ປະຖະກະຖາບາງບົດຮຽນຂອງສະພາແຫ່ງຊາດ ສສ.ຫວຽດນາມ
25/04/2018

(ສພຊ) ກອງປະຊຸມປາຖະກະຖາບົດຮຽນຂອງສະພາແຫ່ງຊາດ ສສ.ຫວຽດນາມ ກ່ຽວກັບການລົງມະຕິໄວ້ວາງໃຈຕໍ່ບຸກຄະລາກອນທີ່ສະພາແຫ່ງຊາດ ຫລື ສະພາປະຊາຊົນຂັ້ນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ ໄດ້ມີຂຶ້ນໃນຕອນເຊົ້າວັນທີ 24 ເມສາ 2018 ໂດຍການເປັນປະທານຮ່ວມຂອງສະຫາຍ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ສະຫາຍ ນາງ ຕ໋ອງ ທີ ຟອງ ກຳມະການກົມການເມືອງສູນກາງພັກຄອມມຸຍນິດຫວຽດນາມ, ຮອງປະທານ, ຜູ້ປະຈຳການສະພາແຫ່ງຊາດ ແຫ່ງ ສສ.ຫວຽດນາມ ແລະ ສະຫາຍ ສົມພັນ ແພງຄຳມີ ກຳມະການສູນກາງພັກ, ຮອງປະທານສະພາແຫ່ງຊາດ; ມີບັນດາທ່ານການນຳພັກ-ລັດ ພ້ອມດ້ວຍສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ/ນະຄອນຫລວງ ແລະ ພະນັກງານທີ່ກ່ຽວຂ້ອງ ເຂົ້າຮ່ວມທັງໝົດຈຳນວນ 182 ທ່ານ.

ທີ່ປະຊຸມ, ຜູ້ເຂົ້າຮ່ວມໄດ້ຮັບຟັງການສະເໜີບົດຮຽນຂອງສະພາແຫ່ງຊາດ ສສ.ຫວຽດນາມ ກ່ຽວກັບການຂັ້ນຕອນການລົງມະຕິໄວ້ວາງໃຈ ຕາມມະຕິຂອງສະພາແຫ່ງຊາດ ຫວຽດນາມຊຸດທີ XIII ສະບັບເລກທີ 85/2014/QH13, ການລົງມະຕິໄວ້ວາງໃຈຕໍ່ບຸກຄະລາກອນທີ່ສະພາແຫ່ງຊາດ ຫລື ສະພາປະຊາຊົນຂັ້ນແຂວງເລືອກຕັ້ງ ແລະ ຮັບຮອງເອົາການສະເໜີການແຕ່ງຕັ້ງ ພ້ອມດ້ວຍບັນດາຂໍ້ມູນພື້ນຖານຈຳນວນໜຶ່ງ ເພື່ອຮັບໃຊ້ເຂົ້າໃນວຽກງານການລົງມະຕິໄວ້ວາງໃຈ; ພ້ອມນັ້ນ, ຜູ້ເຂົ້າຮ່ວມຍັງໄດ້ສົນທະນາແລກປ່ຽນບົດຮຽນຢ່າງກົງໄປກົງມາ ເຮັດໃຫ້ກອງປະຊຸມໄດ້ຮັບຜົນສຳເລັດຕາມລະດັບຄາດໝາຍ.

(ນາງ ປາກາລັກ ພົມມີໄຊ)