ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ຕອນເຊົ້າວັນທີ 24 ກຸມພາ 2018, ທີ່ສະພາແຫ່ງຊາດ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ບັອບ ກູດເລັດ (Bob Goodlatte) ປະທານກໍາມາທິການຕຸລາການ ລັດຖະສະພາສະຫະລັດອາເມລິກາ (ສ.ອາເມລິກາ) ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 23-25 ກຸມພາ 2018.

ໃນ​ການຕ້ອນຮັບຄັ້ງ​ນີ້, ທ່ານ ນາງ ປານີ ຢາ​ທໍ່ຕູ້ ​​ໄດ້ສະ​ແດງ​ຄວາມ​ຍິນ​ດີ​ຕ້ອນຮັບທ່ານ ບັອບ ກູດເລັດ​ ດ້ວຍຄວາມຈິງໃຈທີ່​ໄດ້ມາຢ້ຽມຢາມ​ ສປປລາວ ​ຄັ້ງ​ນີ້ ​ເຊິ່ງມີ​ຄວາມ​ໝາຍ​ສຳຄັນ ແລະ ຖື​ວ່າ​ເປັນ​ນິມິ​ດໝາຍ​ທີ່​ດີ​ໃຫ້​ແກ່​ການ​ເສີມ​ຂະຫຍາຍ​ການ​ພົວພັນ​ຮ່ວມ​ມື​ ລະຫວ່າງ​ ສປປລາວ ​ແລະ ສ.ອາ​ເມ​ລິ​ກາ ​ໂດຍ​ສະ​ເພາະ​ລະຫວ່າງ​ສະພາ​ແຫ່ງ​ຊາດ​ສປປລາວ ​ແລະ ລັດຖະສະພາ​ ສ.ອາ​ເມ​ລິ​ກາ ພາຍ​ຫລັງ​ທີ່​ໄດ້​ມີ​ການ​ຍົກ​ລະດັບ​ການ​ພົວພັນ​ຮ່ວມ​ມືລາວ-ອາ​ເມ​ລິ​ກາ​ ​ເປັນ “ຄູ່​ຮ່ວມ​ມືແບບ​ກວມລວມ” ນໍາກັນ ​ໃນ​ປີ 2016 ​ໃນ​ໂອກາດ​ການ​ຢ້ຽມຢາມ​ຄັ້ງ​ປະຫວັດສາດ​ຂອງ​ທ່ານ ບາຣັກ ​ໂອ​ບາ​ມາ ປະທານາທິບໍດີ ສ.ອາ​ເມ​ລິ​ກາ ໃນໄລຍະນັ້ນ; ພ້ອມ​ນັ້ນ, ທ່ານປະທານ​ສະພາ​ແຫ່ງ​ຊາດ ຍັງ​ໄດ້ຕີ​ລາຄາ​ສູງ​ຕໍ່​ການ​ພົວພັນ​ຮ່ວມ​ມື​ລາວ-ອາ​ເມ​ລິ​ກາ ທີ່​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ​ເທື່ອ​ລະ​ກ້າວ ​ເຊິ່ງລັດຖະບານ ແຫ່ງ ສປປລາວ ​ກໍ​ໄດ້​ປະຕິບັດນະໂຍບາຍດ້ານ​ມະນຸດສະທຳຂອງ​ຕົນ​ ຕໍ່​ປະຊາຊົນ​ອາ​ເມ​ລິ​ກາ ໂດຍ​ສະ​ເພາະ​ຕໍ່​ຄອບຄົວ​ຂອງ​ທະຫານ​ອາ​ເມ​ລິ​ກາ​ທີ່​ຫາຍ​ສາບ​ສູນ​ຢູ່​ລາວ​ໃນ​ປາງ​ສົງຄາມ ​ໂດຍ​ໄດ້ອະນຸຍາດ​ໃຫ້​ທະຫານ​ອາ​ເມ​ລິ​ກາ ເຂົ້າມາດໍາເນີນ​ການ​ຂຸດ​ຄົ້ນ​ຊອກ​ຫາ​ຊາກ​ສົບ​ຂອງ​ທະຫານ​ອາ​ເມ​ລິ​ກາທີ່​ຫາຍ​ສາບ​ສູນຢູ່ລາວ​ໃນ​ປາງ​ສົງຄາມ. ສຳລັບການ​ມາ​ຢ້ຽມຢາມຂອງ​ທ່ານ ບັອບ ກູດເລັດ ພ້ອມ​ດ້ວຍ​ຄະນະ​​ຄັ້ງ​ນີ້ ຍັງ​ເປັນ​ການ​ສືບຕໍ່ເສີມ​ຂະຫຍາຍສາຍ​ພົວພັນ​ມິດຕະພາບ ແລະ ການຮ່ວມມື ລະຫວ່າງສອງປະເທດ ​ທັງເປັນ​ບາດກ້າວ​ເລີ່​ມຕົ້ນ​ອັນ​ສຳຄັນ​ໃນ​ການ​ເສີມ​ຂະຫຍາຍ​ການ​ພົວພັນ​ຮ່ວມ​ມື ລະຫວ່າງ​ອົງການ​ນິຕິ​ບັນ​ຍັດ​ຂອງ​ສອງ​ປະ​ເທດ​ ສປປລາວ ແລະ ສ.ອາ​ເມ​ລິ​ກາ. ​ໃນ​ໂອກາດ​ດັ່ງກ່າວ, ທ່ານປະທານສະພາແຫ່ງຊາດຍັງ​ໄດ້​ສະ​ແດງ​ຄວາມ​ຂອບ​ໃຈຕໍ່​ລັດຖະບານ​, ລັດຖະສະພາ ​ແລະ ປະຊາຊົນ​ອາ​ເມ​ລິ​ກາ ທີ່​ໃຫ້ການ​ສະໜັບສະ​ໜູນຊ່ວຍ​ເຫລືອ ສປປລາວ ​ໃນ​ການ​ເກັບ​ກູ້​ລະ​ເບີດ​ບໍ່​ທັນ​ແຕກ ທີ່​ຕົກ​ຄ້າງ​ແຕ່​ສະ​ໄໝ​ສົງຄາມ, ການ​ຊ່ວຍ​ເຫລືອ​ດ້ານ​ການ​ສຶກສາ, ສາທາລະນະ​ສຸກ ​ແລະ ຂະ​ແໜງ​ການ​ອື່ນໆ​ຢູ່ ສປປລາວ.

