ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສ​ພ​ຊ) ໃນວັນທີ 20 ຕຸລາ 2021 ທີ່ສະພາແຫ່ງຊາດ,ນະຄອນຫລວງວຽງຈັນ ໄດ້ມີກອງປະຊຸມຄົບຄະນະ ຂອງກຳມາທິການບັນດາເຜົ່າ (ກບ​ຜ) ໃນ​ຮູບ​ແບບ​ປະ​ຊຸມ​ທາງ​ໄກ ພາຍໃຕ້ການເປັນປະທານຂອງທ່ານ ຄຳຈັນ ໂສຕາປະເສີດ ປະທານ​; ເຂົ້າຮ່ວມກອງ​ປະ​ຊຸມ​ມີທ່ານ ພົທ. ສຸວອນ ເລືອງບຸນມີຮອງປະທານສະພາແຫ່ງຊາດ, ຜູ້ຊີ້ນຳວຽກ​ງານ​ຂອງ ກບ​ຜ, ມີບັນດາປະທານ-ຮອງປະທານກໍາມາທິການຂອງ​ສະ​ພາ​ແຫ່ງ​ຊາດ,ບັນດາສະມາຊິກສະພາແຫ່ງຊາດທີ່ເປັນກໍາມະການຂອງ ກບ​ຜ,ຄະນະເລຂາທິການສະພາແຫ່ງຊາດ, ກົງຈັກທີ່ຄະນະປະຈຳສະພາແຫ່ງຊາດສ້າງຕັ້ງ, ຮອງປະທານສູນກາງແນວລາວສ້າງຊາດ, ສູນກາງຊາວໜຸ່ມປະຊາຊົນປະຕິວັດລາວ, ສູນກາງສະຫະພັນແມ່ຍິງລາວ, ສູນກາງສະຫະພັນກຳມະບານລາວ, ສະຖາບັນວິທະຍາສາດສົງຄົມ ແຫ່ງຊາດ, ຮອງຜູ້ອໍານວຍການທະນາຄານພັດທະນາຊົນນະບົດ, ກົມຊົນເຜົ່າ-ສາສະໜາ ກະຊວງພາຍໃນ, ກົມພັດທະນາຊົນນະບົດ ແລະ ສະຫະກອນ ກະຊວງກະສິກໍາ-ປ່າໄມ້ພ້ອມດ້ວຍພະນັກງານ-ລັດ​ຖະ​ກອນພາຍໃນ ກບ​ຜ ເຂົ້າຮ່ວມທັງ​ໝົດ 66 ທ່ານ ຍິງ 22 ທ່ານ.

ຈຸດປະສົງແມ່ນເພື່ອເປັນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ XI ຂອງພັກປະຊາຊົນປະຕິວັດລາວເວົ້າລວມ ເວົ້າສະເພາະການຜັນຂະຫຍາຍມະຕິກອງປະຊຸມຄັ້ງປະຖົມມະລຶກສະພາແຫ່ງຊາດ ຊຸດທີ IX, ສະພາປະຊາຊົນຂັ້ນແຂວງ ຊຸດທີ II ແລະ ຈັດຕັ້ງປະຕິບັດ 2 ວາລະແຫ່ງຊາດຜ່ານການຈັດຕັ້ງປະຕິບັດວຽກງານດັ່ງກ່າວ ມີທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຫລາຍປະການໄປຄ່ຽງຄູ່ກັນ, ແຕ່ພາຍໃຕ້ການຊີ້ນຳຢ່າງໃກ້ຊິດຂອງການນໍາ ສະພາແຫ່ງຊາດໂດຍສະເພາະຮອງປະທານສະພາແຫ່ງຊາດ ຜູ້ຊີ້ນຳ ກບ​ຜ ແລະ ສະພາປະຊາຊົນຂັ້ນແຂວງ ດ້ວຍຄວາມເອົາໃຈໃສ່ນໍາພາຂອງຄະນະກໍາມາທິການ, ກໍາມະການຂອງ ກບ​ຜ ສົມທົບກັບຄວາມຮູ້ຄວາມສາມາດ ແລະ ຄວາມສາມັກຄີ ເປັນປຶກແຜ່ນ ຂອງພະນັກງານ-ລັດຖະກອນ, ໃນໄລຍະ 1 ປີຜ່ານມາສາມາດສັງລວມໄດ້ຜົນງານ ດ້ານດີ, ຂໍ້ຄົງຄ້າງຈໍານວນໜຶ່ງ ທີ່ຕ້ອງໄດ້ສືບຕໍ່ແກ້ໄຂ ແລະ ກຳນົດທິດທາງແຜນການເຄື່ອນໄຫວໃນຕໍ່ໜ້າ.

