ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ເພື່ອຮັບປະກັນໃຫ້ແກ່ການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ໄດ້ດໍາເນີນໄປຕາມຂັ້ນຕອນ ຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການສ້າງນິຕິກຳ ທັງຮັບປະກັນໃຫ້ການຄົ້ນຄວ້າເນື້ອໃນຂອງຮ່າງກົດ   ໝາຍ, ການຈັດຕັ້ງທາບທາມໃຫ້ກວ້າງຂວາງ ແລະ ທັນຕາມ ແຜນການທີ່ວາງໄວ້; ກຳມາທິການຍຸຕິທຳ (ກມຍທ) ສະພາແຫ່ງຊາດ (ສພຊ) ໄດ້ຈັດກອງປະຊຸມທາບທາມການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກຂຶ້ນ ທີ່ເມືອງວັງວຽງ ແຂວງວຽງຈັນ ໃນວັນທີ 17 ກັນຍາ 2021, ໂດຍການເປັນປະທານຂອງທ່ານ ສຈ.ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນຜູ້ຊີ້ນຳ ກມຍທ, ເຂົ້າຮ່ວມມີທ່ານ ຄຳແພງ ວິລະພັນ ປະທານ ກມຍທ, ມີຮອງປະທານກຳມາການ, ຕາງໜ້າຈາກສະພາປະຊາຊົນແຂວງ 4 ແຂວງຄື: ນະຄອນຫລວງວຽງຈັນ, ວຽງຈັນ, ໄຊຍະບູລີ ແລະ ອຸດົມໄຊ; ຕາງໜ້າອົງການໄອຍະການປະຊາຊົນແຂວງ, ສານປະຊາຊົນແຂວງ, ພະແນກຍຸຕິທຳແຂວງ, ກອງບັນຊາການ ປກສ ແຂວງ ແລະ ແຂກຖືກເຊີນເຂົ້າຮ່ວມຢ່າງພ້ອມພຽງ.

ທ່ານ ສຈ.ປອ ຈະເລີນ ເຍຍປາວເຮີ ໄດ້ມີຄຳເຫັນກ່າວເປີດກອງປະຊຸມວ່າ: ເພື່ອເປັນການຈັດຕັ້ງຜັນຂະຫຍາຍບັນດາມະຕິຄຳສັ່ງຂອງຄະນະບໍລິຫານງານສູນກາງພັກ, ແຜນການສ້າງ ແລະ ປັບປຸງກົດໝາຍຂອງສະພາແຫ່ງຊາດ 5 ປີ (2021-2025) ກໍຄືການປັບປຸງກົດໝາຍວ່າດ້ວຍການແກ້ໄຂຄໍາຮ້ອງຂໍຄວາມເປັນທໍາ ໃຫ້ມີການຫັນປ່ຽນຢ່າງຕັ້ງໜ້າ, ຮັບປະກັນຄວາມຖືກຕ້ອງສອດຄ່ອງຕາມສິດ ແລະ ໜ້າທີ່ຂອງແຕ່ລະອົງການ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ. ທ່ານຍັງໄດ້ຮຽກຮ້ອງມາຍັງບັນດາຜູ້ເຂົ້າຮ່ວມກອງປະຊຸມ ຈົ່ງໄດ້ເຊີດຊູ ແລະ ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ສຸມໃສ່ຄົ້ນຄວ້າ ແລະ ປະກອບຄຳຄິດຄຳເຫັນ ຢ່າງຖືກຕ້ອງ, ພາວະວິໄສ ເພື່ອເຮັດໃຫ້ກອງປະຊຸມຄັ້ງນີ້ ບັນລຸຜົນສຳເລັດຕາມລະດັບຄາດໝາຍທີ່ວາງໄວ້.

ກອງປະຊຸມ ໄດ້ຮັບຟັງການສະເໜີບົດແລກປ່ຽນກົນໄກການຮັບ ແລະ ພິຈາລະນາຄຳຮ້ອງຂໍຄວາມເປັນທຳ; ການສະເໜີບົດເນື້ອໃນການປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ ພາກທີ I, ພາກທີ II, ພາກທີ III, ພາກທີ IV, ພາກທີ VII ແລະ ພາກທີ VIII. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ສຸມສະຕິປັນຍາປະກອບຄຳຄິດຄຳເຫັນເຂົ້າໃນການປັບປຸງກົດໝາຍດັ່ງກ່າວ ໃຫ້ມີເນື້ອໃນຄົບຖ້ວນ, ສົມບູນ ແລະ ສອດຄ່ອງກັບແນວທາງນະໂຍບາຍຂອງພັກໃນການຄຸ້ມຄອງເສດຖະກິດ-ສັງຄົມ ຕາມກົດໝາຍ ສອດຄ່ອງຕາມພາລະບົດບາດ, ສິດ ແລະ ໜ້າທີ່ ຂອງບັນດາອົງການລັດ ທີ່ມີຄວາມຮັບຜິດຊອບໃນການແກ້ໄຂຄຳຮ້ອງທຸກ.

ກອງປະຊຸມຈະໄດ້ດຳເນີນເປັນເວລາ 2 ວັນ ຈົນຮອດວັນທີ 18 ກັນຍາ 2021 ຈຶ່ງຈະສຳເລັດ.

(ກົງທະນູຄໍາ ພິພັດເສລີ)