ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 9 ພະຈິກ 2021 ທີ່ຫ້ອງຖະແຫລງຂ່າວ ສະພາແຫ່ງຊາດ (ສພຊ), ທ່ານ ນາງ ສຸນທອນ ໄຊຍະຈັກ ຮອງປະທານຄະນະປະຈໍາສະພາແຫ່ງຊາດ (ຄປຈ.ສພຊ) ໄດ້ຕາງໜ້າ ຄປຈ.ສພຊ ຖະແຫລງຂ່າວຕໍ່ສື່ມວນຊົນສໍານັກຂ່າວຕ່າງໆ ເພື່ອເປັນຂໍ້ມູນໃນການໂຄສະນາເຜີຍແຜ່ໃຫ້ພະນັກງານ, ທະຫານ, ຕຳຫລວດ, ປະຊາຊົນລາວບັນດາເຜົ່າ ໃນຂອບເຂດທົ່ວປະເທດ ແລະ ພໍ່ແມ່ພີ່ນ້ອງຊາວລາວທີ່ອາໄສຢູ່ຕ່າງປະເທດຮັບຊາບ ກ່ຽວກັບຜົນສໍາເລັດການດຳເນີນກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ  IX ໃນວາລະການຄົ້ນຄວ້າປະກອບຄໍາເຫັນຕໍ່ບົດລາຍງານການເຄື່ອນໄຫວວຽກງານ ປະຈໍາປີ 2021 ແລະ ແຜນການ ປະຈໍາປີ 2022 ຂອງ ສພຊ ເຊິ່ງໄດ້ດໍາເນີນໃນຕອນບ່າຍຂອງວັນຈັນ, ວັນທີ 8 ພະຈິກ ຮອດຕອນບ່າຍວັນທີ 9 ພະຈິກ 2021 ເຊິ່ງໄດ້ຮັບຜົນສໍາເລັດຕາມແຜນການທີ່ວາງໄວ້, ສາມາດສັງລວມວຽກງານພົ້ນເດັ່ນ ດັ່ງນີ້:

  1. ການເຄື່ອນໄຫວວຽກງານ ປະຈໍາປີ 2021

ການເຄື່ອນໄຫວວຽກງານຂອງ ສພຊ ໃນປີ 2021 ເຖິງມີຜົນກະທົບຈາກການລະບາດຂອງພະຍາດໂຄວິດ-19, ແຕ່ດ້ວຍຄວາມພະຍາຍາມຂອງ ຄປຈ.ສພຊ ແລະ ການນຳຂອງຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ເຮັດໃຫ້ໄດ້ມີຜົນສໍາເລັດທີ່ພົ້ນເດັ່ນຫລາຍດ້ານ ເຊິ່ງສາມາດສັງລວມໄດ້ ດັ່ງນີ້:

– ການຈັດຕັ້ງປະຕິບັດພາລະບົດບາດດ້ານນິຕິບັນຍັດ ສາມາດສ້າງ ແລະ ປັບປປຸງກົດໝາຍໄດ້ 13 ສະບັບ; ຈັດຕັ້ງການສະເຫລີມສະຫລອງວັນລັດຖະທໍາມະນູນແຫ່ງຊາດ ຄົບຮອບ 30 ປີ ໄດ້ດໍາເນີນໄປຢ່າງຄຶກຄື້ນ, ສົມກຽດ ແລະ ໄດ້ຮັບຜົນສໍາເລັດຢ່າງຈົບງາມ ເຊິ່ງເປັນການໂຄສະນາເຜີຍແຜ່ມູນເຊື້ອໃນການນໍາພາຂອງພັກ ໃນການສ້າງລັດປະຊາທິປະໄຕປະຊາຊົນ ໃຫ້ເປັນລັດທີ່ປົກຄອງດ້ວຍກົດໝາຍເທື່ອລະກ້າວ.

