ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 15 ທັນວາ ຜ່ານມາ, ທີ່ສະໂມສອນເມືອງນໍ້າບາກ ແຂວງຫລວງພະບາງ; ທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງນໍ້າບາກ; ໂດຍການຕ້ອນຮັບຂອງທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງຫລວງພະບາງ, ເຂົ້າຮ່ວມມີບັນດາທ່ານການນໍາຂອງເມືອງ, ຫ້ອງການອ້ອມຂ້າງເມືອງ ພ້ອມດ້ວຍພາກສ່ວນທີ່ກ່ຽວຂ້ອງ.

ໃນພິທີ, ທ່ານ ສົມຫວັງ ພອນຄໍາວົງສາ ເຈົ້າເມືອງເມືອງນໍ້າບາກ ໄດ້ລາຍງານສະພາບການຈັດຕັ້ງປະຕິບັດວຽກງານຮອບດ້ານ ແລະ ກະກຽມການເລືອກຕັ້ງສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ II ເຊິ່ງທ່ານໄດ້ໃຫ້ຮູ້ເຖິງສະພາບລວມໂດຍຫຍໍ້ຂອງເມືອງ, ທ່າແຮງ, ຂໍ້ສະດວກ ແລະ ຂໍ້ຫຍຸ້ງຍາກໃນຫລາຍດ້ານ; ພ້ອມດຽວກັນນັ້ນ, ກໍໄດ້ໃຫ້ຮູ້ເຖິງການກະກຽມການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ເປັນຕົ້ນຈັດຕັ້ງການເຜີຍແຜ່, ເຊື່ອມຊຶມໃຫ້ພະນັກງານຫລັກແຫລ່ງ ພາຍໃນເມືອງໄດ້ຮັບຮູ້ ແລະ ເຂົ້າໃຈ ພ້ອມທັງໄດ້ແນະນຳວິທີການລົງເກັບກຳຂໍ້ມູນຜູ້ມີສິດປ່ອນບັດເລືອກຕັ້ງ ໃຫ້ແກ່ພະນັກງານທີ່ຈະຮັບຜິດຊອບແຕ່ລະໜ່ວຍປ່ອນບັດໄດ້ 2 ຊຸດ; ນອກຈາກນັ້ນ, ກໍໄດ້ສຳເລັດການອອກນິຕິກໍາຕ່າງໆ ຂອງຄະນະກໍາມະການເລືອກຕັ້ງຂັ້ນເມືອງຫລາຍສະບັບ ແລະ ໄດ້ສຳເລັດວຽກງານດ້ານບຸກຄະລາກອນ, ອຸປະກອນຮັບໃຊ້ ແລະ ວຽກງານອື່ນໆ.

ໃນໂອກາດທີ່ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງນໍ້າບາກໃນຄັ້ງນີ້, ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ ແລະ ເນັ້ນໜັກບາງບັນຫາທີ່ຈະຕ້ອງໄດ້ເອົາໃນໃຈໃສ່ໃນຕໍ່ໜ້າ ເຊິ່ງມີບາງເນື້ອໃນດັ່ງນີ້: ໃຫ້ເອົາໃຈໃສ່ສ້າງບຸກຄະລາກອນສືບທອດປ່ຽນແທນ, ຫັນເປັນໜຸ່ມ, ໜັກແໜ້ນ, ມີຄວາມຮູ້ຄວາມສາມາດ ແລະ ຕ້ອງເລີ່ມສ້າງຈາກຮາກຖານທ້ອງຖິ່ນ; ພ້ອມນັ້ນ, ທ່ານຍັງໄດ້ໃຫ້ທິດຊີ້ນໍາ ໂດຍໄດ້ເນັ້ນໜັກໃຫ້ເພີ່ມທະວີການຜະລິດ ເພື່ອສ້າງລາຍຮັບ ໃຫ້ສາມາດກຸ້ມຕົນເອງຫລາຍຂຶ້ນກວ່າເກົ່າ ເປັນຕົ້ນ ດ້ານກະສິກໍາປູກຝັງ ແລະ ລ້ຽງສັດ, ປັບປຸງພື້ນຖານແຫລ່ງທ່ອງທ່ຽວ ເພື່ອດຶງດູດການລົງທຶນຈາກພາຍໃນ ແລະ ຕ່າງປະເທດ; ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມ, ບໍ່ໃຫ້ຖືເບົາໃນການແກ້ໄຂ ແລະ ສະກັດກັ້ນຕ້ານພະຍາດໂຄວິດ-19; ພ້ອມດຽວກັນນັ້ນ, ທ່ານຍັງໄດ້ເນັ້ນຕື່ມອີກວ່າ: ໃນວຽກງານກະກຽມການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ສະເໜີໃຫ້ຄະນະກໍາມະການເລືອກຕັ້ງຂັ້ນເມືອງ ຮີບຮ້ອນຈັດຕັ້ງຜັນຂະຫຍາຍແຜນດຳເນີນງານຂອງຕົນເອງ ເປັນຕົ້ນ ເຜີຍແຜ່, ເຊື່ອມຊຶມ ມະຕິຂອງພັກກ່ຽວກັບການເພີ່ມທະວີການຊີ້ນໍາ-ນຳພາ ແລະ ບັນດາເອກະສານອື່ນໆທີ່ກ່ຽວຂ້ອງ ໃຫ້ບັນດາພະນັກງານລັດຖະກອນ ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈຢ່າງຈະແຈ້ງ ພ້ອມທັງການເກັບກໍາສະຖິຕິຜູ້ມີສິດປ່ອນບັດເລືອກຕັ້ງ ແລະ ໜ່ວຍປ່ອນບັດເລືອກຕັ້ງ.

ແຫຼ່ງຂ່າວທີ່ມາ: ສະພາແຫ່ງຊາດ