ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 29 ມິຖຸນາ 2021, ທີ່ຫ້ອງຮັບແຂກສະພາແຫ່ງຊາດ (ທາດຫລວງ) ນະຄອນຫລວງວຽງຈັນ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ໄດ້ໃຫ້ສຳພາດແກ່ສື່ມວນຊົນກ່ຽວກັບຜົນສຳເລັດໂຄງການປຸກສ້າງຫໍສະພາແຫ່ງຊາດລາວ (ຫລັງໃໝ່) ຫລັງຈາກທີ່ເປີດນຳໃຊ້ໃນກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ເຊິ່ງທ່ານໄດ້ກ່າວວ່າ: ລາວ-ຫວຽດນາມ ເປັນສອງປະເທດອ້າຍນ້ອງທີ່ມີສາຍພົວພັນມິດຕະພາບອັນຍິ່ງໃຫຍ່, ມີຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ທີ່ໄດ້ຮ່ວມກັນສ້າງຂຶ້ນ ແລະ ເພີ່ມພູນຄູນສ້າງສືບທອດມາເປັນເວລາຫລາຍທົດສະວັດ ທັງຢູ່ໃນໄລຍະຕໍ່ສູ້ກູ້ຊາດເພື່ອຍາດເອົາເອກະລາດແຫ່ງຊາດໃນເມື່ອກ່ອນ ກໍຄືໃນໄລຍະປົກປັກຮັກສາ ແລະ ພັດທະນາປະເທດຊາດໃນປັດຈຸບັນ; ຍາມໃດກໍມີຄວາມເປັນຫ່ວງເປັນໄຍ, ໃຫ້ການສະໜັບສະໜູນ, ຊ່ວຍເຫລືອເຊິ່ງກັນແລະກັນ ດ້ວຍໄມຕີຈິດມິດຕະພາບຖານສະຫາຍອ້າຍນ້ອງທີ່ແທ້ຈິງ ເຖິງຈະມີຄວາມຫຍຸ້ງຍາກຫລາຍປະການກໍຕາມ ເວົ້າລວມ, ເວົ້າສະເພາະການໃຫ້ທຶນຊ່ວຍເຫລືອພັກ, ລັດ ແລະ ປະຊາຊົນລາວ ເພື່ອປຸກສ້າງຫໍສະພາແຫ່ງຊາດ ຫລັງໃໝ່ ດ້ວຍມູນຄ່າ 111,75 ລ້ານໂດລາ ໂດຍມອບໝາຍໃຫ້ແມ່ທັບນ້ອຍ 11 ເປັນຜູ້ກໍ່ສ້າງ ນັບແຕ່ເດືອນກໍລະກົດ 2018 ເປັນຕົ້ນມາ ເຊິ່ງເປັນຂວັນອັນລໍ້າຄ່າທີ່ສຸດຂອງພັກ, ລັດ ແລະ ປະຊາຊົນຫວຽດນາມ ມອບໃຫ້ແກ່ພັກ, ລັດ ແລະ ປະຊາຊົນລາວ ທັງເປັນໂຄງການທີ່ມີຄວາມໝາຍສໍາຄັນ, ເປັນສັນຍາລັກ ແລະ ຕົວແບບ ແຫ່ງຄວາມສາມັກຄີພິເສດ ລະຫວ່າງລາວ-ຫວຽດນາມ ບົນຈິດໃຈ “ເຂົ້າເມັດຫັກ ຜັກເສັ້ນໜຶ່ງກໍ່ປັນກັນ”.

