ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 30 ພະຈິກຜ່ານມາ, ທີ່ຫ້ອງຮັບແຂກສະພາແຫ່ງຊາດ (ສພຊ) ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ຟ້າມ ບິ່ງ ມິງ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ສສ.ຫວຽດນາມ ພ້ອມດ້ວຍຄະນະ ເນືື່ອງໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 29-30 ພະຈິກ 2020.

ໂອກາດດັ່ງກ່າວ, ສະຫາຍ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຕ້ອນຮັບອັນອົບອຸ່ນຕໍ່ສະຫາຍ ຟ້າມ ປິ່ງ ມິງ ພ້ອມທັງຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປລາວ ໃນຄັ້ງນີ້, ຕີ​ລາຄາ​ສູງ​​ຕໍ່ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ນັບມື້ນັບໄດ້ຮັບການເສີມຂະຫຍາຍໃຫ້ແຕກດອກອອກຜົນ ແລະ ເຂົ້້າສູ່ລວງເລິກໃນໄລຍະຜ່ານມາ ເຊິ່ງສະແດງອອກຄື: ເຖິງວ່າສອງປະເທດຈະປະເຊີນກັບການແຜ່ລະບາດຂອງພະຍາດໂຄວິດ-19 ເຮັດໃຫ້ການໄປມາຫາສູ່ກັນມີອຸປະສັກ, ແຕ່ການ​ນຳ​ຂັ້ນ​ສູງ ​​ລະຫວ່າງສອງ​ປະ​ເທດຍັງ ​ໄດ້​ສືບ​ຕໍ່​​ແລກປ່ຽນ​ການ​ຢ້ຽມຢາມ​ເຊິ່ງກັນ ​ແລະ ກັນ ຢ່າງ​ເປັນ​ປົກກະຕິ; ພ້ອມກັນນີ້, ຍັງໄດ້ໂທລະສັບທາງໄກນໍາກັນ ເພື່ອສືບຕໍ່ຮັດແໜ້ນສາຍພົວພັນພິເສດ ແລະ ຊຸກຍູ້ການຮ່ວມມືໃຫ້ຂະຫຍາຍຕົວ, ໄດ້ປະກອບສ່ວນເຮັດໃຫ້ມີຄວາມ​ໃກ້ຊິດກັນຫລາຍຂຶ້ນ, ມີຄວາມ​ເຂົ້າ​ອົກ​ເຂົ້າ​ໃຈ​ເຊິ່ງກັນ ແລະ ກັນ​ ແລະ ໄດ້ເຮັດໃຫ້ການພົວພັນຮ່ວມມືນັບມື້ນັບໄດ້​ຮັບ​ການ​ເສີມ​ຂະຫຍາຍ ​ແລະ ​ແຕກ​ດອກ​ອອກ​ຜົນ​ຍິ່ງ​ໆຂຶ້ນ; ພ້ອມດຽວກັນນັ້ນ, ກໍໄດ້ຝາກຄວາມຢື້ຢາມຖາມຂ່າວໄປຫາສະຫາຍ ນາງ ຫງວຽນ ທິ ກິມ ເງິນ ປະທານສະພາແຫ່ງຊາດ ສສ.ຫວຽດນາມ ແລະ ສະແດງຄວາມຊົມເຊີຍທີ່ ສສ.ຫວຽດນາມ ຫາກໍ່ສຳເລັດການຈັດກອງປະຊຸມສະໄໝສາມັນ ຄັ້ງທີ 10 ຂອງສະພາແຫ່ງຊາດ ຊຸດທີ XIV ໃນເດືອນຕຸລາ ຜ່ານມາດ້ວຍຜົນສໍາເລັດອັນຈົບງາມ; ຕີລາຄາສູງການພົວພັນການຮ່ວມມືລະຫວ່າງສອງ​ສະພາ​ແຫ່ງ​ຊາດລາວ ​ແລະ ຫວຽດນາມ ​ເຊິ່ງເວລາໃດກໍ​ໄດ້ຮັບການ​ເພີ່ມ​ພູນ​ຄູນ​ສ້າງ ແລະ ເສີມຂະຫຍາຍເຂົ້າສູ່ລວງເລິກ ບົນພື້ນຖານແຫ່ງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ເຊິ່ງທັງສອງຝ່າຍໄດ້ແລກປ່ຽນ​ການ​ຢ້ຽມຢາມ ແລະ ແລກປ່ຽນບົດຮຽນນຳກັນ ນັບ​ຕັ້ງ​ແຕ່​ການ​ນໍາ​ຂັ້ນ​ສູງ​ຂອງ​ສະພາ​ແຫ່ງ​ຊາດ ຈົນ​ເຖິງ​ວິຊາ​ການຢູ່ຂັ້ນ​ສູນ​ກາງ ​ແລະ ທ້ອງ​ຖິ່ນ; ມີ​ການຈັດ​ຕັ້ງ​ກອງ​ປະຊຸມສໍາ​ມະ​ນາ​ແລກປ່ຽນ​ບົດຮຽນ​ໃນຫົວ​ຂໍ້ວິທະຍາສາດ​ຕ່າງໆທີ່​ສອງ​ຝ່າຍ​ມີ​ຄວາມ​ສົນ​ໃຈ; ມີ​ການ​ຕິດ ຕາມ​ກວດກາ​ຮ່ວມ​ກັນ; ມີ​ການ​ສະໜັບສະໜູນເ​ຊິ່ງ​ກັນ ​ແລະ​ ກັນ ​ໃນ​ເວທີ​ລັດຖະສະພາ​ພາກ​ພື້ນ ​ແລະ ​ສາກົນ; ພິເສດ​ໃນ​ທ້າຍ​ປີ 2019 ​ແລະ​ ຕົ້ນ​ປີ 2020 ສອງ​ຝ່າຍ​​ໄດ້​ຈັດ​ຕັ້ງ​ພິທີຍ້ອງຍໍ​ປະດັບ​ຫລຽນ​ໃຫ້​ແກ່​ກົມ​ກອງ ​ແລະ ​ບຸກຄົນ ທີ່​ມີ​ຜົນງານ​ດີ​ເດັ່ນ ​ໃນ​ການ​ພົວພັນ​ຮ່ວມ​ມື ລະຫວ່າງສອງ​ສະພາ​ແຫ່ງ​ຊາດ ກໍ​ຄືການ​ປະກອບສ່ວນ​ເຂົ້າໃນການເສີມສ້າງ​ສາຍ​ພົວພັນ​ມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ​ ການ​ຮ່ວມ​ມື​ຮອບດ້ານ ລະຫວ່າງສອງ​ສະພາແຫ່ງຊາດລາວ-ຫວຽດນາມ ນັບແຕ່ ປີ 2011-2020; ພ້ອມທັງແຈ້ງໃຫ້ຊາບວ່າ: ສະພາ​ແຫ່ງ​ຊາດ ​ແຫ່ງ ສປປລາວ ຫາ​ກໍ​ສໍາ​ເລັດ​ກອງ​ປະຊຸມ​ສະ​ ໄໝ​ສາມັນ ​​ເທື່ອ​ທີ 10 ຂອງ​ສະພາ​ແຫ່ງ​ຊາດ ຊຸດ​ທີ VIII ​ໃນ​ວັນ​ທີ 17 ພະຈິກຜ່ານ​ມາ ເຊິ່ງ​ໄດ້​ດໍາ​ເນີນມາ​ເປັນ​ເວລາ 16 ວັນ; ​​ປັດຈຸບັນ, ​ແມ່ນ​ສືບ​ຕໍ່​ລົງ​ເຜີຍ​ແຜ່​ຜົນ​ສໍາ​ເລັດ​ຂອງກອງ​ປະ​ຊຸມ​ຢູ່​ບັນດາ​ທ້ອງ​ຖິ່ນ ​ແລະ​ ກະກຽມ​ໃຫ້​ແກ່​ການ​ເລືອກ​ຕັ້ງ​ສະມາຊິກ​ສະພາ​ແຫ່ງ​ຊາດຊຸດ​ທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ​ໃນຕົ້ນ​ປີ 2021.

