ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດ (ຄປຈສພຊ) ກັບລັດຖະບານ ກ່ຽວກັບວຽກງານກວດສອບ ແລະ ການກວດກາ ໄດ້ຈັດຂຶ້ນໃນວັນສຸກທີ 13 ກັນຍາ 2017 ທີ່ຫ້ອງປະຊຸມຂອງຫ້ອງວ່າການສໍານັກງານນາຍົກລັດຖະມົນຕີ ໂດຍການເປັນທານຮ່ວມຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ (ສພຊ) ແລະ ທ່ານ ທອງລຸນ ສີສຸລິດ ນາຍົກລັດຖະມົນຕີ; ມີບັນດາທ່ານຮອງປະທານ ສພຊ, ຮອງນາຍົກລັດຖະມົນຕີ, ສະມາຊິກລັດຖະບານ, ກຳມະການຄະນະປະຈຳ ແລະ ປະທານກຳມາທິການສະພາແຫ່ງຊາດ ພ້ອມດ້ວຍວິຊາການຈາກລັດຖະບານ ແລະ ສພຊ ເຂົ້າຮ່ວມ.

ທັງນີ້, ກໍເພື່ອປຶກສາຫາລື ແລະ ຮ່ວມກັນຊອກຫາວິທີແກ້ໄຂບັນຫາພົ້ນເດັ່ນ ທີ່ກ່ຽວຂ້ອງກັບຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະ ມານແຫ່ງລັດ ສົກປີ 2015-2016; ເພື່ອຮັບຟັງການລາຍງານສະພາບໃນການຈັດຕັ້ງປະຕິບັດແກ້ໄຂຜົນການກວດສອບໃນໄລຍະຜ່ານມາຂອງອົງການກວດກາລັດຖະບານ ແລະ ເພື່ອຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ວິໄນແຜນການ-ການເງິນຂອງບັນດາຫົວໜ່ວຍງົບປະມານ.

ທ່ານ ນາງ ປານີ ຢາທໍ່ຕູ້ ໄດ້ມີຄໍາເຫັນໃນພິທີເປີດວ່າ: ຕະຫລອດໄລຍະຜ່ານມາ, ພັກ ແລະ ລັດຖະບານ ກໍຄືສະພາແຫ່ງຊາດ ໄດ້ເອົາໃຈໃສ່ຊີ້ນຳ ແລະ ສ້າງເງື່ອນໄຂອຳນວຍຄວາມສະດວກໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານກວດສອບ ດ້ວຍການວາງນະໂຍບາຍ ແລະ ການຫັນເປັນກົດໝາຍ, ພິເສດໃນການປັບປຸງລັດຖະທຳມະນູນສະບັບປີ 2015 ໄດ້ກຳນົດວຽກງານກວດສອບແຫ່ງລັດ ເປັນໝວດໜຶ່ງສະເພາະ ແລະ ໄດ້ກຳນົດແຈ້ງສິດໜ້າທີ່ຂອງອົງການກວດສອບແຫ່ງລັດ ເພື່ອເປັນບ່ອນອີງທາງດ້ານນິຕິກໍາໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານກວດສອບ ນັບມື້ໄດ້ຮັບການປັບປຸງ ແລະ ຍົກສູງທາງດ້ານຄຸນນະພາບດີຂຶ້ນເປັນກ້າວໆ. ຕະຫລອດໄລຍະຜ່ານມາ, ອົງການກວດສອບແຫ່ງລັດໄດ້ປະກອບສ່ວນສຳຄັນເຂົ້າໃນການກວດກາ, ການຄຸ້ມຄອງ, ການນຳໃຊ້ງົບປະມານ, ການເງິນ ແລະ ສັບສິນຂອງລັດຢູ່ໃນບັນດາຫົວໜ່ວຍງົບປະມານລັດໃນແຕ່ລະຂັ້ນໄດ້ຮັບໝາກຜົນສໍາຄັນໃນຫລາຍດ້ານ ເປັນຕົ້ນ: ສາມາດສະໜອງຂໍ້ມູນທີ່ມີຄຸນນະພາບ, ຈະແຈ້ງ ແລະ ເປັນໜ້າເຊື່ອຖືໃນການຄຸ້ມຄອງ, ນຳໃຊ້ງົບປະມານ ແລະ ຊັບສິນຂອງລັດໃຫ້ແກ່ສະພາແຫ່ງຊາດ ກໍຄືສະພາປະຊາຊົນແຂວງ ເພື່ອຕິດຕາມກວດກາ, ພິຈາລະນາ ແລະ ຮັບຮອງເອົາຜົນການກວດສອບບົດສະຫລຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີຜ່ານມາ ແລະ ເປັນບ່ອນອີງໃຫ້ແກ່ການພິຈາລະນາຮັບຮອງເອົາແຜນງົບປະມານແຫ່ງລັດ ແລະ ແຜນງົບປະມານທ້ອງຖິ່ນໃນແຕ່ລະປີ. ພ້ອມທັງສະໜອງຂໍ້ມູນໃຫ້ແກ່ລັດຖະບານ ກໍຄືບັນດາເປົ້າໝາຍຖືກກວດສອບ ເພື່ອເກັບກູ້ເງິນຄືນເຂົ້າງົບປະມານຂອງລັດ, ປັບປຸງການຄຸ້ມຄອງ ແລະ ການບໍລິຫານລັດ ທາງດ້ານງົບປະມານໃຫ້ຖືກຕ້ອງຕາມກົດໝາຍ ແລະ ລະບຽບການທີ່ກ່ຽວຂ້ອງ.

