ສະພາແຫ່ງຊາດ ແຫ່ງ ສປປ ລາວ
The National Assembly of the LAO PDR

(ສພຊ) ລະຫວ່າງວັນທີ 20-21 ພຶດສະພາ 2021 ທີ່ສະພາແຫ່ງຊາດ ນະຄອນຫລວງວຽງຈັນ ຄະນະປະຈໍາສະພາແຫ່ງຊາດ ໄດ້ດໍາເນີນກອງປະຊຸມປະຈໍາເດືອນພຶດສະພາ 2021 ໂດຍການເປັນປະທານຂອງທ່ນ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະ ນະປະຈໍາສະພາແຫ່ງຊາດ; ພ້ອມດ້ວຍບັນດາທ່ານຮອງປະທານຄະນະປະຈໍາສະພາແຫ່ງຊາດ, ບັນດາທ່ານກໍາມະການຄະນະປະຈໍາສະພາແຫ່ງຊາດ ເຂົ້າຮ່ວມຢ່າງພ້ອມພຽງ.

ກອງປະຊຸມຄະນະປະຈໍາສະພາແຫ່ງຊາດໃນຄັ້ງນີ້ ຈະດໍາເນີນດ້ວຍການນໍາໃຊ້ຮູບແບບກອງປະຊຸມທາງໄກ ເພື່ອໃຫ້ສອດຄ່ອງກັບສະພາບການສະກັດກັ້ນ ການແຜ່ລະບາດຂອງພະຍາດ ໂຄວິດ-19.  ກອງປະຊຸມຄະນະປະຈໍາສະພາແຫ່ງຊາດ ຈະໄດ້ສຸມໃສ່ພິຈາລະນາການປັບປຸງບັນດານິຕິກໍາ ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານຂອງບັນດາກົງຈັກການຈັດຕັ້ງພາຍໃນສະພາແຫ່ງຊາດ ເປັນຕົ້ນຄະນະປະຈໍາສະພາແຫ່ງຊາດ, ບັນດາກໍາມາທິການຂອງສະພາແຫ່ງຊາດ, ຄະນະເລຂາທິການສະພາແຫ່ງຊາດ,​ ສະຖາບັນຄົ້ນຄວ້ານິຕິກໍາຂອງສະພາແຫ່ງຊາດ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ເພື່ອກໍານົດເນື້ອໃນໃຫ້ຮັດກຸມ, ລະອຽດ, ຈະແຈ້ງ, ບໍ່ຊໍ້າຊ້ອນໜ້າທີ່ວຽກງານ ເຊິ່ງກັນ ແລະ ກັນ; ບັນດານິຕິກໍາກ່ຽວກັບການຈັດຕັ້ງ ແລະ ການເຄື່ອນໄຫວວຽກງານດັ່ງກ່າວ ຈະເປັນບ່ອນອີງໃນການເຄື່ອນໄຫວວຽກງານຂອງບັນດາກົງຈັກເສນາທິການຂອງສະພາແຫ່ງຊາດ ໃນການຈັດຕັ້ງປະຕິບັດພາລະບົດບາດ,​ ສິດ ແລະ ໜ້າທີ່ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ໃຫ້ໄດ້ຮັບຜົນສໍາເລັດ. ພ້ອມກັນນັ້ນ, ກອງປະຊຸມຄະນະປະຈໍາສະພາແຫ່ງຊາດໃນຄັ້ງນີ້ ຈະໄດ້ພິຈາລະນາວຽກງານອື່ນຈໍານວນໜຶ່ງ ເປັນຕົ້ນວຽກງານກ່ຽວກັບກົດໝາຍ, ວຽກງານຂົງເຂດເສດຖະກິດ-ການເງິນ, ວຽກງານການຕ່າງປະເທດຈໍານວນໜຶ່ງ ເພື່ອເປັນບ່ອນອີງໃຫ້ພາກສ່ວນກ່ຽວຂ້ອງໃນການຈັດຕັ້ງປະຕິບັດ, ນໍາເອົາຜົນປະໂຫຍດມາສູ່ປະເທດຊາດ ແລະ ປະຊາຊົນບັນດາເຜົ່າ.

ແຫຼ່ງຂ່າວທີ່ມາ: ສະພາແຫ່ງຊາດ