ພ້ອມນັ້ນ, ທ່ານຍັງໄດ້ກ່າວຕື່ມອີກວ່າ: ຫໍສະພາແຫ່ງຊາດລາວຫລັງໃໝ່ ໄດ້ດຳເນີນການກໍ່ສ້າງໃນສະພາບການທີ່ທົ່ວໂລກ ພວມປະເຊີນໜ້າກັບການແຜ່ລະບາດຂອງພະຍາດໂຄວິດ-19 ຢ່າງໜັກໜ່ວງ ເຊິ່ງ ສປປລາວ ແລະ ສສ.ຫວຽດນາມ ກໍໄດ້ຮັບຜົນກະທົບຈາກສະພາບດັ່ງກ່າວຢ່າງຫລີກລ່ຽງບໍ່ໄດ້ ເຊິ່ງໄດ້ສົ່ງຜົນກະທົບໂດຍກົງຕໍ່ການດຳເນີນໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ແຕ່ສອງປະເທດໄດ້ດໍາເນີນນະໂຍບາຍ ແລະ ມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດຢ່າງເຂັ້ມງວດ ແຕ່ດ້ວຍຄວາມຕັດສິນໃຈຢ່າງເດັດດ່ຽວຂອງການນໍາສູງສຸດຂອງສອງປະເທດ ບວກກັບນໍ້າໃຈສາມັກຄີຮັກແພງ, ສະໜິດສະໜົມແບບພິເສດ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມອ້າຍນ້ອງ ຈຶ່ງເຮັດໃຫ້ໂຄງການກໍ່ສ້າງຫໍສະພາແຫ່ງຊາດລາວຫລັງ  ໃໝ່ ໄດ້ຮັບການດຳເນີນການກໍ່ສ້າງຢ່າງຕໍ່ເນື່ອງ ໂດຍການນຳໃຊ້ກົນໄກພິເສດ ຄຽງຄູ່ກັບມາດຕະການຄວບຄຸມຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ເຮັດໃຫ້ໂຄງການສາມາດປະຕິບັດສຳເລັດຕາມແຜນທີ່ກຳນົດໄວ້ແຕ່ລະໄລຍະ; ພ້ອມນັ້ນ,  ຄະນະຊີ້ນຳ-ຄຸ້ມຄອງໂຄງການທັງສອງຝ່າຍ ໄດ້ປະສານສົມທົບກັນຢ່າງກົມກຽວ ແລະ ເປັນຈິດໜຶ່ງໃຈດຽວກັນ ໃນການຊີ້ນໍາ-ນໍາພາ ແລະ ປະສານສົມທົບກັບບັນດາຂະແໜງການກ່ຽວຂ້ອງຂອງຕົນ ເພື່ອແກ້ໄຂບັນຫາຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ອັນເປັນການສ້າງເງື່ອນໄຂອໍານວຍຄວາມສະດວກຮອບດ້ານ ເປັນຕົ້ນແມ່ນການຈັດຫາ ແລະ ຂົນສົ່ງວັດສະດຸກໍ່ສ້າງ, ການນໍາເຂົ້າກໍາມະກອນສີມືແຮງງານ; ພ້ອມນັ້ນ, ກໍໄດ້ມີການປະຊຸມສ່ອງແສງລາຍງານຢ່າງເປັນປະຈໍາ ເພື່ອສ້າງຄວາມໂລ່ງລ່ຽນ ແລະ ປະຕິບັດໄດ້ທັນຕາມກໍານົດເວລາ, ຮັບປະກັນຄຸນນະພາບ ແລະ ຄວາມສວຍງາມ ສົມກັບເປັນສັນຍາລັກ ແຫ່ງອົງການອໍານາດລັດສູງສຸດຂອງປະຊາຊົນລາວທັງຊາດ ແລະ ທັງເປັນສັນຍາລັກ ແຫ່ງນໍ້າໃຈສາມັກຄີພິເສດອັນບໍລິສຸດຜຸດຜ່ອງ ແລະ ເປັນມູນມໍລະດົກອັນລໍ້າຄ່າຂອງສອງຊາດລາວ-ຫວຽດນາມ.

ໃນຕອນທ້າຍ, ທ່ານຍັງໄດ້ກ່າວຕື່ມອີກວ່າ: ຫໍສະພາແຫ່ງຊາດຫລັງນີ້ ຍັງຈະເປັນສະຖານທີ່ທັດສະນະສຶກສາໃຫ້ແກ່ນັກຮຽນຮູ້ປັນຍາຊົນທຸກຊັ້ນຄົນ ໂດຍສະເພາະບັນດານັກສຶກສາ ເພື່ອຮຽນຮູ້ກ່ຽວກັບລະບອບການເມືອງ, ລະບົບການຈັດຕັ້ງ ແລະ ການເຄື່ອນໄຫວຂອງອົງການນິຕິບັນຍັດ ທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງຕົນ ແລະ ທັງເປັນບ່ອນຮຽນຮູ້ກ່ຽວກັບມູນເຊື້ອຄວາມສາມັກຄີພິເສດລາວ-ຫວຽດນາມ; ຫໍສະພາແຫ່ງຊາດຫລັງນີ້ຈະປະກອບ ສ່ວນຍົກສູງບົດບາດ ແລະ ຄຸນນະພາບຂອງສະພາແຫ່ງຊາດ ໃນການປະຕິບັດໜ້າທີ່ຂອງຕົນໃນການເຄື່ອນໄຫວພາຍໃນ, ໃນເວທີພາກພື້ນ ແລະ ສາກົນ.

ແຫຼ່ງຂ່າວທີ່ມາ: ສະພາແຫ່ງຊາດ