ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ຕອນບ່າຍວັນທີ 26 ກັນຍາຜ່ານມາ, ສະພາແຫ່ງຊາດ (ສພຊ) ໄດ້ຈັດກອງປະຊຸມພົບປະສອງຝ່າຍ ລະຫວ່າງສະພາແຫ່ງຊາດ ແຫ່ງ ສປປລາວ ແລະ ສະພາແຫ່ງຊາດ ແຫ່ງ ສສ.ຫວຽດນາມ ຂຶ້ນທີ່ຫໍສະພາແຫ່ງຊາດລາວ ເຊິ່ງຝ່າຍລາວນໍາໂດຍສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ; ຝ່າຍຫວຽດນາມນໍາໂດຍສະຫາຍ ນາງ ຫງວຽນ ທິ ກິມ ເງິນ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສສ.ຫວຽດນາມ ເນື່ອງໃນໂອກາດທີ່ມາຢ້ຽມຢາມພົບປະຢ່າງເປັນທາງການຢູ່ ສປປລາວ ລະຫວ່າງວັນທີ 26-29 ກັນຍາ 2019.

ການຢ້ຽມຢາມຄັ້ງນີ້ ແນໃສ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັັດ ແລະ ປະຊາຊົນສອງຊາດລາວ-ຫວຽດນາມ ເວົ້າລວມ, ເວົ້າສະເພາະລະຫວ່າງສອງສະພາແຫ່ງຊາດລາວ-ຫວຽດນາມ ໃຫ້ນັບມື້ເຂົ້າສູ່ລວງເລິກ ແລະ ເກີດດອກອອກຜົນຢ່າງແທ້ຈິງ ແລະ ສືບຕໍ່ປະເພນີອັນດີງາມຂອງຜູ້ນໍາສອງປະເທດໃນການແລກປ່ຽນການໄປມາຫາສູ່ເຊິ່ງກັນ ແລະ ກັນ, ການປຶກສາຫາລື ແລະ ແລກປ່ຽນບົດຮຽນກ່ຽວກັບບັນຫາທັງພາຍໃນປະເທດ, ບັນຫາພາກພື້ນ ແລະ ສາກົນທີ່ສອງປະເທດ ກໍຄືສອງສະພາແຫ່ງຊາດໃຫ້ຄວາມສົນໃຈໃນປັດຈຸບັນ.

