ສພຊ ຈັດກອງປະຊຸມສຳມະນາກ່ຽວກັບບາງເນື້ອໃນ ທີ່ຈະນໍາເຂົ້າພິຈາລະນາ ໃນກອງປະຊຸມສະໄໝສາມັນເທື່ອທີ 5
24/04/2018

(ສພຊ) ວັນທີ 23 ເມສາ 2018 ທີ່ຫ້ອງປະຊຸມສະພາແຫ່ງຊາດ (ສພຊ) ຫລັກ 6  ກອງປະຊຸມສໍາມະນາກ່ຽວກັບເນື້ອໃນທີ່ຈະນໍາເຂົ້າພິຈາລະນາ ໃນກອງປະຊຸມສະໄໝສາ ມັນເທື່ອທີ 5 ຂອງ ສພຊ ຊຸດທີ VIII ໄດ້ໄຂຂຶ້ນຢ່າງເປັນທາງການ ໂດຍການເປັນປະທານຂອງທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ, ມີບັນດາທ່ານຮອງປະທານ ສພຊ, ຄະນະປະຈໍາ ສພຊ, ບັນດາສະມາຊິກສະພາແຫ່ງຊາດ, ບັນດາລັດຖະມົນຕີ-ຮອງລັດຖະມົນຕີຈາກກະຊວງທີ່ກ່ຽວຂ້ອງ, ຫົວໜ້າອົງການໄອຍະການປະຊາຊົນສູງສຸດ, ປະທານສານປະຊາຊົນສູງສຸດ, ປະທານອົງການກວດສອບແຫ່ງລັດ ແລະ ປະທານອົງ ການກວດກາລັດຖະບານເຂົ້າຮ່ວມ.

          ທັງນີ້, ກໍເພື່ອເຮັດໃຫ້ບັນດາເນື້ອໃນທີ່ຈະນໍາສະເໜີຕໍ່ກອງປະຊຸມສະໄໝສາມັນເທື່ອທີ 5 ຂອງ ສພຊ ຊຸດທີ VIII ໄດ້ຮັບການປະກອບຄໍາເຫັນຢ່າງເລິກເຊິ່ງຈາກສະມາ ຊິກສະພາແຫ່ງຊາດ ແລະ ມີຄວາມເປັນເອກະພາບສູງຕໍ່ເນື້ອໃນຕ່າງໆ ແນໃສ່ເຮັດໃຫ້ການພິຈາລະນາຮັບຮອງບັນດາເນື້ອໃນຂອງກອງປະຊຸມສະໄໝສາມັນເທື່ອທີ 5 ຂອງ ສພຊ ຊຸດທີ VIII ໄດ້ຮັບຜົນສໍາເລັດ, ບັນລຸໄດ້ຕາມລະດັບຄາດໝາຍທີ່ວາງໄວ້, ຍົກສູງປະສິດທິພາບໃນການກະກຽມ ແລະ ດໍາເນີນກອງປະຊຸມສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຮັດໃຫ້ພິຈາລະນາ ແລະ ຮັບຮອງເອົາບັນຫາຕ່າງໆມີຄຸນນະພາບ ແນໃສ່ເຮັດໃຫ້ການປະຕິບັດພາລະບົດບາດຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງນັບມື້ນັບສູງຂຶ້ນ ແລະ ເພື່ອສ້າງເງື່ອນໄຂໃຫ້ບັນດາກະຊວງ, ຂະແໜງການ ແລະ ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ ໄດ້ແລກປ່ຽນຄໍາຄິດຄໍາເຫັນໃນວຽກງານຕ່າງໆ ເພືື່ອຮັບປະກັນໃຫ້ແກ່ການດໍາເນີນກອງປະຊຸມສະພາແຫ່ງຊາດ ແລະ ກອງປະຊຸມສະພາປະຊາຊົນຂັ້ນແຂວງ ກໍຄືການປະຕິບັດພາລະບົດບາດຂອງແຕ່ລະພາກສ່ວນມີຄຸນນະພາບນັບມື້ນັບດີຂຶ້ນ.

