ສສຊ ພິຈາລະນາຮ່າງກົດໝາຍ ວ່າດ້ວຍສະຫະພັນນັກຮົບເກົ່າ
18/06/2018

 ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ໃນວັນທີ 13 ມິຖຸນານີ້, ພາຍໃຕ້ການເປັນປະທານ ຂອງ ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ, ບັນດາສະມາຊິກສະພາ ແຫ່ງຊາດ (ສສຊ) ໄດ້ສຸມໃສ່ພິຈາລະນາຮ່າງ ກົດໝາຍວ່າດ້ວຍສະຫະພັນ ນັກຮົບເກົ່າ ຊຶ່ງເປັນກົດໝາຍ ສ້າງຂຶ້ນໃໝ່. ທ່ານ ພົນຈັດຕະວາ ຄຳຜາ ຜ່ອງຈັນແສງ ຮອງປະທານສະຫະພັນນັກຮົບເກົ່າໃຫ້ ຮູ້ວ່າ: ເພື່ອໃຫ້ສອດຄ່ອງກັບສະພາບການ, ເງື່ອນໄຂ ແລະ ຄວາມຕ້ອງການໃນການພັດທະນາອົງການຈັດຕັ້ງສະຫະ ພັນນັກຮົບເກົ່າແຫ່ງຊາດ ໃນໄລຍະໃໝ່, ອີກດ້ານໜຶ່ງໃນໄລຍະຜ່ານມາສະຫະພັນນັກຮົບ ເກົ່າແຫ່ງຊາດລາວຍັງບໍ່ທັນມີ ກົດໝາຍຄຸ້ມຄອງ ມີພຽງແຕ່ ມະຕິຕົກລົງຂອງກົມການເມືອງ ສູນກາງພັກ ສະບັບເລກທີ 68-69/ກມສພ, ລົງວັນທີ 9 ກັນຍາ 2002 ວ່າດ້ວຍການສ້າງຕັ້ງ, ການຈັດຕັ້ງ ແລະ ການເຄື່ອນ ໄຫວຂອງສະຫະພັນນັກຮົບເກົ່າແຫ່ງຊາດລາວ ແລະ ລະບຽບການສະເພາະເທົ່ານັ້ນ, ເມື່ອທຽບໃສ່ກັບຄວາມຮຽກຮ້ອງຕ້ອງການຂອງໜ້າທີ່ການ ເມືອງທີ່ພັກ-ລັດມອບໝາຍໃຫ້ ເຫັນວ່າມີຄວາມຈຳເປັນຕ້ອງ ໄດ້ມີກົດໝາຍ ແລະ ເພື່ອເປັນບ່ອນອີງໃຫ້ແກ່ການຈັດຕັ້ງ ແລະ ເຄື່ອນໄຫວວຽກງານ. ໂຄງປະກອບຂອງຮ່າງກົດໝາຍດັ່ງກ່າວນີ້ ມີທັງໝົດ 11 ພາກ, 4 ໝວດ, 58 ມາດຕາ, ສະຫະພັນນັກຮົບເກົ່າລາວ ແມ່ນອົງການຈັດຕັ້ງການເມືອງ- ສັງຄົມໜຶ່ງ ຊຶ່ງຢູ່ພາຍໃຕ້ການ ນຳພາຂອງພັກປະຊາຊົນປະຕິວັດລາວ ທີ່ເຕົ້າໂຮມບັນດາ ພະນັກງານນັກຮົບເກົ່າໃຫ້ເປັນກຳລັງແຮງ, ສືບຕໍ່ປົກປັກຮັກສາ ແລະ ເສີມຂະຫຍາຍມູນ ເຊື້ອຮັກຊາດ. ສສຊ, ສສຂ ໄດ້ຜັດປ່ຽນປະກອບຄຳຄິດຄຳເຫັນໃສ່ຮ່າງກົດໝາຍສະບັບດັ່ງກ່າວ ເພື່ອໃຫ້ມີເນື້ອໃນສອດຄ່ອງ, ຮັດກຸມ, ຈະແຈ້ງ ແລະ ສົມບູນຂຶ້ນ. ພາຍຫຼັງກົດໝາຍ ວ່າດ້ວຍ ສະຫະພັນນັກຮົບເກົ່າຖືກຮັບ ຮອງ ແລະ ປະກາດໃຊ້ຈະເປັນພື້ນຖານໃນການຄຸ້ມຄອງ, ຕິດຕາມ, ກວດກາ ແລະ ປະຕິບັດ ວຽກງານຂອງສະຫະພັນນັກ ຮົບເກົ່າລາວໃຫ້ຖືກຕ້ອງ ແລະ ສອດຄ່ອງກັບສະພາບຄວາມ ເປັນຈິງ.