– ການຈັດຕັ້ງປະຕິບັດພາລະບົດບາດ ດ້ານການຕົກລົງບັນຫາສໍາຄັນພື້ນຖານຂອງປະເທດຊາດ ພວກເຮົາໄດ້ດໍາເນີນກອງປະຊຸມ ສພຊ ປະຈໍາປີ 2021 ຕາມກົດໝາຍກໍານົດ, ອັນພົ້ນເດັ່ນ ແມ່ນ ສພຊ ຊຸດທີ IX ເຄື່ອນໄຫວປະຕິບັດໜ້າທີ່ມາໄດ້ພຽງ 4 ເດືອນ ພວກເຮົາໄດ້ດໍາເນີນກອງປະຊຸມສະໄໝວິສາມັນເທື່ອທີ 1 ຂອງ ສພຊ ຊຸດທີ IX ເພື່ອພິຈາລະນາຮັບຮອງເອົາວາລະແຫ່ງຊາດ 2 ສະບັບ ເຊິ່ງເປັນບັນຫາສໍາຄັນພື້ນຖານຂອງປະເທດຊາດ ທີ່ມີຄວາມເຄັ່ງຮ້ອນ ແລະ ຮີບດ່ວນ; ນັ້ນຄືການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ; ຄປຈ.ສພຊ ໃນຖານະເປັນອົງການປະຈໍາການຂອງ ສພຊ ໃນເວລາທີ່ ສພຊ ບໍ່ໄດ້ດໍາເນີນກອງປະຊຸມ ກໍໄດ້ເອົາໃຈໃສ່ປະຕິບັດໜ້າທີ່ວຽກງານຂອງຕົນ ໂດຍຜ່ານການດໍາເນີນກອງປະຊຸມແຕ່ລະເດືອນ ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ.

– ການປະຕິບັດພາລະບົດບາດດ້ານການຕິດຕາມກວດກາ, ເຖິງການລະບາດຂອງພະຍາດໂຄວິດ-19 ໄດ້ສົ່ງຜົນກະທົບຕໍ່ການເຄື່ອນໄຫວຕິດຕາມກວດກາກໍຕາມ ແຕ່ໃນປີ 2021 ນີ້ ສພຊ ຊຸດທີ IX ເຄື່ອນໄຫວຕິດຕາມກວດກາໂດຍຜ່ານການດໍາເນີນກອງປະຊຸມຮ່ວມ ລະຫວ່າງ ຄປຈ.ສພຊ ກັບພາກສ່ວນຕ່າງໆ ເພື່ອຮັບຟັງການລາຍງານກ່ຽວກັບບັນຫາທີ່ພົ້ນເດັ່ນ ແລະ ສັງຄົມມີຄວາມສົນໃຈຫລາຍ. ຄປຈ.ສພຊ ໄດ້ດໍາເນີນກອງປະຊຸມຮ່ວມກັບ ລັດຖະບານ; ກອງປະຊຸມຮ່ວມກັບອົງການກວດກາແຫ່ງລັດ ແລະ ອົງການກວດສອບແຫ່ງລັດ; ກອງປະຊຸມຮ່ວມກັບສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ; ກອງປະຊຸມຮ່ວມກັບສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ.

– ການເຄື່ອນໄຫວວຽກງານການຕ່າງປະເທດ ຂອງ ສພຊ ກໍໄດ້ດໍາເນີນໃຫ້ສອດຄ່ອງກັບສະພາບແວດລ້ອມໃໝ່ ໂດຍໄດ້ເຄື່ອນໄຫວເປັນປົກກະຕິ ທັງການຮ່ວມມືສອງຝ່າຍ ແລະ ຫລາຍຝ່າຍ ໃນຮູບແບບກອງປະຊຸມທາງໄກ ແລະ ປົກກະຕິ.

– ການສ້າງຄວາມເຂັ້ມແຂງໃຫ້ແກ່ ສພຊ, ການປະສານສົມທົບວຽກງານກັບພາກສ່ວນກ່ຽວຂ້ອງ ກໍໄດ້ດໍາເນີນເປັນປົກກະຕິ.

