ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ເພື່ອປະຕິບັດໜ້າທີ່ຄວາມຮັບຜິດຊອບໃນຖານະທີ່ສະພາແຫ່ງຊາດ ແຫ່ງ ສປປລາວ ເປັນຄະນະບໍລິຫານງານຂອງເວທີປຶກສາຫາລື ລັດຖະສະພາອາຊີ-ປາຊີຟິກ (Asia-Pacific Parliamentary Forum APPF) ແລະ ເພື່ອເປັນການສະແດງທັດສະນະຂອງ ສປປລາວ ໃນເວທີສາກົນ ກໍຄືບົດບາດຂອງສະພາແຫ່ງຊາດໃນກອງປະຊຸມພິເສດ ຂອງຄະນະບໍລິຫານງານ APPF. ໃນວັນທີ 10 ພະຈິກ 2021 ທີ່ຫ້ອງປະຊຸມຄະນະປະຈໍາສະພາແຫ່ງຊາດ, ທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ (ກຕທ) ສະພາແຫ່ງຊາດ ພ້ອມດ້ວຍຄະນະໄດ້ເຂົ້າຮ່ວມກອງປະຊຸມພິເສດຂອງຄະນະບໍລິຫານງານ APPF ໃນຮູບແບບທາງໄກ ໂດຍການເປັນປະທານຂອງທ່ານ ໂທນີ ສະມິດ (Tony Smith) ປະທານລັດຖະສະພາອົດສະຕາລີ.

ກອງປະຊຸມຄັ້ງນີ້ ໄດ້ປຶກສາຫາລືກ່ຽວກັບ 3 ເນື້ອໃນຫລັກຄື: ການເປັນປະທານຂອງ APPF ທີ່ຈະດໍາລົງຕໍາແໜ່ງໃນກໍານົດເວລາ 3 ປີ; ອົງປະກອບຂອງຄະນະບໍລິຫານງານ ເພື່ອເຮັດໃຫ້ປະເທດເຈົ້າພາບຈັດກອງປະຊຸມປະຈໍາປີ ສາມາດເຂົ້າເປັນຄະນະບໍລິຫານງານຂອງ APPF ໄດ້ ແລະ ປັບປຸງພາລະບົດບາດບັນຫາ ແລະ ເນື້ອໃນທີ່ບໍ່ມີໃນລະບຽບການຂອງ APPF ໂດຍສະເພາະຂໍ້ສະເໜີໃໝ່ກ່ຽວກັບການດໍາລົງຕໍາແໜ່ງເປັນປະທານ APPF.

(ສອນສັກ ວັນວິໄຊ)