ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR
(ສພຊ) ວັນອັງຄານທີ 12 ຕຸລາຜ່ານມາ, ທີ່ຫ້ອງປະຊຸມຫລັກ 6 ນະຄອນຫລວງວຽງຈັນ ໄດ້ມີພິທີມອບ-ຮັບອາຄານຫ້ອງການ ແລະ ຫ້ອງປະຊຸມສະພາແຫ່ງຊາດ (ຫລັກ 6) ຄືນໃຫ້ຫ້ອງວ່າການສູນກາງພັກ ໂດຍການມອບຂອງທ່ານ ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ແລະ ຮັບໂດຍທ່ານ ກິ່ງເພັດ ມົງຄົນວິໄລ ຮອງຫົວໜ້າຫ້ອງວ່າການສູນກາງພັກ; ມີບັນດາທ່ານຄະນະກົມ, ຄະນະພະແນກ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
​ ອີງໃສ່ແຜນການທີ່ຈະຮື້ຖອນຫໍສະພາແຫ່ງຊາດ ຫລັງເກົ່າ ໃນປີ 2017 ສະພາແຫ່ງຊາດ ໄດ້ສະເໜີຂໍນຳ ກຸ່ມອາຄານເກົ່າຂອງຫ້ອງວ່າການສູນກາງພັກ ນັບແຕ່ເດືອນມັງກອນ 2017 ເປັນຕົ້ນມາ ເຊິ່ງມີ 11 ຫລັງ ປະກອບມີອາຄານການນຳຂັ້ນສູງຂອງສະພາແຫ່ງຊາດ, ຄະນະເລຂາທິການ, ສູນເຝິກອົບຮົມ ແລະ ຂໍ້ມູນຂ່າວສານ ລວມທັງໝົດ 130 ທ່ານ ທີ່ຍົກຍ້າຍມານຳໃຊ້; ຕະຫລອດການນຳໃຊ້ອາຄານດັ່ງກ່າວ ສະພາແຫ່ງຊາດ ໄດ້ປັບປຸງສ້ອມແປງອາຄານ, ປ່ຽນຖ່າຍອຸປະກອນຮັບໃຊ້ ແລະ ປະກອບເຟີນີເຈີຫ້ອງປະຊຸມຕາມຮູບແບບຫ້ອງປະຊຸມລັດຖະສະພາ ແລະ ຮັບ ປະກັນທາງດ້ານເຕັກນິກ, ການນຳໃຊ້ກຸ່ມອາຄານຕ່າງໆ ນອກຈາກເປັນສະຖານທີ່ເຮັດວຽກຂອງພະນັກງານແລ້ວ ຍັງນຳໃຊ້ເຂົ້າໃນການຈັດກອງປະຊຸມສະໄໝສາມັນສະພາແຫ່ງຊາດ ຊຸດທີ VIII ຈຳນວນ 7 ຄັ້ງ,​ ກອງປະຊຸມສະຫລຸບ ວຽກງານປະຈຳປີ, ກອງປະຊຸມລະດັບຕ່າງໆ, ຈັດກິດຈະກຳວັນສຳຄັນຂອງພັກ ຂອງຊາດ ແລະ ອື່ນໆ; ພ້ອມກັນນັ້ນ, ກໍໄດ້ຮັບການເອົາໃຈໃສ່ອຳນວຍຄວາມສະດວກຫລາຍດ້ານຈາກຫ້ອງວ່າການສູນກາງພັກ ໂດຍສະເພາະການເຂົ້າ-ອອກ, ການປະສານສົມທົບທາງດ້ານເຕັກນິກ ຈາກໜ່ວຍງານຄຸ້ມຄອງເຄຫາ ແລະ ຊັບສິນ ແລະ ວຽກງານອື່ນໆ.
(ພາບ ແລະ ຂ່າວ: ສົມນຶກ ແກ້ວໄຊຍະຈັກ)