ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ເນື່ອງໃນໂອກາດວັນລັດຖະທຳມະນູນແຫ່ງຊາດ ຄົບຮອບ 30 ປີ (15/8/1991-15/812021) ທີ່ຈະມາເຖິງນີ້, ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ທັງເປັນຫົວໜ້າຄະນະຮັບຜິດຊອບສະເຫລີມສະຫລອງວັນລັດຖະທຳມະນູນແຫ່ງຊາດ ຄົບຮອບ 30 ປີ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 2 ສິງຫາ 2021 ວ່າ:
ນັບແຕ່ປີ 1986 ເປັນຕົ້ນມາ ພັກປະຊາຊົນປະຕິວັດລາວ ໄດ້ມີແນວທາງລິເລີ່ມປ່ຽນແປງໃໝ່ຢ່າງຮອບດ້ານ ມີຫລັກການ ແລະ ຜ່ານການປະຕິບັດແນວທາງປ່ຽນແປງໃໝ່ດັ່ງກ່າວ ຊີວິດ ສັງຄົມ ໄດ້ເລັ່ງທວງໃຫ້ພັກ ແລະ ລັດເຮົາ ຕ້ອງຍົກລະດັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂຶ້ນສູ່ລະດັບໃໝ່ ດ້ວຍການຫັນຈາກການຄຸ້ມຄອງດ້ວຍມະຕິ, ຄໍາສັ່ງແບບບໍລິຫານມາເປັນການຄຸ້ມຄອງຕາມລັດຖະທຳມະນູນ ແລະ ກົດໝາຍ. ຍ້ອນແນວນັ້ນ, ສະພາປະຊາຊົນສູງສຸດ ຊຸດທີ II ໃນຖານະເປັນສະພາຮ່າງລັດຖະທຳມະນູນທີ່ໄດ້ຮັບການເລືອກຕັ້ງຂຶ້ນໃນປີ 1989 ໂດຍມີຄະນະກຳມະການຮ່າງລັດຖະທຳມະນູນແຫ່ງຊາດເປັນເສນາທິການ ຈຶ່ງໄດ້ດຳເນີນການຄົ້ນຄວ້າ ແລະ ສ້າງຮ່າງລັດຖະທຳມະນູນ ຈົນມາເຖິງກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນສູງສຸດ ຊຸດທີ II ໃນວາລະປະຊຸມວັນທີ 14 ສິງຫາ 1991 ຈຶ່ງໄດ້ຮັບຮອງເອົາລັດຖະທຳມະນູນ ສະບັບທຳອິດ ແຫ່ງ ສປປລາວ ແລະ ຕໍ່ມາປະທານປະເທດ ແຫ່ງ ສປປລາວ ກໍໄດ້ອອກລັດຖະດຳລັດ ສະບັບເລກທີ 55/ປທປທ, ລົງວັນທີ 15 ສິງຫາ 1991 ວ່າດ້ວຍການປະກາດໃຊ້ລັດຖະທຳມະນູນ ແຫ່ງ ສປປລາວ ສະບັບທຳອິດຢ່າງເປັນທາງການ.
ໃນດ້ານຄວາມໝາຍຂອງລັດຖະທຳມະນູນ ແຫ່ງ ສປປລາວ ແມ່ນການຫັນແນວທາງປ່ຽນແປງໃໝ່ຮອບດ້ານ ມີຫລັກການຂອງພັກ ມາເປັນກົດໝາຍພື້ນຖານຂອງລັດເຮົາ ຫລື ກົດໝາຍແມ່ ຂອງລະບອບປະຊາທິປະໄຕປະຊາຊົນ ເຊິ່ງກຳນົດກ່ຽວກັບລະບອບການເມືອງ, ລະບອບເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ, ສິດ ແລະ ພັນທະພື້ນຖານຂອງພົນລະເມືອງລາວ, ການຈັດຕັ້ງລະບົບອຳນາດແຫ່ງລັດຂັ້ນຕ່າງໆ ຂອງລະບອບປະຊາທິປະໄຕປະຊາຊົນ  ພາສາ, ເຄື່ອງໝາຍຊາດ, ເພັງຊາດ, ທຸງຊາດ, ສະກຸນເງິນ ແລະ ນະຄອນຫລວງ ເຊິ່ງເປັນເຄື່ອງມືພື້ນຖານໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຂອງລັດເຮົາ ແນໃສ່ຮັບປະກັນໃຫ້ປະເທດຊາດມີສະຖຽນລະພາບດ້ານການເມືອງຢ່າງໝັ້ນທ່ຽງ, ສັງຄົມມີຄວາມສະຫງົບ, ປອດໄພ ແລະ ເປັນລະບຽບຮຽບຮ້ອຍ, ທັງເປັນພື້ນຖານໃຫ້ແກ່ການພັດທະນາກົດໝາຍຂອງປະເທດເຮົາໃຫ້ເປັນລະບົບ, ຄົບຊຸດ ແລະ ເຂັ້ມແຂງຂຶ້ນເທື່ອລະກ້າວ, ຮັບປະກັນໃຫ້ແກ່ການປົກປັກຮັກສາ ແລະ ສ້າງສາປະເທດຊາດ ໄປຕາມຈຸດໝາຍສັງຄົມນິຍົມທີ່ພັກເຮົາໄດ້ກຳນົດໄວ້.
