ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 14 ກັນຍາ 2021 ທີ່ສະພາແຫ່ງຊາດ, ກອງປະຊຸມໃຫຍ່ ຄັ້ງທີ II ຂອງໜ່ວຍພັກຮາກຖານກຳມາທິການວຽກງານສະມາຊິກສະພາແຫ່ງຊາດ (ກວ​ສ​ຊ) ໄດ້ໄຂຂຶ້ນ ແລະ ອັດລົງດ້ວຍຜົນສຳເລັດອັນຈົບງາມ; ພາຍໃຕ້ການເຂົ້າຮ່ວມຂອງສະຫາຍ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ເລຂາຄະນະບໍລິຫານງານພັກສະພາແຫ່ງຊາດ, ປະທານສະພາແຫ່ງຊາດ ໂດຍການເປັນປະທານກອງປະຊຸມຂອງສະຫາຍ ສຸບັນ ສະວະບຸດ ກຳມະການຄະນະພັກສະພາແຫ່ງຊາດ, ຮັກສາການເລຂາໜ່ວຍພັກຮາກຖານ ກວ​ສ​ຊ; ເຂົ້າຮ່ວມມີສະຫາຍຮັກສາການຮອງເລຂາໜ່ວຍພັກ, ຮັກສາການກຳມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະ ແຂກຖືກເຊີນ.

ໃນ​ວາ​ລະກອງປະຊຸມ, ໄດ້ຮັບຟັງ ແລະ ຮັບ​ຮອງ​ເອົາບົດລາຍງານການເມືອງຂອງໜ່ວຍພັກ ແລະ ທິດທາງແຜນການໃນຕໍ່ໜ້າ ແລະ ບົດສຳຫລວດການນຳພາຂອງຄະນະໜ່ວຍພັກຮາກຖານ ກວ​ສ​ຊ ຊຸດເກົ່າ; ພ້ອມນັ້ນ, ຜູ້ແທນສົມບູນຂອງກອງປະຊຸມຍັງໄດ້ສຸມໃສຄົ້ນຄວ້າຢ່າງເລິກເຊິ່ງໃນການນຳໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຮາກຖານ ກວ​ສ​ຊ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ໄດ້ກຳນົດໄວ້ ເຊິ່ງມີຜູ້ສະໝັກຮັບເລືອກຕັ້ງ 7 ສະຫາຍ ຍິງ 1 ສະຫາຍ, ເລືອກໄດ້ 5 ສະຫາຍ ແລະ ກອງ​ປະ​ຊຸ​ມ​ຄັ້ງ​ປະ​ຖົມ​ມະ​ລືກ​ຂອງ​ໜ່ວຍ​ພັກ​ຮາກ​ຖານ ກວ​ສ​ຊ ​ຊຸດທີ II ເລືອກ​ໄດ້ ຄື: ສະຫາຍ ສຸບັນ ສະວະບຸດ ເປັນເລຂາ, ສະຫາຍ ຄຳສິງ ໄຊສົມແພງ ເປັນຮອງເລຂາ, ສະຫາຍ ວຽງແກ້ວ ວັນນະຈັກ ເປັນກຳມະການ ທັງເປັນປະທານກວດກາ, ສະຫາຍ ໂພໄຊ ເພັດພູທອນ ເປັນກຳມະການ ທັງ​ເປັນຮອງປະທານກວດກາ, ສະຫາຍ ຕູ້ຊົງ ບົວສີ ຕົງສື ເປັນ ເປັນກຳມະການ, ສະຫາຍ ນາງ ເສົາວະພາ ພົນຈັນເຮືອງ ເປັນກໍາມະການກວດກາພັກ. ພ້ອມນັ້ນ, ກອງປະຊຸມຍັງໄດ້ເລືອກຕັ້ງເອົາຜູ້ແທນສົມບູນ, ສຳຮອງຂອງໜ່ວຍພັກຮາກຖານ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ IV ຂອງອົງຄະນະພັກສະພາແຫ່ງຊາດ ທັງໝົດ 14 ສະຫາຍ.

ໃນ​ໂອ​ກາດນີ້, ສະຫາຍ ປອ. ໄຊສົມພອນ ພົມວິຫານ ​ໄດ້​ມີຄໍາເຫັນໂອ້ລົມ ເຊິ່ງທ່ານໄດ້ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ການນໍາພາ-​ຊີ້​ນຳ ຂອງ​ຄະນະ​ໜ່ວຍພັກ​ຮາກ​ຖານຊຸດ​​ເກົ່າ ທີ່​ໄດ້ນຳພາ​-ຊີ້​ນຳສະມາຊິກ​ພັກ,​ ພະນັກງານ-ລັດຖະກອນໃນການເຄື່ອນໄຫວປະຕິບັດ​ໜ້າ​ທີ່​ຂອງ​ຕົນ ແລະ ຍາດ​ໄດ້ຜົນ​ສຳ​ເລັດ​ຫລາຍ​ດ້ານ. ພ້ອມກັນ​ນັ້ນ, ​ສະຫາຍ​ຍັງ​ໄດ້​ສະ​ແດງ​ຄວາມ​ເປັນ​ຫວ່ງ​ເປັນ​ໃຍ​ຕໍ່​ດ້ານ​ອ່ອນ, ຂໍ້​ຄົງຄ້າງ​ຜ່ານມາ ທັງໄດ້​ຮຽກຮ້ອງ​ໃຫ້​ຄະນະໜ່ວຍ​ພັກ​ຊຸດ​ໃໝ່​ ກໍຄືບັນດາສະຫາຍສະມາຊິກພັກ ຈົ່ງໄດ້ສືບຕໍ່ຄົ້ນຄວ້າ, ປັບປຸງແກ້ໄຂຕໍ່ຂໍ້ຄົງຄ້າງຕ່າງໆ ພ້ອມທັງຜັນຂະຫຍາຍມະຕິກອງປະຊຸມໃຫຍ່ຂອງຕົນ ເປັນແຜນການອັນລະອຽດ, ​ເພີ່ມທະວີຄວາມຮັບຜິດຊອບໃນການນໍາພາ-ຊີ້ນໍາ, ແບ່ງງານ, ແບ່ງຄວາມຮັບຜິດຊອບພາຍໃນຄະນະນ່ວຍພັກ ກໍຄືສະມາຊິກພັກ ໃນການຈັດຕັ້ງປະຕິບັດໃຫ້​ມີຄຸນນະພາບ ແລະ​ ມີ​ຜົນສຳ​ເລັດສູງ.

(ອານຸສອນ ພູມມີທອນ)