  1. ແຜນການເຄື່ອນໄຫວວຽກງານ ປະຈໍາປີ 2022

ປີ 2022 ເປັນປີທີສອງຂອງການເຄື່ອນໄຫວວຽກງານຂອງ ສພຊ ຊຸດທີ IX ເຊິ່ງ ສພຊ ຈະຕ້ອງໄດ້ບຸກທະລຸຢ່າງຮອບດ້ານ ແນໃສ່ສ້າງການຫັນປ່ຽນທີ່ແຂງແຮງ ໃນການຜັນຂະຫຍາຍແນວທາງນະໂຍບາຍຂອງພັກ ເຂົ້າໃນການເຄື່ອນໄຫວຂອງ ສພຊ ເຊິ່ງໄດ້ວາງແຜນການ ດັ່ງນີ້:

– ການປະຕິບັດພາລະບົດບາດດ້ານນິຕິບັນຍັດ ໃນປີ 2022 ນີ້ ພວກເຮົາໄດ້ວາງແຜນການສ້າງ ແລະ ປັບປຸງກົດໝາຍ ຈໍານວນ 30 ສະບັບ, ໃນນີ້ ມີກົດໝາຍສ້າງໃໝ່ 12 ສະບັບ ແລະ ກົດໝາຍປັບປຸງ 18 ສະບັບ, ຖືວ່າເປັນການວາງແຜນທີ່ຈະຕ້ອງໄດ້ບຸກບືນສົມຄວນ ຈຶ່່ງຈະບັນລຸຕາມແຜນການໄດ້.

– ການປະຕິບັດພາລະບົດບາດດ້ານການຕົກລົງບັນຫາສໍາຄັນພື້ນຖານຂອງປະເທດຊາດ ພວກເຮົາຈະໄດ້ກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 3 ແລະ ເທື່ອທີ 4 ຂອງ ສພຊ ຊຸດທີ IX ເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ຕາມທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ ເປັນຕົ້ນ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ,  ແຜນເງິນຕາ, ວຽກງານກວດກາແຫ່ງລັດ, ວຽກງານກວດສອບແຫ່ງລັດ, ວຽກງານຂອງສານປະຊາຊົນສູງສຸດ, ວຽກງານອົງການໄອຍະການປະຊາຊົນສຸງສຸດ; ຄວາມຄືບໜ້າຂອງການຈັດຕັ້ງປະຕິບັດວາລະແຫ່ງຊາດ 2 ສະບັບ ແລະ ວຽກງານອື່ນຈໍານວນໜຶ່ງ. ພ້ອມກັນນັ້ນ, ໃນໄລຍະທີ່ ສພຊ ບໍ່ໄດ້ດໍາເນີນກອງປະຊຸມຂອງຕົນ ຄປຈ.ສພຊ ກໍຈະໄດ້ປະຕິບັດໜ້າທີ່ແທນ ໃນການພິຈາລະນາຮັບຮອງເອົາ ບັນຫາສໍາຄັນພື້ນຖານຂອງປະເທດຊາດ​ ເພື່ອເຮັດໃຫ້ການຄຸ້ມຄອງບໍລິຫານລັດ ດໍາເນີນໄປເປັນປົກກະຕິ.

– ການປະຕິບັດພາລະບົດບາດດ້ານການຕິດຕາມກວດກາ ກໍໄດ້ກໍານົດບັນດາວຽກງານຈໍານວນໜຶ່ງ ໂດຍສະເພາະການຕິດຕາມກວດກາ ການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິກອງປະຊຸມ ສພຊ ແລະ ວຽກງານອື່ນໆຈໍານວນໜຶ່ງ.

– ການເຄື່ອນໄຫວວຽກງານການຕ່າງປະເທດ, ການສ້າງຄວາມເຂັ້ມແຂງ ແລະ ວຽກງານອື່ນ ກໍໄດ້ມີການກໍານົດແຜນການຢ່າງລະອຽດແລ້ວ.