ໂອກາດດັ່ງກ່າວ ສະຫາຍ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບຕໍ່ສະຫາຍ ນາງ ຫງວຽນ ທິ ກິມ ເງິນ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມເປັນການພາຍໃນຄັ້ງນີ້ ເຊິ່ງເປັນການນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງຖານສະຫາຍອ້າຍນ້ອງອັນໃກ້ສິດສະໜິດສະໜົມ ແລະ ອົບອຸ່ນມາສູ່ສະພາແຫ່ງຊາດລາວເວົ້າສະເພາະ ແລະ ເວົ້າລວມແມ່ນສູ່ພັກ, ລັດ ແລະ ປະຊາຊົນລາວບັນດາເຜົ່າ, ຕີລາຄາສູງຕໍ່ການຢ້ຽມຢາມໃນຄັ້ງນີ້ ເປັນການສືບຕໍ່ປະກອບສ່ວນສໍາຄັນເຂົ້າໃນການເສີມຂະຫຍາຍມູນເຊື້ອອັນດີງາມແຫ່ງສາຍພົວພັນມິດຕະພາບອັນຍິ່ງໃຫຍ່ໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ ແລະ ມີປະສິດທິຜົນຂຶ້ນເລື້ອຍໆ ແລະ ຊົມເຊີຍຕໍ່ການນໍາພາອັນປີຊາສາມາດ ແລະ ສະຫລາດສ່ອງໃສຂອງພັກກອມມູນິດຫວຽດນາມໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກກອມມູນິດຫວຽດນາມຄັ້ງທີ XII ແລະ ການຈັດຕັ້ງແຜນພັດທະນາເສດຖະກິດ-ສັງຄົມ 5 ປີ ກໍຄືປະຈໍາປີອັນເຮັດໃຫ້ປະເທດຫວຽດນາມສືບຕໍ່ຂະຫຍາຍຕົວຢ່າງບໍ່ຢຸດຢັ້ງ ພ້ອມທັງແຈ້ງກ່ຽວກັບການພັດທະນາເສດຖະກິດ-ສັງຄົມໃນໄລຍະ 9 ເດືອນຢູ່ລາວ ແລະ ຜົນງານທີ່ສອງສະພາແຫ່ງຊາດລາວ-ຫວຽດນາມ ໄດ້ຊຸກຍູ້ໃຫ້ລັດຖະບານສອງປະເທດແກ້ໄຂການຍົກຍ້າຍພູມລໍາເນົາຕາມລໍາພັງໃຈ ແລະ ການສ້າງຄອບຄົວບໍ່ຖືກຕ້ອງຕາມລະບຽບກົດໝາຍຢູ່ບໍລິເວນຊາຍແດນໃນບາງແຂວງ ແລະ ຍັງໄດ້ສະເໜີໃຫ້ສືບຕໍ່ຊຸກຍູ້ໃຫ້ລັດຖະບານສອງປະເທດ ຊີ້ນໍາຂະແໜງການກ່ຽວຂ້ອງຂັ້ນສູນກາງ ແລະ ທ້ອງຖິ່ນ ຈັດຕັ້ງປະຕິບັດບັນດາຂໍ້ຕົກລົງທີ່ໄດ້ເຊັນກັນແລ້ວ ໃຫ້ເກີດຜົນສັກສິດເຊັ່ນ: ການກໍານົດລາຄາຊື້-ຂາຍໄຟຟ້າ, ການດຶງດູດການລົງທຶນ, ການສົ່ງເສີມການຄ້າລະຫວ່າງສອງປະເທດໃຫ້ມີບັນຍາກາດຟົດຟື້ນກວ່າເກົ່າ; ຮ່ວມກັນຊຸກຍູ້ບັນດາຂະແໜງການທີ່ກ່ຽວຂ້ອງຂອງລັດຖະບານ ກໍຄືຄະນະກໍາມະການດໍາເນີນການກໍ່ສ້າງຫໍສະພາແຫ່ງຊາດລາວ ຂອງລາວ ແລະ ຫວຽດນາມ ເລັ່ງລັດຮ່ວມກັນແກ້ໄຂບັນຫາທີ່ເປັນອຸປະສັກໃຫ້ການດໍາເນີນການກໍ່ສ້າງຕຶກດັ່ງກ່າວ ເພື່ອສາມາດເຮັດໃຫ້ການກໍ່ສ້າງຫໍສະພາແຫ່ງຊາດລາວສໍາເລັດຕາມແຜນ, ລວມທັງແຜນກະກຽມການມອບ-ຮັບຕຶກສະພາດັ່ງກ່າວ; ສະເໜີສະຫາຍປະທານສະພາແຫ່ງຊາດ ຈົ່ງໄດ້ພິຈາລະນາ ຈັດສົ່ງຜູ້ຊ່ຽວຊານ ເພື່ອມາຊ່ວຍເຝິກອົບຮົມທາງດ້ານວິຊາການໃຫ້ແກ່ພະນັກງານທີ່ເປັນເສນາທິການໃນບັນດາກໍາມາທິການຂອງສະພາແຫ່ງຊາດ ກໍຄືສະພາທ້ອງຖິ່ນຂອງລາວ ເພື່ອແນໃສຍົກສູງລະດັບຂີດຄວາມສາມາດຂອງກົງຈັກເສນາທິການຂອງລາວອີກກ້າວໜຶ່ງ ແລະ ເຊື້ອເຊີນບັນດາສະຫາຍການນໍາ ແລະ ອະດີດການນໍາຂອງສະພາແຫ່ງຊາດຫວຽດນາມ ພ້ອມດ້ວຍຄອບຄົວມາຢ້ຽມຢາມ ແລະ ພັກຜ່ອນຢູ່ລາວໃນເວລາອັນຄວນ. ສະຫາຍ ນາງ ຫງວຽນ ທິ ກິມ ເງິນ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງ ສປປລາວ ເວົ້າລວມ, ເວົ້າສະເພາະແມ່ນສະພາແຫ່ງຊາດລາວໃນຄັ້ງນີ້ ແລະ ແຈ້ງສະພາບການທີ່ພົ້ນເດັ່ນ ໃນການພັດທະນາເສດຖະກິດ-ສັງຄົມຂອງຫວຽດນາມ ແລະ ນໍາບັນດາຄໍາສະເໜີຂອງສະຫາຍປະທານສະພາແຫ່ງຊາດລາວ, ເຫັນດີໃຫ້ສືບຕໍ່ຮ່ວມມືກ່ຽວກັບການແລກປ່ຽນປະສົບການຮ່ວມກັນ ແລະ ຈະສົ່ງບັນດາສ່ຽວຊານມາເຝິກອົບຮົມໃນຂໍ້ຕ່າງໆທີ່ ສປປລາວ ໃຫ້ຄວາມສົນໃຈ ນອກຈາກນີ້, ຍັງໄດ້ປຶກສາຫາລືກ່ຽວກັບໂຄງການປຸກສ້າງຫໍສະພາແຫ່ງຊາດຫລັງໃໝ່.

ໃນວັນດຽວກັນ, ຄະນະຍັງໄດ້ຢ້ຽມຢາມພົບປະກັບສະຫາຍ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປລາວ ທີ່ຫ້ອງວ່າການສໍານັກງານນາຍົກລັດຖະມົນຕີ.

(ສອນສັກ ວັນວິໄຊ)