ລັດຖະທຳມະນູນ ແຫ່ງ ສປປລາວ ແມ່ນໝາກຜົນລວມຍອດຂອງການປະຕິວັດຊາດ-ປະຊາທິປະໄຕປະຊາຊົນ ພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ແມ່ນຜົນງານອັນໃຫຍ່ຫລວງຂອງປະຊາຊົນລາວບັນດາເຜົ່າ ໃນພາລະກິດຕໍ່ສູ້ກູ້ຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດ ກໍຄືພາລະກິດປ່ຽນແປງໃໝ່ຮອບດ້ານ ມີຫລັກການຂອງພັກເຮົາ ເປັນການຢືນຢັນເຖິງຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດຕໍ່ສາກົນ; ທັງສ່ອງແສງຢ່າງຈະແຈ້ງ ແລະ ຄົບຖ້ວນ ເຖິງຄວາມມຸ່ງມາດປາຖະໜາອັນແຮງກ້າ ແລະ ຄວາມຕັດສິນໃຈຢ່າງເດັດດ່ຽວຂອງວົງຄະນະຍາດແຫ່ງຊາດລາວ ເພື່ອພ້ອມກັນສູ້ຊົນບຸກບືນສ້າງລັດເຮົາໃຫ້ເປັນລັດທີ່ປົກຄອງດ້ວຍກົດໝາຍຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນຢ່າງແທ້ຈິງ ແນໃສ່ບັນລຸຈຸດໝາຍ “ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ,  ສັງຄົມມີຄວາມສາມັກຄີເປັນປຶກແຜ່ນ, ມີປະຊາທິປະໄຕ, ຍຸຕິທຳ ແລະ ສີວິໄລ”.
ທ່ານໄດ້ກ່າວຕື່ມວ່າ: ໃນໂອກາດສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ວັນທີ 15 ສິງຫາ 2021 ນີ້, ຕາງໜ້າໃຫ້ຄະນະຮັບຜິດຊອບຂໍຮຽກຮ້ອງມາຍັງອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ສະຫະພັນນັກຮົບເກົ່າ, ຊາວຕ່າງດ້າວທີ່ປະຈໍາຢູ່ ສປປລາວ ແລະ ປະຊາຊົນບັນດາເຜົ່າ  ໃນຂອບເຂດທົ່ວປະເທດ ຈົ່ງເຊີດຊູສະຕິການເຄົາລົບ, ການປະຕິບັດລັດຖະທໍາມະນູນ ແລະ ກົດໝາຍ,  ຕັ້ງໜ້າ ແລະ ເປັນເຈົ້າການເຂົ້າຮ່ວມໃນຂະບວນການສ້າງລັດປະຊາທິປະໄຕ ປະຊາຊົນ ໃຫ້ໜັກແໜ້ນ ແລະ ເຂັ້ມແຂງຍິ່ງໆຂຶ້ນ, ສ້າງການຫັນ ປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ ເພື່ອຈັດຕັ້ງປະຕິບັດສໍາເລັດບັນດາຄາດໝາຍໃຫຍ່ທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ.

ແຫຼ່ງຂ່າວທີ່ມາ: ສະພາແຫ່ງຊາດ