ສະຫາຍ ຟ້າມ ປິ່ງ ມິງ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ນາງ ປານີ ຢາທໍ່ຕູ້ ທີ່ໄດ້ເສຍສະຫລະເວລາອັນມີຄຸນຄ່າຕ້ອນຮັບຢ່າງອົບອຸ່ນ ພ້ອມທັງແຈ້ງຈຸດປະສົງຂອງການເດີນທາງມາຢ້ຽມ ສປປລາວ ໃນຄັ້ງນີ້ ເພື່ອເປັນການເຂົ້າຮ່ວມກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີ ຄັ້ງທີ 7 ລະຫວ່າງສອງກະຊວງການຕ່າງປະເທດລາວ ແລະ ຫວຽດນາມ ເພື່ອທົບທວນຄືນການຮ່ວມມືສອງຝ່າຍໃນໄລຍະຜ່ານມາ ລະຫວ່າງສອງຂະແໜງການຕ່າງປະເທດ ແລະ ກອງປະຊຸມສາມັນປະຈໍາປີ ຄັ້ງທີ XXX ເພື່ອທົບທວນຄືນການຈັດຕັ້ງປະຕິບັດສັນຍາວ່າດ້ວຍການຄຸ້ມຄອງຊາຍແດນ ແລະ ດ່ານຊາຍແດນລາວ-ຫວຽດນາມ ປີ 2016 ແລະ ບົດບັນທຶກກອງປະຊຸມຜູ້ແທນຊາຍແດນລາວ-ຫວຽດນາມ ຄັ້ງທີ XXIX ໃນໜຶ່ງປີຜ່ານມາ ພ້ອມທັງແຈ້ງໃຫ້ຮູ້ກ່ຽວກັບການເຮັດວຽກຮ່ວມກັບຄະນະຮັບຜິດຊອບໂຄງການກໍ່ສ້າງຫໍສະພາແຫ່ງຊາດລາວ (ຫລັງໃໝ່).

ແຫຼ່ງຂ່າວທີ່ມາ: ສະພາແຫ່ງຊາດ