ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ໃນຕອນເຊົ້າວັນທີ 14 ສິງຫາ 2020 ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ເຂົ້າຮ່ວມພິທີໄວ້ອາໄລເຖິງດວງວິນຍານ ສະຫາຍ ເລ ຂາ ຟຽວ ອະດີດເລຂາທິການໃຫຍ່ພັກກອມມູນິດຫວຽດນາມ ທີ່ໄດ້ມໍລະນະກໍາໃນວັນທີ 7 ສິງຫາ 2020 ຢູ່ທີ່ສະຖານເອກອັກຄະລັດຖະທູດ ສສ.ຫວຽດນາມ ປະຈໍາລາວ.

ໂອກາດດັ່ງກ່າວ ສະຫາຍ ນາງ ປານີ ຢາທໍ່ຕູ້ ໄດ້ຂຽນສານໄວ້ອາໄລວ່າ: ໃນນາມສະພາແຫ່ງຊາດ ແຫ່ງ ສປປ ລາວ, ປະຊາຊົນລາວ ແລະ ໃນນາມສ່ວນຕົວ, ພວກຂ້າພະເຈົ້າຮູ້ສຶກເສົ້າໂສກເສຍໃຈ ເປັນຢ່າງຍິ່ງ ທີ່ໄດ້ຮັບຂ່າວການຈາກໄປໂດຍບໍ່ມີວັນຫວນຄືນມາ ຂອງສະຫາຍ ເລ ຂາ ຟຽວ ອະດີດເລຂາທິການໃຫຍ່ພັກກອມມູນິດຫວຽດນາມ, ໃນວັນທີ 7 ສິງຫາ 2020 ສະຫາຍ ເລ ຂາ ຟຽວ ແມ່ນຜູ້ນໍາປະຕິວັດອາວຸໂສທີ່ດີເດັ່ນ ຂອງ ສສ.ຫວຽດນາມ ອ້າຍນ້ອງ, ສະຫາຍ ໄດ້ອຸທິດຊີວິດ, ສະຕິປັນຍາ, ເຫື່ອແຮງ, ຜົນປະໂຫຍດສ່ວນຕົວ, ສ້າງຜົນງານອັນໃຫຍ່ຫລວງ ເພື່ອພາລະກິດຕໍ່ສູ້ປົດປ່ອຍປະເທດຊາດ ຍາດເອົາເອກະລາດແຫ່ງຊາດ, ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຫວຽດນາມ ມີຄວາມຈະເລີນຮຸ່ງເຮືອງສີວິໄລ; ສະຫາຍ ແມ່ນເພື່ອນມິດຜູ້ຈົງຮັກພັກດີ ແລະ ສະໜິດສະໜົົມຂອງພັກ, ສະພາແຫ່ງຊາດ, ລັດຖະບານ ແລະ ປະຊາຊົນລາວ ທີ່ໄດ້ທຸ້ມເທສະຕິປັນຍາ, ເຫື່ອແຮງເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ລັດ ແລະ ປະຊາຊົນລາວ-ຫວຽດນາມ ໃຫ້ຈະເລີນງອກງາມຈົນເທົ່າທຸກວັນນີ້ ສະນັ້ນ, ການຈາກໄປຂອງສະຫາຍ ເລ ຂາ ຟຽວ ບໍ່ພຽງແຕ່ເປັນການສູນເສຍນັກຮົບປະຕິວັດຜູ້ດີເລີດ, ຜູ້ນຳທີ່ປີຊາສາມາດຂອງພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ແຕ່ຍັງເປັນການສູນເສຍເພື່ອນມິດຜູ້ປະເສີດ, ສະຫາຍຮ່ວມອຸດົມການ, ຜູ້ຊື່ສັດຈິງໃຈຕໍ່ພັກ, ລັດຖະບານ ແລະ ປະຊາຊົນລາວ ຂອງພວກຂ້າພະເຈົ້າ.

ໃນໄລຍະເວລາ ແຫ່ງຄວາມໂສກເສົ້າເສຍດາຍ ຕໍ່ການຈາກໄປຂອງ ສະຫາຍ ເລ ຂາ ຟຽວ ຄັ້ງນີ້; ໃນນາມສະພາແຫ່ງຊາດ, ປະຊາຊົນລາວບັນດາເຜົ່າ ແລະ ໃນນາມສ່ວນຕົວ, ພວກຂ້າພະເຈົ້າ ຂໍແບ່ງເບົາຄວາມທຸກໂສກເສຍໃຈ, ຄວາມອາໄລອາວອນ ຢ່າງສຸດຊຶ້ງ ຮ່ວມກັບພັກ, ສະພາແຫ່ງຊາດ, ລັດຖະບານ, ຄອບຄົວ, ລູກຫລານ, ຍາດພີ່ນ້ອງ ແລະ ເພື່ອນມິດສະຫາຍຂອງສະຫາຍ ເລ ຂາ ຟຽວ ກໍຄືປະຊາຊົນຫວຽດນາມ ດ້ວຍຄວາມຈິງໃຈມານະທີ່ນີ້ດ້ວຍ ຂໍໃຫ້ດວງວິນຍານຂອງສະຫາຍ ເລ ຂາ ຟຽວ ຈົ່ງໄປສູ່ສຸຂະຕິດ້ວຍເຖີ້ນ.

​ແຫຼ່ງຂ່າວທີ່ມາ: ສະພາແຫ່ງຊາດ