ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ຕອນບ່າຍວັນທີ 14 ກຸມພາ 2020 ຜ່ານມາ, ທີ່ຫ້ອງຮັບແຂກສະພາແຫ່ງຊາດ ນະຄອນຫລວງວຽງຈັນ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນການພັກ, ປະທານສະພາແຫ່ງຊາດ (ສພຊ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ເລ ກວາງ ຮຸ່ງ ຮອງລັດຖະມົນຕີກະຊວງກໍ່ສ້າງ ສສ.ຫວຽດນາມ ພ້ອມດ້ວຍຄະນະ ເນື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 13-15 ກຸມພາ 2020.

ສະຫາຍ ເລ ກວາງ ຮຸ່ງ ໄດ້ກ່າວສະແດງຄວາມຂອບໃຈທີ່ສະຫາຍປະທານສະພາແຫ່ງຊາດລາວ ໄດ້ເສຍສະຫລະເວລາໃຫ້ກຽດຕ້ອນຮັບ ພ້ອມທັງລາຍງານກ່ຽວກັບຈຸດປະສົງຂອງການເດີນທາງມາຢ້ຽມຢາມ ສປປລາວ ໃນຄັ້ງນີ້ ແລະ ລາຍງານຄວາມຄືບໜ້າຂອງການປະຕິບັດໂຄງການປຸກສ້າງຫໍສະພາແຫ່ງຊາດລາວ ຫລັງໃໝ່ ແລະ ຜົນຂອງການພົບປະກັບສະຫາຍ ສົມພັນ ແພງຄໍາມີ ຮອງປະທານສະພາແຫ່ງຊາດ ກ່ອນໜ້ານີ້ ເຊິ່ງທັງສອງຝ່າຍໄດ້ປຶກສາຫາລື ຊອກວິທີທາງແກ້ໄຂບັນຫາຂອງການປະຕິບັດໂຄງການກໍ່ສ້າງຫໍສະພາແຫ່ງຊາດລາວ ຫລັງໃໝ່ ຮ່ວມກັນ ແລະ ວາງແຜນຮ່ວມກັນວ່າເຮັດແນວໃດຈະປຸກສ້າງໃຫ້ທັນຕາມເວລາທີ່ໄດ້ກໍານົດໄວ້, ລາຍງານໃຫ້ຮູ້ກ່ຽວກັບຜົນຂອງການປະເມີນຕີລາຂອງຊ່ຽວຊານຍີ່ປຸ່ນ ແລະ ອົດສະຕຣາລີ ຈາກນັ້ນ, ຍັງໄດ້ຂໍທິດຊີ້ນໍາ-ນໍາພາຈາກສະຫາຍ ປະທານສະພາແຫ່ງຊາດລາວ ຕື່ມອີກ ຕໍ່ກັບບັນຫາອື່ນໆທີ່ກ່ຽວກັບການກໍ່ສ້າງຫໍສະພາແຫ່ງຊາດລາວຫລັງໃໝ່.

