ຮອງປະທານສະພາແຫ່ງຊາດ ໃຫ້ທິດຊີ້ນຳ ສານປະຊາຊົນສູງສຸດ ຕ້ອງເອົາໃຈໃສ່ຕື່ມບາງບັນຫາ
09/04/2018

ກອງປະຊຸມສະຫຼຸຸບຜົນ ງານ ປະຈຳປີ 2017 ແລະ ທິດ ທາງແຜນການປີ 2018 ຂອງສານປະຊາຊົນສູງສຸດ ໄດ້ຈັດ ຂຶ້ນໃນລະຫວ່າງວັນທີ 2-3 ເມສາຜ່ານມາ ທີ່ສານປະຊາຊົນສູງສຸດ, ພາຍໃຕ້ການເປັນ ປະທານຂອງທ່ານ ຄຳພັນ ສິດ ທິດຳພາ ປະທານສານປະຊາຊົນສູງສຸດ ແລະ ໃຫ້ກຽດເຂົ້າຮ່ວມໂອ້ລົມຕໍ່ກອງປະຊຸມຂອງ ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ. ໃນການໂອ້ລົມ, ທ່ານຮອງປະທານສະພາແຫ່ງຊາດ ໄດ້ໃຫ້ທິດຊີ້ນຳ 7 ບັນຫາໃຫຍ່ ຄື: ໜຶ່ງ, ເພື່ອຮັບປະກັນໃຫ້ ການບໍລິຫານສານ-ບໍລິຫານ ຄະດີມີຄຸນນະພາບ ແລະ ປະສິດທິພາບສູງນັ້ນກ່ອນອື່ນໝົດພວກສະຫາຍຕ້ອງສຸມໃສ່ ການສຶກສາອົບຮົມການເມືອງ - ແນວຄິດ ໃຫ້ສະມາຊິກພັກ, ພະນັກ ງານຂອງສານ ໂດຍສະເພາະຜູ້ພິພາກສາໃຫ້ຮັບຮູ້ ແລະ ມີຄວາມເປັນເອກະພາບ ສູງຕໍ່ແນວທາງນະໂຍບາຍ ຂອງພັກ, ຢຶດຖືຈັນຍາບັນ, ຈັນຍາທຳຢ່າງເຄັ່ງຄັດ, ມີຄວາມບໍລິສຸດສັດຊື່, ມີຄວາມຈົງຮັກພັກດີຕໍ່ພັກ, ຕໍ່ລະບອບໃໝ່, ດຳລົງຊີວິດປອດໃສຂາວສະອາດ, ມີສະຕິຕື່ນຕົວໃນການປະຕິບັດລະບຽບວິໄນ, ມີສະຕິລະວັງຕົວຕໍ່ກົນອຸບາຍຂອງ ພວກສັດຕູ ແລະ ກຸ່ມຄົນບໍ່ດີທີ່ຫວັງມ້າງເພທຳລາຍການ ຈັດຕັ້ງແກ່ດຶງເອົາພະນັກງານ ກໍຄືຜູ້ພິພາກສາຂອງສານຮັບ ໃຊ້ກົນອຸບາຍຂອງພວກເຂົາ. ສອງ, ເອົາໃຈໃສ່ພັດທະນາລະບົບການຈັດຕັ້ງຂອງສານໃຫ້ ມີຄວາມໜັກແໜ້ນເຂັ້ມແຂງ ໂດຍເລັ່ງໃສ່ການຈັດຕັ້ງຂອງ ສານປະຊາຊົນເຂດທີ່ແມ່ນ ການຈັດຕັ້ງຮາກຖານຢູ່ໃກ້ຊິດ ກັບປະຊາຊົນ. ສາມ, ເອົາ ໃຈໃສ່ກໍ່ສ້າງ, ບຳລຸງ ແລະ ຍົກລະດັບທາງດ້ານທິດສະດີການ ເມືອງ-ການປົກຄອງໄປຄຽງ ຄູ່ກັບທາງດ້ານວິຊາສະເພາະວິຊາການ ແລະ ພາສາຕ່າງປະເທດໃຫ້ຜູ້ພິພາກສາ, ພະນັກງານຂອງສານປະຊາຊົນ ແຕ່ລະຂັ້ນຢ່າງມີຈຸດສຸມ ແລະ ຫຼາຍວິທີການ. ສີ່, ເພີ່ມທະວີຄວາມຮັບຜິດຊອບຂອງຄະນະພັກ, ຄະນະນຳຂອງສານປະຊາຊົນໃນການຕິດຕາມການ ຄົ້ນຄວ້າແກ້ໄຂຄະດີໃຫ້ມີ ຄວາມຖືກຕ້ອງ ແລະ ຍຸຕິທຳຍິ່ງຂຶ້ນ. ຫ້າ, ເອົາໃຈໃສ່ຄົ້ນຄວ້າ ອອກນິຕິກຳໃຕ້ກົດໝາຍໃຫ້ ຫຼາຍໂດຍສະເພາະກົດໝາຍ ວ່າດ້ວຍສານປະຊາຊົນ ແລະ ໃນຂົງເຂດການດຳເນີນຄະດີກຳນົດໄວ້ຕ້ອງໄດ້ຜັນຂະຫຍາຍອອກມາເປັນຄຳສັ່ງ, ຄຳແນະນຳ ແລະ ນິຕິກຳອື່ນໂດຍໄວ, ທັນກັບສະພາບ ການເພື່ອເປັນຄູ່ມື, ເປັນບ່ອນອີງໃຫ້ສານປະຊາຊົນທົ່ວປະເທດປະຕິບັດໃຫ້ຖືກຕ້ອງ ແລະ ເປັນເອກະພາບກັນ. ຫົກ, ເພີ່ມ ທະວີຄວາມຮັບຜິດຊອບໃນ ການບໍລິການຮັບໃຊ້ປະຊາຊົນ ທີ່ເຂົ້າມາສານ ໂດຍຖືວ່າປະຊາຊົນເປັນຜູ້ທຸກຍາກ, ເດືອດຮ້ອນ ຈຶ່ງໄດ້ເຂົ້າມາຂໍຄວາມຊ່ວຍເຫຼືອ, ຂໍຄວາມຍຸຕິທຳຈາກສານ ແລະ ເຈັດ, ເອົາໃຈໃສ່ປະສານສົມທົບກັບຄະນະພັກ, ອຳນາດການປົກຄອງຂັ້ນຂອງຕົນ ເພື່ອຍາດແຍ່ງຄຳຄິດຄຳເຫັນ, ຂໍທິດຊີ້ນຳ ແລະ ອຳນວຍຄວາມສະດວກໃນການ ເຄື່ອນໄຫວວຽກງານຂອງສານ ໂດຍສະເພາະການເກັບກຳຂໍ້ມູນຫຼັກຖານ, ຊີ້ແຈງ ແລະ ສະໜອງຂໍ້ມູນຫຼັກຖານໃຫ້ແກ່ ສານເພື່ອເຮັດໃຫ້ຄະດີມີຄວາມ ແຈ້ງຂາວ. ການປະສານສົມທົບໃນການແກ້ໄຂຄະດີທີ່ມີ ຄວາມຫຍຸ້ງຍາກ, ສັບສົນ, ພົວພັນກັບຫຼາຍຝ່າຍ. ພ້ອມນັ້ນ ທ່ານ ນາງ ສີໃສ ລືເດດມູນສອນ ໄດ້ໃຫ້ກຽດມອບໃບປະກາດລັດຖະດຳລັດ ຂອງປະທານປະເທດວ່າດ້ວຍ ການແຕ່ງຕັ້ງຮອງປະທານສານ ປະຊາຊົນສູງສຸດດັ່ງນີ້: ປະກາດ ແຕ່ງຕັ້ງ ທ່ານ ບຸນຂວາງ ທະວີສັກ ເປັນຮອງປະທານສານ ປະຊາຊົນສູງສຸດ ແລະ ທ່ານ ຄຳພັນ ບຸນພາຄົມ ເປັນຮອງ ປະທານສານປະຊາຊົນສູງສຸດ ອີກດ້ວຍ.