ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສ​ພ​ຊ) ພິ​ທີ​ມອບ​-ຮັບ​ໜ້າ​ທີ່​ລະ​ຫວ່າງຄະ​ນະ​ປະ​ຈ​ຳ​ສະ​ພາ​ແຫ່ງ​ຊາດ (ຄ​ປ​ຈ.ສ​ພ​ຊ) ​ຊຸ​ດ​ທີ VIII ແລະ ຊຸດ​ທີ IX ໄດ້​ຈັດ​ຂຶ້ນ​ໃນວັນ​​ທີ 2 ເມ​ສາ 2021 ທີ່​ໂຮງ​ແຮມ​ລາ​ວ​ພ​ລາ​ຊາ ນະ​ຄອນຫລວງວ​ຽງ​ຈັນ ນ​ຳ​ໂດຍ​ຄະ​ນະ​ຊຸດ​ທີ VIII ໂດຍ​ທ່ານ ນາງ ປາ​ນີ ຢາ​ທໍ່ຕູ້ ປະ​ທານ​​ ສ​ພ​ຊ ​ຊຸ​ດ​ທີ VIII ແລະ ນຳ​ຄະ​ນະຊຸດ​ທີ IX ໂດຍ​ທ່ານ ໄຊ​ສົມ​ພອນ ພົມ​ວິ​ຫານ ປະ​ທານ​ ສ​ພ​ຊ ຊຸດ​ທີ IX; ມີ​ບັນ​ດາ​ທ່ານ​ຮອງ​ປະ​ທານ ສ​ພ​ຊ, ຄ​ະ​ນະ​ປະ​ຈຳຂອງ​ທັງ​ສອງ​ຊຸດ ແລະ ພາກ​ສ່ວ​ນ​ກ່ຽວ​ຂ້ອງ​ເຂົ້າ​ຮ່ວມ.

ໃນ​ພິ​ທີ, ​ຕາງ​ໜ້າ​ໃຫ້​ ຄ​ປ​ຈ.ສ​ພ​ຊ ຊຸ​ດ​ທ​ີ VIII ໂດຍທ່ານ ນາງ ສີ​ໃສ ລື​ເດດ​ມູນ​ສອນ ຮອງ​ປະ​ທານ ສ​ພ​ຊ ຊຸດ​ທີ VIII ໄດ້​​ຜ່ານ​ບົດ​ລາຍ​ງານ​ການ​ເຄື່ອນ​ໄຫວ​ຂອງ​ ຄ​ປ​ຈ.ສ​ພ​ຊ ຊຸດ​ທີ VIII ໂດຍ​ສັງ​ເຂ​ບ ເປັນ​ຕົ້ນ​ແມ່ນ​ແຈ້ງໃຫ​້​ຊາບ​ກ່ຽວ​ກັບໂຄງ​ປະ​ກອບ​ກົງ​ຈັກ ແລະ​ ບ​ຸກ​ຄະ​ລາ​ກອນ​ຂອງ ສ​ພ​ຊ, ໂຄງ​ປະ​ກອບ​ກົງ​ຈັກ​ການ​ຈັດ​ຕັ້​ງ​ພາຍ​ໃນ​ອົງ​ຄະ​ນະ​ພັກ ສ​ພ​ຊ, ການ​ຈັດ​ຕັ້ງ​ປະ​ຕິ​ບັດ​ພາ​ລະ​ບົດ​ບາ​ດ​ຂອງ ສ​ພ​ຊ ຕາມ 3 ພາ​ລະ​ບົດ​ບາດ​​ທີ່ໄດ້​ກຳ​ນົດ​ໄວ້​ໃນ​ກົດ​ໝາຍ, ວຽ​ກ​ງານສ້າງ​ຄວາມ​ເຂັ້ມ​ແຂງ​ໃຫ້​ແກ່ ສ​ພ​ຊ, ການ​ສ້າ​ງ​ພື້​ນ​ຖານ​ໂຄງ​ລ່າງ​ຂອງ ສ​ພ​ຊ ແລະ ວຽກ​ງານ​ປິ່ນ​ອ້ອມ ເຊິ່ງ​ໄດ້​ຍົກ​ໃຫ້​ເຫັນ​ຜົນ​ສ​ຳ​ເລັດ​ຫລາຍ​ດ້ານອັນ​ພົ້ນ​ເດັ່ນ​ທີ່​ສາ​ມາ​ດ​ຈັດ​ຕັ້ງ​ປະ​ຕິ​ບັດ​ໄດ້​ໃນ​ຕະ​ຫລອດ​ໄລ​ຍະ 5 ປີ​ຜ່ານມາ. ພ້ອມນັ້ນ, ບັນ​ດາ​ທ່ານ​ປະ​ທາ​ນ-ຮອງ​ປະ​ທານ​ ສ​ພ​ຊ ຊຸດ​ທີ VIII ກໍ​ໄດ້​ມີ​ຄຳ​ເຫັນ ແລະ ແຈ້ງ​ໃຫ້​ຊາບ​ກ່ຽວ​ກັບ​ບາງວຽກ​ງານ​ທີ່​ຍັງ​ບໍ່​ທັນ​ປະ​ຕິ​ບັດ​ສ​ຳ​ເລັດ ແລະ ຍັງ​ເປັນ​ຂໍ້​ຄົງ​ຄ້າງ​ບາງ​ດ້ານເຊັ່ນ: ​ໂຄງ​ການກໍ່​ສ້າງ​ອາ​ຄານ​ສະ​ພາ​ແຫ່ງ​ຊາດ​ຫລັງ​ໃໝ່, ການ​ປັບ​ປຸງ​ສັບ​ຊ້ອນ​ກົງ​ຈັກ-ບຸກ​ຄະ​ລາ​ກອນ​ຂອງ ສ​ພ​ຊ ຈຳ​ນວນ​ໜຶ່ງ ແລະ ອື່ນໆ, ຕໍ່​ກັບ​ບັ​ນ​ຫາ​ດັ່ງ​ກ່າວ ​ທັງ​ສອງ​ຝ່າຍ​ກໍ​ໄດ້​ມີ​ການ​ປຶກ​ສາ​ຫາ​ລື​ເພື່ອ​ຊອກ​ຫາ​ທາງ​ແກ້​ໄຂ ສົນ​ທະ​ນາ​ແລກ​ປ່ຽນ​ເຊິ່ງ​ກັນ​ແລະ​ກັນ ​ຢ່າງ​ກົງ​ໄປ​ກົງ​ມາ.

ຈາກນັ້ນ, ທັງ​ສອງ​ຝ່າຍ​ກໍ​ໄດ້​ລົງ​ນາມມອ​ບ-ຮັບ​ໜ້າ​ທີ່​ຢ່າງ​ເປັນ​ທາງ​ການ ໂດຍ​ການ​ລົງ​ນາມ​ຂອງ​ທ່ານ ນາງ ປາ​ນີ ຢາ​ທໍ່ຕູ້ ປະ​ທານ ສ​ພ​ຊ ຊຸດ​ທີ VIII ແລະ ​ທ່ານ ໄຊ​ສົມ​ພອນ ພົມ​ວິ​ຫານ ປະ​ທານ​ ສ​ພ​ຊ ຊຸດ​​ທີ IX.

ແຫຼ່ງຂ່າວທີ່ມາ: ສະພາແຫ່ງຊາດ