ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ຕອນບ່າຍວັນທີ 15 ກັນຍາຜ່ານມາ ທີ່ຫ້ອງຮັບແຂກສະພາແຫ່ງຊາດ, ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ເອນມາ ມາມມາເດຍຣົບ (Elmar Mammadyarov) ລັດຖະມົນຕີກະຊວງການຕ່າງປະເທດ ແຫ່ງສາທາລະນະລັດອາແຊັກໄບຊານ ພ້ອມດ້ວຍຄະນະ ໂອກາດທີ່ມາຢ້ຽມຢາມ ສປປລາວ ຢ່າງເປັນທາງການ ລະຫວ່າງວັນທີ 15-16 ກັນຍາ 2017.

ໃນການຢ້ຽມຂ່ຳນັບ, ທ່ານ ເອນມາ ມາມມາເດຍຣົບ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການພົວພັນຮ່ວມມືລະຫວ່າງອາແຊັກໄບຊານ-ລາວ ໃນເມື່ອກ່ອນ ກໍຄືປັດຈຸບັນ ພ້ອມທັງແຈ້ງຈຸດປະສົງຂອງການມາຢ້ຽມຢາມ ສປປລາວ ໃນຄັ້ງນີ້ ແມ່ນຈະໄດ້ລົງນາມບົດບັນທຶກຄວາມເຂົ້າໃຈລະຫວ່າງສອງກະຊວງການຕ່າງປະເທດລາວ ແລະ ອາແຊັກໄບຊານ ວ່າດ້ວຍການສ້າງຕັ້ງປຶກສາຫາລື ແລະ ການຮ່ວມມື. ທ່ານໄດ້ສະແດງຄວາມຂອບໃຈຕໍ່ ສປປລາວ ທີ່ໄດ້ສະໜັບສະໜຸນ ສ.ອາແຊັກໄບຊານໃນການສະໝັກເລືອກຕັ້ງເປັນສະມາຊິກອົງການຕ່າງໆ ໃນຂອບອົງການສະຫະປະຊາຊາດໃນໄລຍະຜ່ານມາ; ພ້ອມນັ້ນ, ໄດ້ແຈ້ງໃຫ້ຊາບຕື່ມວ່າ ອາແຊັກໄບຊານຍັງພິຈາລະນາໃຫ້ທຶນການສຶກສາແກ່ ສປປລາວ; ໃນໂອກາດນີ້, ທ່ານໄດ້ມີຄຳເຫັນສະເໜີໃຫ້ສືບຕໍ່ເພີ່ມທະວີການຮ່ວມມືດ້ານເສດຖະກິດ-ການຄ້າ, ການລົງທຶນ, ການສຶກສາ, ກະສິກຳການທ່ອງທຽວ ແລະ ດ້ານອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນຕື່ມອີກ.

ທ່ານ ບຸນປອນ ບຸດຕະນະວົງ ສະແດງຄວາມຍິນດີຕ້ອນຮັບທ່ານ ເອນມາ ມາມມາເດຍຣົບ ພ້ອມດ້ວຍຄະນະ ທີ່ມາຢ້ຽມຢາມ ສປປລາວ ໃນຄັ້ງນີ້ ເຊິ່ງເປັນໂອກາດທີ່ມີຄວາມໝາຍສຳຄັນຫລາຍໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອດີງາມລະຫວ່າງສອງປະເທດລາວ-ອາແຊັກໄບຊານ ໃຫ້ກ້າວຂຶ້ນສູ່ລະດັບໃໝ່ ບົນພື້ນຖານຄວາມເຂົ້າອົກເຂົ້າໃຈເຊິ່ງກັນ ແລະ ກັນ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ; ທ່ານຮອງປະທານສະພາແຫ່ງຊາດ ຍັງໄດ້ສະແດງຄວາມຂອບໃຈຕໍ່ການຊ່ວຍເຫລືອຂອງອາແຊັກໄບຊານໃນຂອບການຮ່ວມມືຫລາຍຝ່າຍ ກໍຄືໃນພາກພື້ນ, ສາກົນ ແລະ ສະຫະປະຊາຊາດ ເຊິ່ງ 2 ປະເທດມີການແລກປ່ຽນການສະໜັບສະໜູນເຊິ່ງກັນ ແລະ ກັນຕະຫລອດມາ, ສະແດງຄວາມຍິນດີທີສອງກະຊວງການຕ່າງປະເທດລາວ ແລະ ອາແຊັກ ໄບຊານ ຈະໄດ້ພົບປະເຈລະຈາເປັນຄັ້ງທີ 2 ໃນປີ 2017 ແລະ ອວຍພອນໃຫ້ສອງຝ່າຍໄດ້ຮັບຜົນ ສຳເລັດ ແລະ ນຳຜົນປະໂຫຍດມາສູ່ການພົວພັນສອງຝ່າຍຍິ່ງໆຂຶ້ນ; ພ້ອມນີ້, ກໍໄດ້ສະເໜີໃຫ້ລັດຖະ ບານອາແຊັກໄບຊານຊຸກຍູ້ນັກທຸລະກິດຂອງຕົນເຂົ້າມາສຶກສາຄວາມເປັນໄປໄດ້ໃນການມາລົງທຶນ ຫລືເຮັດທຸລະກິດ ຢູ່ ສປປລາວ ໃນຂະແໜງພະລັງງານ, ບໍ່ແຮ່, ອຸດສາຫະກຳປຸງແຕ່ງ, ທ່ອງທ່ຽວ, ການຜະລິດກະສິກຳ ແລະ ອື່ນໆຕື່ມອີກ.

(ສອນສັກ ວັນວິໄຊ)