ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ວັນທີ 5 ກໍລະກົດ 2021, ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6), ນະຄອນ ຫລວງວຽງຈັນ ໄດ້ມີກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດ ແລະ ຄະນະລັດຖະບານ ປະຈໍາປີ 2021 ໂດຍການເປັນປະທານຮ່ວມຂອງທ່ານ ປອ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແລະ ທ່ານ ປອ ພັນຄຳ ວິພາວັນ ກໍາມະການກົມການເມືອງສູນກາງພັກ, ນາຍົກ ລັດຖະມົນຕີ ແຫ່ງ ສປປລາວ; ມີບັນດາທ່ານຮອງປະທານຄະນະປະຈໍາສະພາແຫ່ງຊາດ, ຮອງນາຍົກລັດຖະ ມົນຕີ, ຄະນະປະຈໍາສະພາແຫ່ງຊາດ, ຄະນະລັດຖະບານ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຄະນະປະຈໍາສະພາແຫ່ງຊາດ ແລະ ຄະນະລັດຖະບານ ໄດ້ປຶກສາຫາລືຮ່ວມກັນກ່ຽວກັບວຽກງານຂົງເຂດເສດຖະກິດ-ການເງິນ; ແຜນການສ້າງ ແລະ ປັບປຸງກົດໝາຍ ຕິດພັນກັບວາລະແຫ່ງຊາດ ທີ່ຈະນໍາເຂົ້າພິຈາລະນາໃນກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX; ພ້ອມນັ້ນ, ຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄຳຄິດຄໍາເຫັນ, ພິຈາລະນາດ້ວຍເຫດດ້ວຍຜົນ ຖືເອົາຜົນປະໂຫຍດສ່ວນລວມຂອງຊາດ, ຂອງປະຊາຊົນບັນດາເຜົ່າເປັນສໍາຄັນສຸດ ທັງນີ້ກໍເພື່ອສ້າງຄວາມເປັນເອກະພາບກ່ຽວກັບວິທີການແກ້ໄຂໃນຕໍ່ໜ້າ.

ແຫຼ່ງຂ່າວທີ່ມາ: ສະພາແຫ່ງຊາດ