ທ່ານ ບັອບ ກູດເລັດ ໄດ້ສະ​ແດງ​ຄວາມ​ຂອບ​ໃຈ​ຕໍ່​ການ​ຕ້ອນຮັບອັນ​ອົບ​ອຸ່ນ​ຈາກ​ທ່ານ​ປະທານ​ສະພາ​ແຫ່ງ​ຊາດ

ພ້​ອມ​ດ້ວຍ​ຄະນະ ທັງ​​ແຈ້ງຈຸດ​ປະສົງ​ໂດຍ​ສັງ​ເຂ​ບຂອງ​ການ​ມາ​ຢ້ຽມຢາມ ​ແລະ ​ເຮັດ​ວຽກ​ທີ່ ສປປລາວ ຄັ້ງ​ນີ້ ​ໂດຍ​ສະ​ເພາະ​ແມ່ນ​ຜົນ​ຂອງການ​ພົບ​ປະ​ກັບ​ທ່ານ​ ເອກສະຫວ່າງ ວົງວິຈິດ ປະທານ​ກໍາມາ​ທິການ​ການຕ່າງປະເທດ ສະພາແຫ່ງຊາດ ພ້ອມ​ດ້ວຍ​ຄະນະ ​ເຊິ່ງທັງ​ສອງ​ຝ່າຍ​ໄດ້​ມີ​ການ​ປຶກສາ​ຫາລືຫລາຍ​ບັນ​ຫາສຳຄັນ​ ເພື່ອເສີມຂະຫຍາຍການຮ່ວມມືໃນຕໍ່ໜ້າ.

