ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

ຂປລ. ໃນວາລະດຳເນີນກອງປະຊຸມ ຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ທີ່ໄຂຂຶ້ນຢ່າງເປັນທງການ ໃນຕອນເຊົ້າ ວັນທີ 22 ມີນາ 2021 ພາຍໃຕ້ການ ເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ມີການນຳພັກ-ລັດ, ພະນັກງານປະຕິວັດ ອາວຸໂສ ແລະ ສະມາຊິກ ສະພາແຫ່ງຊາດ ເຂົ້າຮ່ວມ. ກອງປະຊຸມໄດ້ເຫັນດີ ເປັນເອກະພາບເລືກຕັ້ງເອົາ ທ່ານ ພັນຄຳ ວິພາວັນ ອະດີດຮອງ ປະທານປະເທດ ເປັນນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົນໃໝ່ ແລະ ເລືອກຕັ້ງທ່ານ ພົນເອກ ຈັນສະໝອນ ຈັນຍາລາດ, ທ່ານ ສອນໄຊ ສີພັນດອນ ແລະ ທ່ານ ກິແກ້ວ ໄຂຄຳພິທູນ ເປັນຮອງນາຍົກລັດຖະມົນຕີ. ພ້ອມນີ້, ກອງປະຊຸມຍັງ ໄດ້ພິຈາລະນາ ແລະ ຮັບຮອງເອົາໂຄງປະກອບ ກົງຈັກລັດຖະບານ ແລະ ສະມາຊິກລັດຖະ ບານຊຸດໃໝ່ ຊຸດທີ IX.

ໂອກາດນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ຊຸດທີ VIII ໄດ້ກ່າວອຳລາໜ້າທີ່ວ່າ: ມາຮອດເວລານີ້, ການປະຕິບັດ ໜ້າທີ່ ຂອງລັດຖະບານຊຸດທີ VIII ໄດ້ສິ້ນສຸດລົງແລ້ວອີກເທື່ອໜຶ່ງ, ຂ້າພະເຈົ້າຂໍສະແດງ ຄວາມຂອບໃຈເປັນຢ່າງສູງ ມາຍັງບັນດາ ທ່ານຮອງນາຍົກ ລັດຖະມົນຕີ ແລະ ສະມາຊິກລັດຖະບານ ທີ່ໄດ້ສຸມທຸກກາລັງວັງຊາ ແລະ ສະຕິປັນຍາຂອງຕົນ ເຂົ້າໃນການເຄື່ອນໄຫວ ປະຕິບັດໜ້າທີ່ຂອງລັດຖະບານ ດ້ວຍຄວາມທຸ້ມເທ ຕະຫລອດໄລຍະ 5 ປີຜ່ານມາF ພ້ອມກັນນີ້ ກໍຂໍສະແດງຄວາມຂອບໃຈ ມາຍັງບັນດາຂະແໜງ ການຂັ້ນສູນກາງ, ອົງການປົກຄອງທ້ອງຖິ່ນ, ພ້ອມດ້ວຍ ປະຊາຊົນລາວ ບັນດາເຜົ່າ ໃນຂອບເຂດທົ່ວປະເທດ, ນັບທັງພີ່ນ້ອງເຊື້ອຊາດລາວ ຢູ່ຕ່າງປະເທດ ທີ່ໄດ້ໃຫ້ການ ອູ້ມຊູຊ່ວຍເຫລືອ ແລະ ສະໝັບສະໜູນ ລັດຖະບານ ໃນການປະຕິບັດ ໜ້າທີ່ຂອງຕົນ. ໃນໂອກາດນີ້, ຂໍສະແດງຄວາມຂອບໃຈ ຢ່າງຈິງໃຈ ແລະ ຮູ້ບຸນຄຸນໄປຍັງບັນດາ ປະເທດເພື່ອນມິດ, ບັນດາຄູ່ຮ່ວມພັດທະນາ ທີ່ໄດ້ໃຫ້ການຮ່ວມມື ແລະ ສະໜັບສະໜູນຕໍ່ ການຈັດຕັ້ງປະຕິບັດ ວຽກງານ ຂອງລັດຖະບານ ໃນໄລຍະຜ່ານມາ ໂດຍອີງຕາມລັດຖະທຳມະນູນ ກົດໝາຍ ວ່າດ້ວຍລັດຖະບານ. ຂ້າພະເຈົ້າ, ພ້ອມດ້ວຍສະມາຊິກ ລັດຖະບານ ຊຸດທີ VIII ຂໍລາໜ້າທີ່ຢ່າງເປັນທາງການ.

ແຫຼ່ງຂ່າວທີ່ມາ: ຂ່າວສານປະເທດລາວ