ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ກອງປະຊຸມໃຫຍ່ ຄັ້ງທີ II ຂອງໜ່ວຍພັກກົມສື່ມວນຊົນ ໄດ້ຈັດ​ຂຶ້ນ​ໃນວັນທີ 3 ກັນ​ຍາ 2021 ທີ່​​ສະ​ພາ​ແຫ່ງ​ຊາດ ພາຍໃຕ້ການເປັນປະທານຂອງສະຫາຍ ບຸນເລີດ ລ້ວນດວງຈັນ ກໍາມະການຄະນະພັກຮາກຖານຄະນະເລຂາທິການສະພາແຫ່ງຊາດ, ເລຂາໜ່ວຍພັກກົມສື່ມວນຊົນ; ເຂົ້າ
ຮ່ວມມີສະຫາຍ ນາງ ປິ່ງຄໍາລາຊະສິມມາ ກຳມະການສູນກາງພັກ, ກຳມະການຄະນະບໍລິຫານງານພັກ, ເລ​ຂາ​ຄະ​ນະ​ພັກຄະນະພັກຮາກຖານຄະນະເລຂາທິການສະພາແຫ່ງຊາດ​; ມີ​ບັນ​ດາ​ສະ​ຫາຍ​ຮອງ​ເລ​ຂາ-ກຳມະ​ການຄະນະພັກຮາກຖານຄະນະເລຂາທິການສະພາແຫ່ງຊາດ ແລະ ຜູ້ຕາງໜ້າ​ຄະ​ນຊ່ວຍວຽກຄະນະພັກສະພາແຫ່ງຊາດ, ສະມາຊິກພັກສົມບູນ ພ້ອມດ້ວຍແຂກຖືກເຊີນ.

ກອງປະຊຸມໄດ້ເປັນເອກະສັນຮັບຮອງເອົາເນື້ອໃນສຳຄັນ ເປັນຕົ້ນບົດລາຍງານການເມືອງຂອງໜ່ວຍພັກກົມສື່ມວນຊົນໃນໄລຍະ 2 ປີ 2019-
2020 ແລະ ທິດ​ທາງ​ແຜນ​ການ 5 ປີ (2021-2025); ບົດສຳຫລວດການຊີ້ນຳ-ນຳພາລວມ ຂອງຄະນະໜ່ວຍພັກກົມສື່ມວນຊົນໃນປີ 2019-2021. ຈາກນັ້ນ, ຜູ້ແທນສົມບູນກອງປະຊຸມໃຫຍ່ໜ່ວຍພັກກົມສື່ມວນຊົນ ໄດ້ພ້ອມກັນໃຊ້ສິດປະຊາທິ ປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກ ຊຸດທີ II ບົນພື້ນຖານຫລັກການລວມສູນປະຊາທິປະໄຕ ແລະ ຖືກຕ້ອງສອດຄ່ອງຕາມມາດຖານເງື່ອນໄຂທີ່ໄດ້ກໍານົດໄວ້ ເຊິ່ງມີຜູ້ລົງສະໝັກເລືອກຕັ້ງ 5 ສະຫາຍ ຍິງ 1 ສະຫາຍ.
ກອງປະຊຸມໄດ້ເລືອກຕັ້ງເອົາຄະນະພັກ ສະໄໝທີ II ຈໍານວນ 3 ສະຫາຍ ແລະ ໄດ້ເປີດກອງປະຊຸມຄັ້ງປະຖົມມະລືກຂອງ​ຄະ​ນະໜ່ວຍພັກກົມສື່
ມວນຊົນ ຊຸດທີ II ໄດ້ເປັນເອກະພາບເລືອກຕັ້ງພັກຊຸດໃໝ່ ເລືອກເອົາສະຫາຍ ພິດສະໄໝ ບຸນວິໄລ ເປັນເລຂາໜ່ວຍພັກ, ສະຫາຍ ຂັນທະວີ ວົງພະຈັນ
ເປັນຮອງເລຂາໜ່ວຍພັກ, ສະຫາຍ ເປຄຳ ລໍຄຳສອນ ເປັນກຳມະການໜ່ວຍພັກ, ຮັບຜິດຊອບວຽກງານກວດກາໜ່ວຍພັກ.
