດຖະກອນ ທີ່ຂຶ້ນກັບບັນດາກໍາມາທິການ, ກົງຈັກທີ່ຄະນະປະຈໍາສະພາແຫ່ງຊາດສ້າງຕັ້ງ ໃນວຽກງານບໍລິຫານ, ການປະຕິບັດນະໂຍບາຍຕ່າງໆ; ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດ ໃຫ້ບັນດາສະມາຊິກພັກ ແລະ ພະນັກງານ-ລັດຖະກອນ ດ້ວຍການຈັດຕັ້ງການເຊື່ອມຊຶມ, ຟັງການເຜີຍແຜ່ເອກະສານສໍາຄັນຂອງພັກ-ລັດ, ການປາຖະກະຖາໃນວັນສຳຄັນຕ່າງໆຂອງຊາດສາກົນ, ການສ້າງພັກປອດໃສ ເຂັ້ມແຂງ ໜັກແໜ້ນ ຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, ຈັດຕັ້ງປະເມີນການປະຕິບັດໜ້າທີ່ຂອງພະນັກງານ-ລັດຖະກອນ ເປັນປົກກະຕິແຕ່ລະປີ. ເຮັດໃຫ້ພະນັກງານລັດຖະກອນ ມີທັດສະນະຫລັກໝັ້ນການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮັບຜິດຊອບຕໍ່ວຽກງານທີ່ໄດ້ຮັບມອບໝາຍ.

ຈາກນັ້ນ, ທ່ານ ນາງ ປິ່ງຄຳ ລາຊະສິມມາ ກໍໄດ້ກ່າວຮັບໜ້າທີ່ ເຊິ່ງທ່ານໄດ້ກ່າວວ່າ: ເພື່ອໃຫ້ສົມກັບຄວາມເຊື່ອໝັ້ນ ແລະ ໄວ້ວາງໃຈຈາກຂັ້ນເທິງ ຂ້າພະເຈົ້າຈະເອົາໃຈໃສ່ສືບຕໍ່ຊີ້ນຳ-ນຳພາວຽກງານທີ່ໄດ້ກຳນົດໄວ້ນັ້ນ ໂດຍສະເພາະແມ່ນວຽກງານຂອງຄະນະເລຂາທິການສະພາແຫ່ງຊາດ ເຊິ່ງເປັນວຽກງານຄົ້ນຄວ້າ-ສັງລວມເນື້ອໃນຮອບດ້ານ, ສ້າງສິ່ງອຳນວຍຄວມສະດວກ, ຄຸ້ມຄອງວຽກງານບຸກຄະລາກອນ, ບໍລິຫານ, ແຜນການ, ການເງິນ ແລະ ວຽກງານອື່ນໆທີ່ປິ່ນອ້ອມ; ມີບົດບາດເປັນເສນາທິການໃຫ້ສະພາແຫ່ງຊາດ, ຄະນະປະຈຳສະພາແຫ່ງຊາດ ເພື່ອອຳນວຍຄວາມສະດວກໃຫ້ແກ່ສະພາແຫ່ງຊາດ ຊຸດທີ IX ຈະເອົາໃຈໃສ່ສຸມທຸກເຫື່ອແຮງ ແລະ ສະຕິປັນຍາ, ບົດຮຽນ, ປະສົບການທີ່ຕົນໄດ້ຮຽນມາ ເພື່ອເຮັດໃຫ້ວຽກງານຂອງຄະນະເລຂາທິການສະພາແຫ່ງຊາດ ກາຍເປັນເສນາທິການໃຫ້ແກ່ສະພາແຫ່ງຊາດ ກໍຄືຄະນະປະຈຳສະພາແຫ່ງຊາດ ໃຫ້ມີຄຸນນະພາບສູງເດັ່ນຂຶ້ນເປັນກ້າວໆ.

ໃນຕອນທ້າຍ, ທ່ານ ນາງ ສູນທອນ ໄຊຍະຈັກ ໄດ້ມີຄຳເຫັນໂອ້ລົມວ່າ: ສະພາແຫ່ງຊາດ ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າ, ເປັນອົງການສູງສຸດແຫ່ງອໍານາດລັດ, ເປັນອົງການນິິຕິບັນຍັດ ປະຕິບັດພາລະບົດບາດຮັບຮອງເອົາລັດຖະທໍາມະນູນ, ກົດໝາຍ; ຕົກລົງບັນຫາສໍາຄັນພື້ນຖານຂອງປະເທດຊາດ ແລະ ຕິດຕາມກວດກາການເຄົາລົບ, ປະຕິບັດ ລັດຖະທໍາມະນູນ ແລະ ກົດໝາຍ ຂອງບັນດາອົງການລັດ. ຈາກທີ່ຕັ້ງ, ພາລະບົດບາດທີ່ສໍາຄັນຂອງສະພາແຫ່ງຊາດ ດັ່ງກ່າວມານັ້ນ, ຄະນະເລຂາທິການສະພາແຫ່ງຊາດ ໃນຖານະທີ່ເປັນກົງຈັກເສນາທິການ ດ້ານການຄົ້ນຄວ້າ-ສັງລວມເນື້ອໃນຮອບດ້ານ, ການຄຸ້ມຄອງວຽກງານບໍລິຫານ, ແຜນການ, ການເງິນ ແລະ ການສ້າງສິ່ງອໍານວຍຄວາມສະດວກໃຫ້ແກ່ການເຄື່ອນໄຫວວຽກງານຂອງສະພາແຫ່ງຊາດ ຈຶ່ງເປັນກົງຈັກເສນາທິການທີ່ໃກ້ຊິດ ຕິດແທດກັບການເຄື່ອນໄຫວວຽກງານສໍາຄັນຂອງສະພາແຫ່ງຊາດ; ການທີ່ຈະຮັບປະກັນເຮັດໃຫ້ການເຄື່ອນໄຫວວຽກງານຂອງສະພາແຫ່ງຊາດ ມີຄວາມເຂັ້ມແຂງໄດ້ນັ້ນ ຄະນະເລຂາທິການສະພາແຫ່ງຊາດ ຈະຕ້ອງມີຄວາມໜັກແໜ້ນເຂັ້ມແຂງຮອບດ້ານ ເຊິ່ງການເຄື່ອນໄຫວວຽກງານຂອງຄະນະເລຂາທິການສະພາແຫ່ງຊາດຊຸດຜ່ານມາ ໂດຍມີທ່ານ ນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ຜູ້ເກົ່າ ເປັນຜູ້ນໍາພານັ້ນ ໄດ້ສ້າງພື້ນຖານດ້ານຕ່າງໆທີ່ມີຄວາມເຂັ້ມແຂງໄວ້ໃຫ້ລະດັບໜຶ່ງແລ້ວ ຈຶ່ງສະເໜີໃຫ້ທ່ານ ນາງ ປິ່ງຄໍາ ລາຊະສິມມາ ເລຂາທິການສະພາແຫ່ງຊາດ ຜູ້ໃໝ່ ໄດ້ສືບຕໍ່ນໍາພາວຽກງານໃຫ້ມີຜົນສໍາເລັດນັບມື້ສູງຂຶ້ນ.

ແຫຼ່ງຂ່າວທີ່ມາ: ສະພາແຫ່ງຊາດ