ບັນດາທ່ານ ສສຊ ປະກອບຄຳເຫັນໃສ່ບົດລາຍງານຂອງທ່ານນາຍົກລັດຖະມົນຕີ
07/06/2018

(ສພຊ)ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ຈະດໍາເນີນລະຫວ່າງວັນທີ 5-28 ມິຖຸນາ 2018 ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນຫລວງວຽງຈັນ.ຕາມວາລະດໍາເນີນກອງປະຊຸມ ລະຫວ່າງວັນທີ 5-7 ມິຖຸນາ 2018 ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ. ພາຍຫລັງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ກ່າວສູນທອນພົດໄຂກອງປະຊຸມຢ່າງເປັນທາງການແລ້ວ, ບັນດາທ່ານສະມາຊິກສະພາແຫ່ງຊາດ (ສສຊ) ແລະ ຜູ້ເຂົ້າຮ່ວມກອງປະຊຸມ ໄດ້ຮັບຟັງບົດລາຍງານກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 4 ເດືອນ, ຄາດຄະເນການປະຕິບັດແຜນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມ ປະຈໍາ 6 ເດືອນທ້າຍປີ 2018 ຈາກ ທ່ານ ທອງລຸນ ສີສຸລິດ ນາຍົກລັດຖະມົນຕີ. ຫລັງຈາກນັ້ນ, ໄດ້ຮັບຟັງບົດປະກອບຄໍາເຫັນ ຂອງຄະນະປະຈໍາສະພາແຫ່ງຊາດ ຕໍ່ບົດລາຍງານຂອງນາຍົກລັດ ຖະມົນຕີ ຈາກທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ; ພາຍຫລັງປະທານກອງປະຊຸມມີຄໍາຖາມເຈາະຈີ້ມ ແລະ ໃຫ້ທິດຊີ້ນໍາໃນການປະກອບຄໍາເຫັນ, ບັນດາທ່ານສະມາຊິກສະພາແຫ່ງຊາດໄດ້ປະກອບຄໍາເຫັນ ຕໍ່ບົດລາຍງານຂອງທ່ານນາຍົກລັດຖະມົນຕີຢ່າງກົງໄປກົງມາ ແລະ ພາວະວິໄສ. ຜູ້ຕາງໜ້າທະນາຄານແຫ່ງ ສປປລາວ ໄດ້ຊີ້ແຈງຕໍ່ບັນຫາທີ່ ສສຊ ໃຫ້ຄວາມສົນໃຈໃນຕອນບ່າຍຂອງວັນທີ 6 ມິຖຸນາ 2018 ໂດຍທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ ສປປລາວ. ວັນທີ 7 ມິຖຸນາ 2018 ກອງປະຊຸມໄດ້ຮັບຟັງການຊີ້ແຈງກ່ຽວກັບການແກ້ໄຂໜີ້ 3 ແຈ ຈາກທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ; ຮັບຟັງການຊີ້ແຈງ 3 ບັນຫາຄື: ການຄິດໄລ່ GNI ກັບ GDP ຂອງປະເທດເຮົາ, ກົນໄກການສ້າງແຜນໂຄງການລົງທຶນຂອງລັດມູນຄ່າ 20 ຕື້ກີບຂຶ້ນໄປ ແລະ ກົນໄກການປະສານງານໃນການຄຸ້ມຄອງໂຄງການລົງທຶນຂອງລັດ ຕາມຂະແໜງການ ຈາກທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ; ຮັບຟັງການຊີ້ແຈງກ່ຽວກັບການແກ້ໄຂສິ່ງກີດຂວາງການດໍາເນີນທຸລະກິດທ່ອງທ່ຽວ ຈາກທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ; ຮັບຟັງການຊີ້ແຈງ 2 ບັນຫາຄື: ການປະຕິບັດນະໂຍບາຍຕໍ່ນັກຮຽນໂຮງຮຽນຊົນເຜົ່າ ແລະ ການຈັດແບ່ງໂກຕາລັດຖະກອນຄູປີ 2018 ຈາກທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ; ຮັບຟັງບົດລາຍງານຂອງລັດຖະບານ ກ່ຽວກັບການປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍການອອກນິຕິກໍາລຸ່ມກົດໝາຍ ຈາກທ່ານ ໄຊສີ ສັນຕິວົງ ລັດຖະມົນຕີກະຊວງຍຸຕິທໍາ; ຫລັງຈາກນັ້ນ ທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ, ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄໍາເຫັນຕໍ່ບົດລາຍງານຂອງລັດຖະບານ. ຈາກນັ້ນ, ທ່ານປະທານກອງປະຊຸມ ໄດ້ມີຄໍາຖາມເຈາະຈີ້ມ ແລະ ໃຫ້ທິດຊີ້ນໍາໃນປະກອບຄໍາເຫັນ ຕໍ່ບົດລາຍງານຂອງລັດຖະບານ, ບັນດາທ່ານສະມາຊິກສະພາແຫ່ງຊາດ ໄດ້ສຸມສະຕິປັນຍາເຂົ້າໃນການປະກອບຄໍາເຫັນຕໍ່ບົດລາຍງານຂອງລັດຖະບານ. ກອງປະຊຸມຍັງໄດ້ຮັບຟັງບົດລາຍງານຂອງລັດຖະບານ ກ່ຽວກັບການປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍຜົນກະທົບຈາກການນໍາໃຊ້ເຄມີອັນຕະລາຍ ເກີນຄ່າມາດຕະຖານຕໍ່ສິ່ງແວດລ້ອມ, ສັງຄົມ ແລະ ທໍາມະຊາດ ຈາກທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ. ຫລັງຈາກນັ້ນ, ທ່ານ ບຸນປອນ ສີສຸລາດ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄໍາເຫັນຕໍ່ບົດລາຍງານຂອງລັດຖະບານ ກ່ຽວກັບການປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 018/ສພຊ, ລົງວັນທີ 28 ພະຈິກ 2016 ວ່າດ້ວຍຜົນກະທົບຈາກການນໍາໃຊ້ເຄມີອັນຕະລາຍ ເກີນຄ່າມາດຕະຖານຕໍ່ສິ່ງແວດລ້ອມ, ສັງຄົມ ແລະ ທໍາມະຊາດ. ຫລັງຈາກນັ້ນ, ທ່ານປະທານກອງປະຊຸມໄດ້ມີຄໍາຖາມເຈາະຈີ້ມ ແລະ ໃຫ້ທິດຊີ້ນໍາໃນການປະກອບຄໍາເຫັນ ຕໍ່ບົດລາຍງານຂອງລັດຖະບານ. ຈາກນັ້ນ, ບັນດາທ່ານສະມາຊິກສະພາແຫ່ງຊາດ ໄດ້ປະກອບຄໍາເຫັນ ຕໍ່ບົດລາຍງານຂອງລັດຖະບານຢ່າງກົງໄປກົງມາ ແລະ ດ້ວຍຄວາມຮັບຜິດຊອບສູງ. ກອງປະຊຸມຍັງໄດ້ຮັບຟັງບົດຊີ້ແຈງຂອງລັດຖະບານ ກ່ຽວກັບໂຄງປະກອບລາຄານໍ້າມັນ ຢູ່ປະເທດເຮົາ, ສາ ເຫດການເພີ່ມຂຶ້ນຂອງລາຄານໍ້າມັນ ທີ່ພວມສົ່ງຜົນກະທົບຕໍ່ການຜະລິດ, ຊີວິດການເປັນຢູ່ຂອງປະຊາຊົນ ຈາກທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ. ຈາກນັ້ນ, ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບ, ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄໍາເຫັນຕໍ່ບົດຊີ້ແຈງລັດຖະມົນຕີກະຊວງອຸດສາຫະກໍາ ແລະ ການຄ້າ ກ່ຽວກັບໂຄງປະກອບລາຄານໍ້າມັນຢູ່ປະເທດເຮົາ. ຫລັງຈາກນັ້ນ, ບັນດາທ່ານສະມາຊິກສະພາແຫ່ງຊາດ ໄດ້ມີຄໍາຊັກຖາມເພີ່ມເຕີມ ຕໍ່ບັນຫາທີ່ໃຫ້ຄວາມສົນໃຈ. ໃນຕອນທ້າຍທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ຊີ້ແຈງກັບທີ່ຕໍ່ຄໍາຊັກຖາມຂອງ ສສຊ ໃຫ້ຄວາມສົນໃຈ.