ຮອງປະທານສະພາແຫ່ງຊາດ ຊີ້ນຳການກະກຽມຮັບໃຊ້ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII
01/06/2018

(ສພຊ) ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ຊີ້ນໍາການກະກຽມຮັບໃຊ້ກອງປະຊຸຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ໃນຕອນເຊົ້າວັນທີ 28 ພຶດສະພາ 2018 ຢູ່ຫ້ອງປະຊຸມຄະນະເລຂາທິການສະພາແຫ່ງຊາດ (ຫລັກ 6), ນະຄອນຫລວງວຽງຈັນ ໂດຍມີຄະນະເລຂາທິການ, ບັນດາຫົວໜ້າ-ຮອງຫົວໜ້າກົມ ແລະ ຕາງໜ້າຂອງກົມທີ່ສັງກັດຄະນະເລຂາທິການສະພາແຫ່ງຊາດ, ກໍາມາທິການ ແລະ ອົງການຈັດຕັ້ງທີ່ຄະນະປະຈໍາສ້າງຕັ້ງຂຶ້ນເຂົ້າຮ່ວມ.

          ຮອງປະທານສະພາແຫ່ງຊາດ ຊີ້ນໍາໃຫ້ກອງເລຂາກອງປະຊຸມ ໂດຍສະເພາະກົມທີ່ກ່ຽວຂ້ອງກັບບັນດາເນື້ອໃນທີ່ຈະມາຜ່ານກອງປະຊຸຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ເຊິ່ງຈະໄດ້ຈັດຂຶ້ນໃນລະຫວ່າງວັນທີ 5-28 ມິຖຸນາ 2018, ທ່ານໄດ້ເນັ້ນໃຫ້ມີການປະສານງານ ແລະ ກະກຽມແຕ່ຫົວທີ ເປັນຕົ້ນແມ່ນວຽກງານກ່ຽວກັບລັດຖະບານ, ວຽກງານຂອງສານປະຊາຊົນສູງສຸດ, ວຽກງານຂອງສະພາແຫ່ງຊາດ ແລະ ວຽກງານອື່ນທີ່ກ່ຽວຂ້ອງ, ໃນນັ້ນລວມທັງວຽກງານບໍລິຫານ-ພິທິການ, ວຽກງານໂຄສະນາຜ່ານສື່ມວນຊົນ.ຕອນທ້າຍ ທ່ານຍັງໄດ້ຮຽກຮ້ອງໃຫ້ບັນດາຜູ້ເຂົ້າຮ່ວມກອງປະຊຸມ ໃນຖານະເປັນກອງເລຂາຮັບໃຊ້ກອງປະຊຸມຈົ່ງປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ເພື່ອເຮັດໃຫ້ກອງປະຊຸມໄດ້ຮັບຜົນສໍາເລັດຕາມຄາດໜາຍທີ່ວາງໄວ້.