ກ່ອນໜ້າ​ນີ້​ໃນ​ວັນ​ດຽວ​ກັນ ທີ່​ສະພາ​ແຫ່ງ​ຊາດ, ການ​ພົບ​ປະສອງ​ຝ່າຍລະ​ຫວ່າງສະພາ​ແຫ່ງ​ຊາດ​ ສປປລາວ ນໍາໂດຍທ່ານ​ ເອກສະຫວ່າງ ວົງວິຈິດ ປະທານກໍາມາທິການການຕ່າງປະເທດ ສະພາແຫ່ງຊາດ ແລະ ລັດຖະສະພາ​ ສ.ອາ​ເມ​ລິ​ກາ ນໍາ​ໂດຍ​ທ່ານ ບັອບ ກູດເລັດ (Bob Goodlatte) ປະທານກໍາມາທິການຕຸລາການລັດຖະສະພາສະຫະລັດອາເມລິກາ ​ ເຊິ່ງທັງ​ສອງ​ຝ່າຍ​ໄດ້​​​ປຶກສາ​ຫາລື​ຮ່ວມ​ກັນ​ກ່ຽວ​​ກັບການ​ພົວພັນ​ຮ່ວມ​ມື​​ດ້ານ​ການ​ຄ້າ, ການ​ລົງທຶນ ​ແລະ ການ​ຮ່ວມ​ມື​ໃນ​ຂະ​ແໜງ​ການ​ຕ່າງໆ. ​​​ໂອກາດດັ່ງກ່າວ, ຝ່າຍ​ສະພາ​ແຫ່ງ​ຊາດລາວ ​ໄດ້​ແລກປ່ຽນ ​ແລະ ສະ​ເໜີ​ໃຫ້ຝ່າຍ ສ.ອາ​ເມ​ລິ​ກາ ສືບຕໍ່ໃຫ້​ການ​ຊ່ວຍ​ເຫລືອ​ໃນ​ໂຄງການ​ເກັບ​ກູ້​ລະ​ເບີດ​ບໍ່​ທັນ​ແຕກຢູ່ ສປປລາວ; ນອກນັ້ນ, ຍັງໄດ້ສະ​ເໜີ​ໃຫ້ລັດຖະສະພາ ສ.ອາ​ເມ​ລິ​ກາ​ ພິຈາລະນາບັນຫາການໃຫ້ສິດພິເສດດ້ານການຄ້າ ໃຫ້ແກ່ ສປປລາວ, ການ​ຮ່ວມ​ມື​ລະ​ຫວ່າງ​ສະພາ​ແຫ່ງ​ຊາດ​ ສປປລາວ ​ແລະ ລັດຖະສະພາ ສ.ອາ​ເມ​ລິ​ກາ ​ໂດຍ​ຜ່ານ​ກົນ​ໄກ​ຄະນະ​ມິດຕະພາບ​ລັດຖະສະພາ ແລະ ບັນຫາອື່ນໆທີ່ເປັນຜົນປະໂຫຍດແກ່ສອງປະເທດ ກໍຄືປະຊາຊົນສອງຊາດ.

ຕອນເຊົ້າຂອງວັນດຽວກັນ, ​ ຄະນະ​ຜູ້ລັດຖະສະພາ​ ສ.ອ​າ​ເມ​ລິ​ກາ ເຂົ້າ​ຢ້ຽມ​ຂ່ຳນັບ​ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປລາວ ​ແລະ ​​ໄດ້​ເຂົ້າ​ພົບ​ປະ​ກັບ​ທ່ານ ສະ​ເຫຼີ​ມ​ໄຊ ກົມມະ​ສິດ ລັດຖະມົນຕີ​ກະຊວງ​ການ​ຕ່າງປະ​ເທດອີກດ້ວຍ.

(ບຸນເກີດ ວົງໄຊຍາ)