ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ຕອນເຊົ້າວັນຈັນ ທີ 10 ກັນຍາຜ່ານມາທີ່ຫ້ອງຮັບແຂກສະພາແຫ່ງຊາດ (ສພຊ) ທ່ານ ນາງ ປານີ ຢາທໍ່ຕູ້ ປະທານ ສພຊ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ປັກ ຊຸນ ຈາ ປະທານກໍາມາທິການໂຍທາທິການ ແລະ ຂົນສົ່ງສະພາແຫ່ງຊາດ ສ.ເກົາຫລີ, ປະທານຄະນະມິດຕະພາບລັດຖະສະພາ ສ.ເກົາຫລີ-ລາວ ເນື່ອງໃນໂອກາດທີ່ເດີນທາງມາຢ້ຽມຢາມ, ພົບປະເຮັດວຽກ ແລະ ມອບເຄື່ອງຊ່ວຍເຫລືອຢູ່ ສປປລາວ ລະຫວ່າງວັນທີ 8-11 ກັນຍາ 2018.

ທ່ານ ນາງ ປານີ ຢາທໍ່ຕູ້ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍ່ທ່ານ ນາງ ປັກ ຊຸນ ຈາ ພ້ອມດ້ວຍຄະນະ ທັງຕີລາຄາສູງຕໍ່ການເດີນທາງມາຢ້ຽມຢາມ ສປປລາວ ຢ່າງເປັນທັງການໃນຄັ້ງນີ້ ເຊິ່ງເປັນການຢືນຢັນສືບຕໍ່ການຮ່ວມມື ຄວາມສາມັກຄີອັນແໜ້ນແຟ້ນໃຫ້ເຂົ້າສູ່ລວງເລິກ, ມີປະສິທິຜົນ; ພ້ອມທັງຊົມເຊີຍທີ່ລັດຖະບານ ແລະ ປະຊາຊົນ ສ.ເກົາຫລີ ໄດ້ໃຫ້ການຮ່ວມມືຊ່ວຍເຫລືອ ສປປລາວ ໃນໄລຍະຜ່ານມາ ແລະ ໄດ້ນໍາເຄື່ອງຊ່ວຍເຫລືອມາມອບໃຫ້ສະພາແຫ່ງຊາດລາວ ພ້ອມທັງຮຽກຮ້ອງໃຫ້ສອງຄະນະມິດຕະພາບລັດຖະສະພາ ລາວ-ສ.ເກົາຫລີ, ສ.ເກົາຫລີ-ລາວ  ຕ້ອງໄດ້ເອົາໃຈໃສ່ຮ່ວມກັນຜັນຂະຫຍາຍການຮ່ວມມືໃຫ້ກວ້າງຂວາງກວ່າເກົ່າ ໃນຂອບເຂດຫລາຍໆຂົງເຂດ ເປັນຕົ້ນແມ່ນຂົງເຂດດ້ານການພັດທະນາເສດຖະກິດ-ສັງຄົມ, ດ້ານການດ້ານສຶກສາ ແລະ ຂົງເຂດອື່ນໆ.  ນອກຈາກນັ້ນ ທ່ານຍັງໄດ້ສະເໜີຕໍ່ທ່ານປະທານຄະນະມິດຕະພາບລັດຖະສະພາ ສ.ເກົາຫລີ-ລາວ ວ່າ: ສ.ເກົາຫລີ ມີປະສົບການ ແລະ ຜົນສໍາເລັດໃນດ້ານ SME ມາກ່ອນ ດັ່ງນັ້ນ ຈຶ່ງສະເໜີໃຫ້ມີການເອົາຊ່ຽວຊານທາງດ້ານນີ້ ຈາກ ສ.ເກົາ ມາເຝິກອົບຮົມໃຫ້ແກ່ພະນັກງານວິຊາການສະພາແຫ່ງຊາດ ສປປລາວ ທີ່ມີໜ້າທີ່ຮັບຜິດຊອບໃນຂົງເຂດເສດກິດ-ສັງຄົມ. ໃນໂອກາດດັ່ງກ່າວ ທ່ານປະທານ ສພຊ ໄດ້ຝາກຄວາມຢື້ຢາມຖາມຂ່າວເຖິງສະຫາຍປະທານ ສພຊ ສ.ເກົາຫລີ ພ້ອມທັງອວຍພອນໄຊອັນປະເສີດແກ່ປະທານຄະນະມິດຕະພາບລັດຖະສະພາ ສ.ເກົາຫລີລາວ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ ປະສົບຜົນສໍາເລັດທຸກໜ້າທີ່ວຽກງານ.

ທ່ານ ນາງ ປາກ ຊູນ ຈາ ກໍໄດ້ກ່າວສະແດງຄວາມຂອບໃຈຕໍ່ທ່ານ ນາງ ປານີ ຢາທໍ່ຕູ້ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ມີຄວາມພາກພູມໃຈຫລາຍທີ່ໄດ້ເດີນທາງມາຢ້ຽມຢາມ ສປປລາວ. ປະເທດລາວເປັນປະເທດສວຍສົດງົດງາມ;  ພ້ອມທັງແຈ້ງໃຫ້ຮູ້ວ່າ: ກ່ອນໜ້ານີ້ໄດ້ເຂົ້າຢ້ຽມຂໍ່ານັບທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສ.ປປລາວ ແລະ ໄດ້ເຂົ້າຮ່ວມພິພີມອບ-ຮັບເຄື່ອງຊ່ວຍເຫລືອຮ່ວມກັບທ່ານ ສົມພູ ດວງສະຫວັນ ປະທານຄະນະມິດຕະພາບ ລາວ-ສ.ເກົາຫລີ ແລະ ຈະນໍາເອົາຂໍ້ສະເໜີຕ່າງໆ ທີ່ທ່ານປະທານສະພາແຫ່ງຊາດລາວ ສະເໜີມານັ້ນ ນໍາໄປສະເໜີຕໍ່ປະທານສະພາແຫ່ຊາດ ສ.ເກົາຫລີ ເພື່ອນໍາໄປຄົ້ນຄວ້າພິຈາລະນາໃນການຊ່ວຍເຫລືອໃນດ້ານຕ່າງໆ, ຈະສືບຕໍ່ຮ່ວມມືຂົນຂວາຍຫາທືນຮອນຈາກບັນດາໂຄງການໃນ ສ.ເກົາຫລີ ເພື່ອຊ່ວຍເຫລືອຟື້ນຟູປະຊາຊົນຜູ້ທີ່ໄດ້ຮັບຜົນກະທົບເຂື່ອນແຕກຢູ່ແຂວງອັດຕະປື ແລະ ສືບຕໍ່ທາງດ້ານການລົງທຶນໃນການພັດທະນາເສດຖະກິດພື້ນຖານໂຄງລ່າງ, ດ້ານການສຶກສາ ແລະ ທາງດ້ານການກະຕຸກຊຸກຍູ້ແລກປ່ຽນວັດທະນາທໍາວິຖີການດໍາລົງຊີວິດຂອງພໍ່ແມ່ປະຊາຊົນສອງຊາດ ລະຫວ່າງລາວ-ສ.ເກົາຫລີ.

 

(ສອນສັກ ວັນວິໄຊ)