          ທ່ານຮອງປະທານ ສພຊ ໄດ້ມີຄໍາເຫັນຕໍ່ກອງປະຊຸມວ່າ: ເພື່ອເຮັດໃຫ້ການຄົ້ນຄວ້າ ປະກອບຄໍາເຫັນຂອງບັນດາທ່ານສະມາຊິກສະພາແຫ່ງຊາດ ຢູ່ກອງປະຊຸມສໍາມະນາຄັ້ງນີ້ ມີຄວາມເລິກເຊິ່ງ ແລະ ໄດ້ຮັບຜົນດີນັ້ນ ໂດຍການຊີ້ນໍາຂອງຄະນະປະຈໍາສະພາແຫ່ງຊາດ, ຄະນະຮັບຜິດຊອບກອງປະຊຸມສໍາມະນາ ໄດ້ເລືອກເອົາບັນດາເນື້ອໃນທີ່ຈະນໍາເຂົ້າພິຈາລະ ນາຢູ່ກອງປະຊຸມສະໄໝສາມັນເທື່ອທີ 5 ຂອງ ສພຊ ຊຸດທີ VIII ທີ່ເຫັນວ່າມີຄວາມສໍາຄັນຫລາຍ, ລວມທັງຕິດພັນກັບສິດ ແລະ ຜົນປະໂຫຍດລວມຂອງຊາດ ແລະ ປະຊາຊົນບັນດາເຜົ່າ, ເພື່ອລະດົມຄໍາເຫັນຈາກບັນດາທ່ານສະມາຊິກສະພາແຫ່ງຊາດ ເຊິ່ງປະກອບມີ 5 ເນື້ອໃນຄື: 1. ຮ່າງແຜນແມ່ບົດຈັດສັນທີ່ດິນແຫ່ງຊາດ; 2. ຮ່າງກົດໝາຍວ່າດ້ວຍການແກ້ໄຂຂໍ້ຂັດແຍ່ງທາງດ້ານເສດຖະກິດ (ສະບັບປັບປຸງ); 3. ຮ່າງກົດໝາຍວ່າດ້ວຍການຈັດສັນພູມລໍາເນົາ ແລະ ອາຊີບ (ກົດໝາຍໃໝ່); 4. ຮ່າງກົດໝາຍວ່າດ້ວຍອາກອນມູນຄ່າເພີ່ມ (ສະບັບປັບປຸງ); ແລະ 5. ຮ່າງກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ (ກົດໝາຍໃໝ່).

ພ້ອມດຽວກັນນັ້ນ, ທ່ານຮອງປະທານສະພາແຫ່ງຊາດ ຍັງໄດ້ຮຽກຮ້ອງມາຍັງບັນດາທ່ານຜູ້ແທນເຂົ້າຮ່ວມກອງປະຊຸມ ຈົ່ງໄດ້ພ້ອມກັນສຸມເຫື່ອແຮງ, ສະຕິປັນຍາເຂົ້າໃນການຄົ້ນຄວ້າ, ປະກອບຄໍາເຫັນ ໂດຍຍົກເອົາບົດຮຽນ, ປະສົບການຂອງການເຄື່ອນ ໄຫວວຽກງານ, ສະພາບການທີ່ເກີດຂຶ້ນຢູ່ເຂດເລືອກຕັ້ງຂອງຕົນ ເພື່ອຍົກຂຶ້ນແລກປ່ຽນ ແລະ ເປັນຂໍ້ມູນໃຫ້ກອງປະຊຸມ, ກະຊວງກ່ຽວຂ້ອງນໍາໄປຄົ້ນຄວ້າປັບປຸງເນື້ອໃນຂອງເອກະສານໃຫ້ສອດຄ່ອງກັບຄວາມເປັນຈິງຂອງ ສປປລາວ, ສາມາດຈັດຕັ້ງປະຕິບັດໄດ້ຍາວນານ, ນໍາເອົາຜົນປະໂຫຍດມາສູ່ປະເທດຊາດ ແລະ ປະຊາຊົນບັນດາເຜົ່າ.

(ສອນສັກ ວັນວິໄຊ)