  1. ການປະກອບຄໍາເຫັນຂອງ ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ

ກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ໄດ້ຮັບຟັງການປະກອບຄໍາເຫັນຂອງສູນກາງແນວລາວສ້າງຊາດ ເຊິ່ງໄດ້ສະເໜີໃຫ້ ສພຊ ເອົາໃຈໃສ່ບາງວຽກງານ ດັ່ງນີ້:

– ສະແດງຄວາມຍ້ອງຍໍຊົມເຊີຍຕໍ່ ສພຊ ທີ່ໄດ້ມີຄວາມພະຍາຍາມຈັດຕັ້ງປະຕິບັດໜ້າທີ່ວຽກງານຂອງຕົນ ຕາມທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ ມີຜົນສໍາເລັດຫລາຍດ້ານ ເປັນຕົ້ນ ການປະຕິບັດ 3 ພາລະບົດບາດຂອງ ສພຊ, ການສ້າງຄວາມເຂັ້ມແຂງ, ການເຄື່ອນໄຫວວຽກງານການຕ່າງປະເທດ ເຮັດໃຫ້ການຄຸ້ມຄອງບໍລິຫານລັດ ມີຄວາມໜັກແໜ້ນ, ເຂັ້ມແຂງ.

– ສະເໜີໃຫ້ສະມາຊິກສະພາແຫ່ງຊາດ ເພີ່ມທະວີການລົງພົບປະກັບປະຊາຊົນໃຫ້ກວ້າງຂວາງ ແລະ ທົ່ວເຖິງ ໂດຍສະເພາະຢູ່ເຂດຫ່າງໄກສອກຫລີກ ເພື່ອຮັບຟັງຄວາມຄິດເຫັນຂອງປະຊາຊົນ ຕໍ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ, ນໍາເອົາຄວາມຄິດເຫັນດັ່ງກ່າວ ມາສົມທົບກັບລັດຖະບານແກ້ໄຂ.

– ເພີ່ມທະວີການຕິດຕາມກວດກາການເຄົາລົບ ແລະ ປະຕິບັດລັດຖະທໍາມະນູນ, ກົດໝາຍຂອງອົງການຈັດຕັ້ງລັດຂັ້ນຕ່າງໆ, ຕິດຕາມຊຸກຍູ້ການແກ້ໄຂຜົນກະທົບຈາກໂຄງການລົງທຶນ ໃຫ້ວ່ອງໄວ ແລະ ຮັບປະກັນເຮັດໃຫ້ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນກວ່າເກົ່າ ແລະ ບັນຫາອື່ນອີກຈໍານວນໜຶ່ງ ເຊິ່ງ ຄປຈ.ສພຊ ຈະໄດ້ມອບໝາຍໃຫ້ບັນດາທ່ານສະມາຊິກສະພາແຫ່ງຊາດ   ນໍາໄປສົມທົບກັບອໍານາດການປົກຄອງທີ່ກ່ຽວຂ້ອງ ພ້ອມກັນແກ້ໄຂ.

ອີກເທື່ອໜຶ່ງ ໃນນາມຕາງໜ້າ ຄປຈ.ສພຊ, ຂໍຂອບໃຈມາຍັງສື່ມວນຊົນຈາກສໍານັກຂ່າວຕ່າງໆ ໂທລະພາບແຫ່ງຊາດ ແລະ ວິທະຍຸກະຈາຍສຽງແຫ່ງຊາດ, ສື່ສິ່ງພິມປະເພດຕ່າງໆ ທີ່ໄດ້ຕິດຕາມການດໍາເນີນກອງປະຊຸມ ສພຊ ເພື່ອນໍາໄປເຜີຍແຜ່ໃຫ້ພະນັກງານ, ທະຫານ, ຕຳຫລວດ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າທຸກຊັ້ນຄົນໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງປະເທດ ໄດ້ຮັບຊາບເຂົ້າໃຈຢ່າງກວ້າງຂວາງ ແລະ ພ້ອມກັນເຂົ້າຮ່ວມໃນການຈັດຕັ້ງປະຕິບັດ ການຕົກລົງບັນຫາສໍາຄັນຕ່າງໆ ຂອງກອງປະຊຸມ ສພຊ ໃນຄັ້ງນີ້.