ໂອກາດດັ່ງກ່າວ ສະຫາຍ ນາງ ປານີ ຢາທໍ່ຕູ້ ກໍໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ ສະຫາຍຮອງລັດຖະມົນຕີກະຊວງກໍ່ສ້າງ ສສ.ຫວຽດນາມ ພ້ອມດ້ວຍຄະນະ ແລະ ກ່າວຂອບໃຈທີ່ໄດ້ລາຍງານການດໍາເນີນການເຄື່ອນໄຫວກໍ່ສ້າງໂຄງການດັ່ງກ່າວ ພ້ອມທັງຕີລາຄາສູງຕໍ່ຄວາມຮັບຜິດຊອບຂອງຄະນະຮັບຜິດຊອບໂຄງການທັງລາວ ແລະ ຫວຽດນາມ ທີ່ມີຄວາມພະຍາຍາມສູງຕໍ່ຄວາມຮັບຜິດຊອບ, ຊົມເຊີຍຄະນະຮັບຜິດຊອບ, ພະນັກງານກໍ່ສ້າງທີ່ໄດ້ເອົາໃຈໃສ່ ມາຮອດປັດຈຸບັນ ຖືວ່າສໍາເລັດໄດ້ 90%  ເຊິ່ງບໍ່ພຽງແຕ່ເປັນຜົນຂອງການຮ່ວມມືຂອງສອງປະເທດເທົ່ານັ້ນ ແຕ່ມັນຈະເປັນບົດຮຽນອັນລໍ້າຄ່າໃຫ້ທັງສອງປະເທດໃນການປະຕິບັດວຽກງານຮ່ວມກັນ ຕໍ່ກັບຂໍ້ສະເໜີຂອງສະຫາຍຮອງລັດຖະມົນຕີກະຊວງກໍ່ສ້າງ ສສ.ຫວຽດນາມ ນັ້ນ ສະຫາຍປະທານສະພາແຫ່ງຊາດ ເຫັນດີຕາມທີ່ຄະນະຮັບຜິດຊອບໂຄງການທັງສອງຝ່າຍໄດ້ຕົກລົງກັນໄວ້ ແລະ ພ້ອມທັງແຈ້ງໃຫ້ຮູ້ກ່ຽວກັບການເອົາພະນັກງານສະພາແຫ່ງຊາດລາວ ໄປເຝິກອົບຮົມການບໍລິຫານ ແລະ ການນໍາໃຊ້ຫໍສະພາແຫ່ງຊາດລາວຫລັງໃຫມ່ນັ້ນ ແມ່ນໄດ້ເລືອກເຟັ້ນໄວ້ແລ້ວ.  ສ່ວນການມອບ-ຮັບໂຄງການ ແມ່ນສະເໜີໃຫ້ຂໍ້ທິດຊີ້ນໍາຈາກການນໍາທັງສອງປະເທດ.

ໃນຕອນເຊົ້າຂອງວັນດຽວກັນ ກໍໄດ້ມີການພົບປະສອງຝ່າຍ ລາວ-ຫວຽດນາມ ທີ່ໂຮງແຮມເມື່ອງແທັງ ນະຄອນຫລວງວຽງຈັນ ເຊິ່ງຝ່າຍລາວນໍາໂດຍສະຫາຍ ສົມພັນ ແພງຄໍາມີ ຮອງປະທານສະພາແຫ່ງຊາດລາວ ແລະ ຝ່າຍຫວຽດນາມ ນໍາໂດຍສະຫາຍ ເລ ກວາງ ຮຸ່ງ ຮອງລັດຖະມົນຕີກະຊວງກໍ່ສ້າງ ສສ.ຫວຽດນາມ ໂດຍມີບັນດາຄະນະຜູ້ແທນທີ່ຮັບຜິດຊອບໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ທັງສອງຝ່າຍເຂົ້າຮ່ວມ.

ໂອກາດດັ່ງກ່າວ ທັງສອງຝ່າຍໄດ້ປຶກສາຫາລືຮ່ວມກັນກ່ຽວກັບ ຜົນຂອງການເຄື່ອນໄຫວວຽກງານການກໍ່ສ້າງຫໍສະພາແຫ່ງຊາດລາວຫລັງໃໝ່ ແລະ ກໍໄດ້ຍົກບັນຫາຂຶ້ນມາແກ້ໄຂຮ່ວມກັນ ເຊັ່ນ: ບັນຫາພື້ນຖານໂຄງລ່າງ, ນໍ້າປະປາ, ເຄື່ອງສຸຂະພັນ ແມ່ນສະເໜີໃຫ້ຝ່າຍລາວເປັນຝ່າຍເລືອກ; ສ່ວນ ລິບ ແລະ ຂັ້ນໄດ ແມ່ນເຫັນດີຕົກລົງຮ່ວມກັນເອົາຍີ່ຫໍ້ ມິຊູບິຊິ; ຂະໜາດຂອງໄມ້ທີ່ຈະນໍາໃຊ້ເຮັດບານປະຕູ ແມ່ນສະເໜີໃຫ້ຝ່າຍລາວເປັນຜູ້ກໍານົດ.  ນອກຈາກນີ້, ທັງສອງຝ່າຍຍັງໄດ້ປຶກສາຫາລືກ່ຽວກັບບັນຫາອື່ນໆອີກ ໃນການປະຕິບັດການກໍ່ສ້າງຫໍສະພາແຫ່ງຊາດລາວຫລັງໃໝ່.