ກອງປະຊຸມໄດ້ຮັບຟັງຄຳເຫັນໂອ້ລົມ ແລະ ທິດຊີ້ນຳຂອງສະຫາຍ ນາງ ປິ່ງຄຳ ລາຊະສິມມາ ເຊິ່ງສະຫາຍໄດ້ເນັ້ນໃຫ້ໜ່ວຍພັກເອົາໃຈໃສ່ບາງ​ບັນ​ຫາດັ່ງນີ້: ສືບຕໍ່ເອົາໃຈໃສ່ນຳພາສຶກສາອົບຮົມວຽກງານການເມືອງ-ແນວຄິດ ໃຫ້ແກ່ຖັນແຖວສະມາຊິກພັກ ແລະ ພະນັກງານ-ລັດຖະກອນໃນຄວາມຮັບຜິດຊອບຂອງຕົນໃຫ້ເລິກເຊິ່ງ ເຮັດເປັນປະຈຳ ແລະ ຕໍ່ເນື່ອງດ້ວຍຫລາຍຮູບແບບຫລາຍວິທີການ, ເສີມຂະຫຍາຍມູນເຊື້ອການເຕົ້າໂຮມຄວາມສາມັກຄີເປັນປືກແຜ່ນ ທີ່ມີມາແລ້ວນັ້ນໃຫ້ນັບມື້ໜັກແໜ້ນເຂັ້ມແຂງ, ດຳເນີນຊິວິດພັກປະຈຳເດືອນເປັນປົກກະຕິ, ຈິງໃຈຊ່ວຍເຫລືອກໍ່ສ້າງເຊິ່ງກັນແລະກັນ ບົນຈິດໃຈທັງເຮັດວຽກ ທັງຖອດຖອນບົດຮຽນນຳກັນ; ເອົາໃຈໃສ່ປັບປຸງການຈັດຕັ້ງຂອງຕົນ ໃຫ້ໜັກແໜ້ນເຂັ້ມແຂງທຸກດ້ານ, ຍົກສູງຄວາມຮູ້ດ້ານວິຊາການດ້ວຍການເພີ່ມຄວາມດຸໝັ່ນຂະຫຍັນອົດທົນ ຄົ້ນຄວ້າສຶກສາດ້ວຍຕົນເອງເປັນສຳຄັນ, ປັບປຸງແບບແຜນວິທີເຮັດວຽກ, ວິທີການນຳພາ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງໜ້າທີ່ວຽກງານຕົວຈິງ, ເຮັດວຽກງານເຂັ້ມງວດຕາມຫລັກ ການລວມສູນປະຊາທິປະໄຕ, ປັບປຸງໜ່ວຍພັກຕາມ 5 ຫລັກການ ແລະ 3 ທິດນຳໃນການກໍ່ສ້າງ ແລະ ປັບປຸງຕົນເອງຂອງພັກ ໃຫ້ເລິກເຊິ່ງ ແລະ ເປັນຮູບປະທຳກວ່າເກົ່າ ພິເສດແມ່ນປັບປຸງໜ່ວຍງານຊ່ວຍ
ວຽກໜ່ວຍພັກໃຫ້ເຂັ້ມແຂງ; ເອົາໃຈໃສ່ຊີ້ນຳ-ນຳພາ ການຈັດຕັ້ງປະຕິບັດຂໍ້ແຂ່ງຂັນຮັກຊາດ-ພັດທະນາ ຕິດພັນກັບການເຄື່ອນໄຫວວຽກງານວິຊາສະເພາະທີ່ດີເດັ່ນ ແລະ ຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນ ຂອງກົມສື່ມວນຊົນ; ເອົາໃຈໃສ່ຊີ້ນຳ-ນໍາພາ ວຽກງານອົງການຈັດຕັ້ງມະຫາຊົນ ໃນຂອບເຂດຄວາມຮັບຜິດຊອບຂອງຕົນ ສ້າງຂະບວນການໃຫ້ມີຄວາມຟົດຟື້ນດ້ວຍຫລາຍຮູບການ ຕິດພັນກັບການຍົກສູງຄວາມສາມາດທາງດ້ານວິຊາການ ແລະ ວິຊາສະເພາະ ສະໜິດແໜ້ນກັບວຽກງານຂະຫຍາຍພັກ ເພື່ອຄັດເລືອກເອົາມະຫາຊົນຜູ້ທີ່ດີເດັ່ນກ້າວໜ້າຂະຫຍາຍເຂົ້າເປັນສະມາຊິກພັກທີ່ໄດ້ມາດຕະຖານ; ພ້ອມກັນນັ້ນ, ຄະນະໜ່ວຍພັກຊຸດໃໝ່ ຈົ່ງນຳພາສະມາຊິກພັກພາຍໃນໜ່ວຍ ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງໜ່ວຍພັກກົມສື່ມວນຊົນຄັ້ງນີ້ ໃຫ້ປາກົດຜົນເປັນຈິງ.
(ສົມນຶກ ແກ້ວໄຊຍະຈັກ)