ຄຽງຄູ່ກັນນັ້ນ, ການກວດສອບງົບປະມານແຫ່ງລັດຍັງມີສິ່ງທ້າທາຍ ແລະ ຂໍ້ຄົງຄ້າງຈໍານວນໜຶ່ງ; ສະນັ້ນ, ເພື່ອເສີມຂະຫຍາຍດ້ານຕັ້ງໜ້າ  ແລະ ສືບຕໍ່ແກ້ໄຂການລະເມີດກົດໝາຍ, ລະເມີດວິໄນແຜນການ-ການເງິນຢູ່ໃນບັນດາເປົ້າໝາຍທີ່ຖືກກວດສອບຢູ່ຂັ້ນສູນກາງ ແລະ ທ້ອງຖິ່ນນັ້ນ, ຈຶ່ງສະເໝີມາຍັງກອງປະຊຸມພິຈາລະນາບາງຂໍ້ມູນ ແລະ ຂໍ້ສະເໜີແນະທີ່ສຳຄັນ ເຊິ່ງອົງການກວດສອບແຫ່ງລັດໄດ້ສະເໜີຢູ່ໃນບົດລາຍງານສະຫລຸບຂາດຕົວການຈັດຕັ້ງປະຕິບັດງົບປະມານແຫ່ງລັດ ປະຈຳສົກປີ 2015-2016 ຕໍ່ກອງປະຊຸມຮ່ວມຄັ້ງນີ້ ເພື່ອໃຫ້ກອງປະຊຸມຊີ້ນໍາ ແລະ ມີຄວາມເປັນເອກະພາບ ກ່ອນທີ່ຈະລາຍງານຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII.

ກອງປະຊຸມໄດ້ຮັບຟັງການລາຍງານກ່ຽວກັບຜົນການກວດສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016 ຈາກທ່ານປະທານອົງການກວດສອບແຫ່ງລັດ, ລາຍງານກ່ຽວກັບສະພາບການຈັດຕັ້ງປະຕິບັດການແກ້ໄຂຜົນການກວດສອບບົດສະຫລຸບຂາດຕົວງົບປະມານແຫ່ງລັດ ສົກປີ 2013-2014 ແລະ ສົກປີ 2015-2016 ຈາກທ່ານຮອງນາຍົກລັດຖະມົນຕີ, ປະທານອົງການກວດກາລັດຖະບານ; ພ້ອມນັ້ນ, ຍັງໄດ້ຮັບຟັງການປະກອບຄຳເຫັນຕໍ່ຜົນການກວດກາ ຕາມຜົນການກວດສອບຂອງທ່ານປະທານກຳມາທິການແຜນການ, ການເງິນ ແລະ ການກວດສອບ ແລະ ທ່ານລັດຖະມົນຕີກະຊວງແຜນການ ແລະ ການລົງທຶນ, ຮັບຟັງຄຳເຫັນເຈາະຈີ້ມຈາກປະທານກອງປະຊຸມ ແລະ ຜູ້ແທນກອງປະຊຸມປະກອບຄຳຄິດຄຳເຫັນ.

ໂອກາດດັ່ງກ່າວ, ກອງປະຊຸມຍັງໄດ້ຮັບຟັງການສະເໜີຜ່ານມະຕິກອງປະຊຸມ ແລະ ພ້ອມກັນປະກອບຄຳຄິດຄຳເຫັນຕໍ່ເນື້ອໃນຮ່າງມະຕິກອງປະຊຸມດັ່ງກ່າວອີກດ້ວຍ.