ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

      (ສພຊ) ໃນວັນທີ 15 ພະຈິກ 2021 ທີ່ຫໍສະພາແຫ່ງຊາດ (ສພຊ),ນະຄອນຫຼວງວຽງຈັນ ທ່ານ ໄຊສົມພອນ ພົມວິຫານ ປະທານ ສພຊ ແລະ ທ່ານ ຈັນທະໜອມ ພົມມະນີ ປະທານຄະນະຜູ້ບໍລິຫານງານທະນາຄານພັດທະນາລາວ ພ້ອມດ້ວຍຄະນະບໍລິຫານຂອງທັງສອງຝ່າຍ ໄດ້ເຂົ້າຮ່ວມເປັນສັກຂີພິຍານ ໃນພິທີມອບ-ຮັບ ພາຫະນະ, ວັດຖຸອຸປະກອນ ແລະ ເງິນຊຸກຍູ້ ໃຫ້ແກ່ ສພຊ ເຊິ່ງຕາງໜ້າກ່າວມອບໂດຍທ່ານ ລິດສະໝີ ລາດຊະວົງຜູ້ອຳນວຍການໃຫຍ່ ທະນາຄານພັດທະນາລາວ ແລະ ຕາງໜ້າກ່າວຮັບໂດຍທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ.

           ທະນາຄານພັດທະນາລາວ ໄດ້ມອບາຫະນະ, ວັດຖຸອຸປະກອນ ແລະ ເງິນຊຸກຍູ້ ໃຫ້ ສພຊ ເຊິ່ງປະກອບມີ: ລົດຕູ້ ໂຕໂຢຕVIP 14 ບ່ອນນັ່ງ ຈໍານວນ 1 ຄັນ ໃຫ້ ສພຊ, ລົດກະບະອີຊູຊຸ ຈໍານວນ 1 ຄັນ ໃຫ້ແກ່ສື່ມວນຊົນສະພາແຫ່ງຊາດ, ຄອມພິວເຕີ Notebook ຈໍານວນ 6 ເຄື່ອງ ໃຫ້ກົມເລຂານຸການ ແລະ ສື່ມວນຊົນສະພາແຫ່ງຊາດ, ເງິນສົດ 200 ລ້ານກີບ ໃຫ້ກອງທຶນສື່ມວນຊົນສະພາແຫ່ງຊາດ ແລະ ເງິນ 30 ລ້ານກີບ ເພື່ອຊຸກຍູ້ເປັນຄ່າອາຫານຮັບໃຊ້ໃນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ລວມມູນຄ່າທັງໝົດ 1.209.000.000 ກີບ (ໜຶ່ງຕື້ສອງຮ້ອຍເກົ້າລ້ານກີບ).

          ໃນໄລຍະຜ່ານມາ, ທະນາຄານພັດທະນາລາວ ໄດ້ປະກອບສ່ວນຊ່ວຍເຫລືອສັງຄົມ, ປະກອບສ່ວນເຂົ້າໃນວຽກງານຂອງລັດຖະບານ ເປັນຕົ້ນແມ່ນສົມທົບທຶນເຂົ້າໃນວຽກງານການສະກັດກັ້ນ ການແຜ່ລະບາດຂອງພະຍາດໂຄວິດ-19 ໃຫ້ກັບບັນດາແຂວງຕ່າງໆ ແລະ ບັນດາກະຊວງຈຳນວນໜຶ່ງ, ໄດ້ປະກອບສ່ວນຊ່ວຍຊຸກຍູ້ວຽກງານ ຂອງຂະແໜງການທ່ອງທ່ຽວ ແລະ ຂະແໜງກະສິກໍາ ອັນເປັນທ່າແຮງສໍາຄັນເພື່ອຊ່ວຍຟື້ນຟູເສດຖະກິດຂອງປະເທດຊາດໃຫ້ມີບາດກ້າວຂະຫຍາຍຕົວ ດີຂຶ້ນເທື່ອລະກ້າວ.

        ໃນໂອກາດດັ່ງກ່າວ ທ່ານ ໄຊສົມພອນ ພົມວິຫານ ໄດ້ກ່າວສະແດງຄວາມຂອບໃຈມາຍັງຄະນະຜູ້ບໍລິຫານງານ ທະນາຄານພັດທະນາລາວ ທີ່ເຫັນໄດ້ເຖິງຄວາມສໍາຄັນຂອງວຽກງານລັດຖະບານ ກໍຄືວຽກງານຂອງສພຊ ແລະ ຈະນຳເອົາເຄື່ອງທັງໝົດທີ່ໄດ້ຮັບໃນຄັ້ງນີ້ ມານໍາໃຊ້ເພື່ອຊຸກຍູ້ການຈັດຕັ້ງປະຕິບັດພາລະບົດບາດຂອງ ສພຊ ຢ່າງມີປະສິດທິຜົນ.

(ສົມນຶກ ແກ້ວໄຊຍະຈັກ)