ກອງປະຊຸມໄດ້ຮັບການຜ່ານຮ່າງບົດສະຫລຸບການເຄື່ອນໄຫວວຽກງານ ປະຈຳປີ 2021 ແລະ ຮ່າງທິດທາງແຜນການເຄື່ອນໄຫວ ປະຈຳປີ 2022 ຂອງ ກບ​ຜ, ໄດ້ຮັບຟັງບາງເນື້ອໃນ ມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຈັດຕັ້ງ ແລະ ເຄື່ອນໄຫວຂອງ ກບ​ຜບາງເນື້ອໃນຂໍ້ຕົກລົງຂອງເລຂາທິການສະພາແຫ່ງຊາດ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງ 2 ກົມ ທີ່ເປັນເສນາທິການຂອງ ກບ​ຜ, ວຽກງານປະສານງານຢູ່ຂັ້ນສູນກາງ ໄດ້ມີຂໍ້ຕົກລົງຮ່ວມ ສະບັບເລກທີ01/ຄປຈ, ລົງວັນທີ 22 ພຶດສະພາ 2019 ວ່າດ້ວຍການປະສານງານລະຫວ່າງ ຄະນະປະຈໍາສະພາແຫ່ງຊາດ ກັບຄະນະປະຈຳສູນກາງແນວລາວສ້າງຊາດ ແລະມະຕິເລກທີ 062/ຄປຈ, ວ່າດ້ວຍການປະສານງານ ລະຫວ່າງກບ​ຜ ກັບອົງການພາກສ່ວນທີ່ກ່ຽວຂ້ອງ, ນິຕິກຳໃຕ້ກົດ​ໝາຍ2 ສະບັບນີ້ ທາງ ກບ​ຜ ໄດ້ຮັບການຊີ້ນຳໃຫ້ປັບປຸງເພື່ອເຮັດໃຫ້ສອດຄ່ອງກັບໜ້າວຽກໃນໄລຍະໃໝ່.

ໂອ​ກາດ​ດັ່ງ​ກ່າວ, ທ່ານ ພົທ. ສຸວອນ ເລືອງບຸນມີ ໄດ້​ມີ​ຄ​ໍາ​ເຫັນ​ໂອ້​ລົມ ແລະ ເນັ້ນບາງບັນຫາ ເປັນ​ຕົ້ນ​ແມ່ນ ຂໍໃຫ້ກໍາແໜ້ນ ແລະ ຍຶດໝັ້ນແນວທາງປ່ຽນແປງໃໝ່ຂອງພັກ, ລັດຖະທໍາມະນູນ, ກົດໝາຍ ແລະ ນິຕິກຳໃຕ້ກົດໝາຍ; ເອົາໃຈໃສ່ວຽກງານໂຄສະນາ-ສຶກສາອົບຮົມປະຊາຊົນຕາມແນວທາງຂອງພັກ, ປະຕິບັດນະໂຍບາຍແລະ ແຜນພັດທະນາເສດຖະກິດ-ສັງຄົມຂອງລັດ, ສ້າງ ແລະຮັກສາໄດ້ມູນເຊື້ອຄວາມສາມັກຄີປອງດອງພາຍໃນຊາດ; ສາມາດປະຕິບັດສິດ ແລະ ໜ້າທີ່ຂອງສະມາຊິກສະພາແຫ່ງຊາດກໍຄືສິດ ແລະ ໜ້າທີ່ຂອງກໍາມາທິການບັນດາເຜົ່າໃຫ້ໜັກແໜ້ນເຂັ້ມແຂງກວ່າເກົ່າ; ສູ້ຊົນປະຕິບັດແຜນການສ້າງຄວາມເຂັ້ມແຂງ ໃຫ້ແກ່ບັນດາທ່ານສະມາຊິກສະພາແຫ່ງຊາດ ທີ່ເປັນກໍາມະການຂອງ ກບ​ຜ ແລະ ພະນັກງານ-ລັດຖະກອນ ທີ່ເປັນເສນາທິການ ນັບທັງຢູ່ຂັ້ນສູນກາງແລະ ທ້ອງຖິ່ນ; ໃນນັ້ນ ໃຫ້ກບ​ຜ ສ້າງຄູ່ມືການເຄື່ອນໄຫວວຽກງານຂອງ ກບ​ຜ ແລະ ຈັດຕັ້ງກອງປະຊຸມເຝິກອົບຮົມ ໃຫ້ເປົ້າໝາຍທີ່ກ່າວມາ ເພື່ອສ້າງຄວາມຮັບຮູ້, ເຂົ້າໃຈ ແລະ ຈັດຕັ້ງປະຕິບັດໄປລວງດຽວກັນ ແລະ ບັນ​ຫາ​ອື່ນໆ​ອີກ​ຈຳ​ນວນ​ໜຶ່ງ.

(ອານຸສອນ ພູ​ມີ​ທອນ)