ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ໃນຕອນບ່າຍຂອງວັນທີ 11 ພຶດສະພາ 2018, ທີ່ຫ້ອງປະຊຸມຄະນະເລຂາທິການ ສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໄດ້ມີພິທີປິດຊຸດເຝິກອົບຮົມ ທິດສະດີການເມືອງ ແລະ ການປົກຄອງ ໄລຍະສັ້ນ 45 ວັນ ຂອງຄະນະບໍລິຫານງານພັກ ສະພາແຫ່ງຊາດ ຊຸດທີ III ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ຮອງເລຂາຄະນະບໍລິຫານງານພັກ, ຮອງປະທານສະພາແຫ່ງຊາດ; ເຂົ້າຮ່ວມມີ ສະຫາຍ ນາງ ໄກສອນ ຈັນສີນາ ວ່າການຫົວໜ້າກົມວິຊາການ ຂອງສະຖາບັນການເມືອງ-ການປົກຄອງແຫ່ງຊາດ, ສະຫາຍ ສຸບັນ ສະວະບຸດ ຄະນະບໍລິຫານງານພັກ, ຮອງເລຂາທິການສະພາແຫ່ງຊາດ, ສະຫາຍ ສິນທະລາ ຫລ້າສຸກສະໄໝ ຫົວໜ້າກົມກວດກາ ແລະ ບັນດານັກເຝິກອົບຮົມ ພ້ອມດ້ວຍນັກເຝິກອົບຮົມ ແລະ ພະນັກງານທີ່ກ່ຽວຂ້ອງ.

ໃນພິທີດັ່ງກ່າວ ສະຫາຍ ສຸບັນ ສະວະບຸດ ໄດ້ຜ່ານບົດສະຫລຸບການເຝິກອົບຮົມ ທິດສະດີການເມືອງ ແລະ ການປົກຄອງ ໄລຍະ 45 ວັນ ຂອງສະພາແຫ່ງຊາດຊຸດທີ III ສາມາດຕີລາຄາທີ່ນັກເຝິກອົບຮົມຈະໄດ້ຮັບດັ່ງນີ້: 1. ເຮັດໃຫ້ມີຄວາມຮັບຮູ້ຢ່າງເປັນລະບົບ ແລະ ເຂົ້າໃຈຈະແຈ້ງກວ່າເກົ່າກ່ຽວກັບບັນດາຫລັກມູນພື້ນຖານຂອງທິດສະດີ ມາກ-ເລນິນ ໃນເງື່ອນໄຂໃໝ່; 2. ເຂົ້າໃຈຈະແຈ້ງກວ່າເກົ່າກ່ຽວກັບແນວທາງການປ່ຽນແປງໃໝ່ຮອບດ້ານ ຢ່າງມີຫລັກການຂອງພັກ ແລະ ກໍາແໜ້ນຕື່ມກ່ຽວກັບບົດບາດການນໍາພາຂອງພັກ ແລະ ການຄຸ້ມຄອງຂອງລັດຕໍ່ກົນໄກເສດຖະກິດຕະຫລາດ ແລະ ນະໂຍບາຍສັງຄົມຈໍານວນໜຶ່ງ. ນອກນັ້ນ, ຍັງເຫັນໄດ້ຈຸດໝາຍກ້າວຂຶ້ນໄປຕາມເສັ້ນທາງສັງຄົມນິຍົມເທື່ອລະກ້າວຂອງພັກເຮົາ, ເຫັນໄດ້ຢ່າງຈະແຈ້ງຕໍ່ກົນອຸບາຍຂອງສັດຕູ ແລະ ອິດທິກໍາລັງປໍລະປັກທີ່ຢາກຫັນປ່ຽນພວກເຮົາໂດຍສັນຕິ; 3. ເຮັດໃຫ້ 2 ອົງການ ໄດ້ມີໂອກາດປັບປຸງທັດສະນະຫລັກໝັ້ນ ແລະ ມີວິໄສທັດໃນການສັງເກດຕີລາຄາບັນຫາຕ່າງໆ ໃຫ້ຖືກຕ້ອງ ແລະ ສາມາດຕີຖອຍແນວຄິດງໍ້ງ່ຽງ, ເອື່ອອີງ, ກ້າເບີ່ງບັນຫາ ແລະ ໄກແຂ້ບັນຫາ ໃຫ້ຖືກຕ້ອງກວ່າເກົ່າ; 4. ຈາກການຜ່ານບົດເກັບກ່ຽວຄວາມຮັບຮູ້ລວມຂອງນັກເຝິກອົບຮົມເຫັນວ່າ: ມີຄວາມກະຕືລືລົ້ນໃນການຄົ້ນຄວ້າຮໍ່າຮຽນ, ເກັບກໍາຫລາຍບັນຫາໃໝ່ເຊັ່ນ: ປັດຊະຍາ ມາກ-ເລນິນ, ເສດຖະສາດການເມືອງ, ລັດທິສັງຄົມນິຍົມ, ການບໍລິຫານລັດ, ການປົກຄອງ ແລະ ກົດໝາຍພື້ນຖານຈໍານວນໜຶ່ງ ແລະ ການກໍ່ສ້າງພັກໃນໄລຍະໃໝ່. ນັກເຝິກອົບຮົມໄດ້ສະແດງຄວາມຄິດເຫັນຂອງຕົນ ທີ່ມີໂອກາດເຂົ້າຮ່ວມເຝິກອົບຮົມ ແລະ ໄດ້ສົມທຽບລະຫວ່າງທິດສະດີກັບພຶດຕິກໍາຕົວຈິງ ໃນການນໍາພາ-ບໍລິຫານວຽກງານໃນໄລຍະຜ່ານມາ ໂດຍອີງໃສ່ພື້ນຖານທິດສະດີທີ່ໄດ້ຮຽນມານີ້ ເພື່ອເປັນບ່ອນອີງໃນການປັບປຸງແກ້ໄຂຈຸດອ່ອນຂໍ້ຂາດຕົກບົກຜ່ອງຂອງຕົນໃນຕໍ່ໜ້າ; 5. ນັກເຝິກອົບຮົມຈໍານວນໜຶ່ງ ມີບົດຮຽນໃນພຶດຕິກໍາຕົວຈິງ, ມີລະດັບຄວາມຮູ້ດ້ານວິຊາການສະເພາະອັນແນ່ນອນ ຈຶ່ງເຮັດໃຫ້ການຮັບເອົາບົດຮຽນໃໝ່ຈາກຄູອາຈານໄດ້ດີ ແລະ ນັກເຝິກອົບຮົມຈໍານວນຫລວງຫລາຍ ໄດ້ຮຽນຮູ້ການປະຕິບັດລະບຽບວິໄນຂອງການເຝິກອົບຮົມເປັນຢ່າງດີ ເປັນຕົ້ນ: ການນຸ່ງຖື, ການເຄົາລົບຄູ-ອາຈານ, ການເຂົ້າຫ້ອງທັນເວລາ, ການລົງທະບຽນຖືກຕ້ອງ ແລະ ບໍ່ມີການປະລະການຮຽນ; 6. ການເປີດຊຸດເຝິກອົບຮົມໃນຄັ້ງນີ້ ແມ່ນໄດ້ສ້າງບົດຮຽນອັນດີໃຫ້ແກ່ຄະນະຮັບຜິດຊອບຊຸດເຝິກອົບຮົມ ເພື່ອຖອດຖອນບົດຮຽນໃນການຈັດຕັ້ງປະຕິບັດໃນຄັ້ງຕໍ່ໄປ ໂດຍສະເພາະແມ່ນການກະກຽມແຕ່ຫົວທີດ້ານບຸກຄະລາກອນ, ດ້ານແຜນການ-ການເງິນ, ການປະເມີນຜົນ, ການຕິດຕາມກວດກາຕາມຕາຕະລາງຂອງຄະນະຮັບຜິດຊອບວາງອອກ, ການລາຍງານຂອງຄະນະຮັບຜິດຊອບແຕ່ລະໜ້າວຽກ. ອີກດ້ານໜຶ່ງ ກໍເປັນການຜູກແໜ້ນຄວາມສາມັກຄີລະຫວ່າງສະພາແຫ່ງຊາດ ກັບສະຖາບັນການເມືອງ ແລະ ການປົກຄອງແຫ່ງຊາດ ເວົ້າລວມ, ເວົ້າສະເພາະ ແມ່ນເປັນໂອກາດດີເພື່ອສ້າງຄວາມລື້ງເຄີຍ, ຮັດແໜ້ນຄວາມສາມັກຄີຮັກແພງ ແລະ ການແລກປ່ຽນບົດຮຽນເຊິ່ງກັນ ແລະ ກັນ ລະຫວ່າງນັກເຝິກອົບຮົມດ້ວຍກັນ ແລະ ນັກເຝິກອົບຮົມກັບຄູ-ອາຈານ ຈາກສະຖາບັນການເມືອງ ແລະ ການປົກຄອງແຫ່ງຊາດ, ນັກເຝິກອົບຮົມກັບຄະນະຮັບຜິດຊອບ; 7. ໄດ້ເອົາໃຈໃສ່ປະເມີນຄວາມຮັບຮູ້ຂອງຕົນເອງ ພາຍຫລັງຮຽນຈົບພາກວິຊານັ້ນໆ, ຜ່ານການປະເມີນຄວາມຮັບຮູ້ແລ້ວເຫັນວ່າ ມີຫລາຍສະຫາຍປະເມີນຕົນເອງແບບພາວະວິໄສ.

ໃນພິທີໄດ້ມີການມອບຮັບໃບຢັ້ງຢືນການເຝິກອົບຮົມ ມອບໂດຍສະຫາຍ ນາງ ສີໃສ ລືເດດມູນສອນ ນັກເຝິກອົບຮົມທີ່ໄດ້ຮັບໃນຄັ້ງນີ້ ມີຈໍານວນ 40 ສະຫາຍ ຍິງ 14 ສະຫາຍ. ໃນນັ້ນ, ສະມາຊິກພັກຂອງຄະນະບໍລິຫານງານພັກສະພາແຫ່ງຊາດ ມີ 31 ສະຫາຍ ຍິງ 11 ສະຫາຍ ເຮັດໃຫ້ສະມາຊິກພັກຂອງຄະນະບໍລິຫານງານພັກສະພາແຫ່ງຊາດ ໄດ້ຜ່ານການບໍາລຸງທິດສະດີການເມືອງ-ການປົກຄອງ ເພີ່ມຂຶ້ນ 14,7% ທຽບໃສ່ປີ 2017 ຫລື ກວມ 86,1% ຂອງສະມາຊິກພັກທັງໝົດ.