ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ອົງຄະນະພັກ ສພຊ ເປີດຂະບວນການແຂ່ງຂັນສ້າງໜ່ວຍພັກປອດໃສ,ເຂັ້ມແຂງ ແລະໜັກແໜ້ນ
29/03/2018

(ສພຊ) ເພື່ອເປັນການປັບປຸງ, ກໍ່ສ້າງອົງຄະນະພັກສະພາແຫ່ງຊາດ (ສພຊ) ເຮັດໃຫ້ບັນດາຮາກຖານພັກປອດໃສ, ເຂັ້ມແຂງ ແລະ ໜັກແໜ້ນ ຍົກສູງຄວາມສາມາດນໍາພາ ເປັນແກນນໍາຕໍ່ໜ້າທີ່ວຽກງານ, ຮັບປະກັນໃຫ້ຄະນະພັກທຸກຂັ້ນ, ສະມາຊິກພັກທຸກສະຫາຍເພີ່ມທະວີບົດບາດການນໍາພາ, ປັບປຸງຄວາມສາມັກຄີພາຍໃນໃຫ້ໜັກແໜ້ນ, ເສີມຂະຫຍາຍຄວາມເປັນແບບຢ່າງນໍາໜ້າຂອງຖັນແຖວສະມາຊິກພັກ; ຄະນະພັກສະພາແຫ່ງຊາດ ຈຶ່ງຈັດກອງປະຊຸມພິທີເປີດຂະບວນການແຂ່ງຂັນສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃນວັນທີ 23 ມີນາ 2018 ຢູ່ທີ່ຫ້ອງປະຊຸມຄະນະເລຂາທິການ ສພຊ (ຫລັກ 6) ໂດຍການເປັນປະທານຂອງສະຫາຍ ແສງນວນ ໄຊຍະລາດ ເລຂາທິການສູນກາງພັກ, ເລຂາຄະນະບໍລິຫານງານພັກ ສພຊ, ຮອງປະທານສະພາແຫ່ງຊາດ; ເຂົ້າຮ່ວມມີສະຫາຍ ນາງ ສີໃສ ລືເດດມູນສອນ ຮອງເລຂາຄະນະບໍລິຫານງານພັກ, ຫົວໜ້າຄະນະຮັບຜິດຊອບການກໍ່ສ້າງຮາກຖານພັກປອດໃສ, ເຂັ້ມແຂງ ແລະ ໜັກແໜ້ນ, ຮອງປະທານ ສພຊ; ມີບັນດາສະຫາຍຄະນະພັກ ສພຊ, ບັນດາຄະນະໜ່ວຍພັກຮາກຖານ ແລະ ຄະນະໜ່ວຍພັກທົ່ວອົງຄະນະພັກ ສພຊ ຕະຫລອດຮອດສະມາຊິກພັກທັງໝົດເຂົ້າຮ່ວມ.

ທັງນີ້, ກໍເພື່ອຜັນຂະຫຍາຍ ແລະ ຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກ ແລະ ຄໍາແນະນໍາຂອງຄະນະຈັດຕັ້ງສູນກາງພັກ ກ່ຽວກັບການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃຫ້ຖືກຕ້ອງ, ສອດຄ່ອງກັບຈຸດພິເສດ ແລະ ສະພາບຄວາມເປັນຈິງຂອງອົງຄະນະພັກ ສພຊ; ຜັນຂະຫຍາຍມູນເຊື້ອອັນດີງາມຜົນງານດ້ານດີ ແລະ ເດັດດ່ຽວປັບປຸງແກ້ໄຂຈຸດອ່ອນຂໍ້ຄົງຄ້າງພາຍໃນອົງຄະນະພັກຂອງ ສພຊ ແນໃສ່ເຊີດຊູບົດບາດຄວາມສາມາດນໍາພາຂອງໜ່ວຍພັກ ແລະ ຍົກສູງຄວາມເປັນແບບຢ່າງນໍາໜ້າຂອງຖັນແຖວສະມາຊິກພັກ ຮັບປະກັນໃຫ້ອົງຄະນະພັກ ສພຊ ມີຄວາມປອດໃສ, ເຂັ້ມແຂງ ແລະ ໜັກແໜ້ນ; ການປັບປຸງກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຍົກສູງຄຸນນະພາບຂອງໜ່ວຍພັກຮາກຖານ, ຄະນະພັກຮາກຖານ, ໜ່ວຍພັກທີ່ຂຶ້ນກັບຄະນະພັກຮາກຖານ ແລະ ສະມາຊິກພັກໃຫ້ມີການຫັນປ່ຽນຢ່າງຕັ້ງໜ້າດ້ວຍບາດກ້າວບຸກທະລຸ ສາມາດເປັນແກນນໍາທີ່ເຂັ້ມແຂງໃນໜ້າທີ່ການເມືອງຂອງ ສພຊ; ຮັບປະກັນເຮັດໃຫ້ການນໍາພາຂອງຄະນະພັກຂັ້ນຕ່າງໆພາຍໃນອົງຄະນະພັກ ສພຊ ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງໄລຍະໃໝ່, ໃຫ້ມີຄວາມສາມາດນໍາພາຈັດຕັ້ງປະຕິບັດໜ້າທີ່ວຽກງານຂອງຕົນທີ່ຄະນະພັກ ສພຊ ວາງອອກໃນແຕ່ລະໄລຍະໃຫ້ປາກົດຜົນເປັນຈິງ ແລະ ເຮັດໃຫ້ຄະນະພັກຂັ້ນຕ່າງໆ ແລະ ສະມາຊິກພັກພາຍໃນອົງຄະນະພັກສະພາແຫ່ງຊາດ ຮັບຮູ້, ເຂົ້າໃຈ ແລະ ຕື່ນຕົວປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ກໍຄືມະຕິຂອງຄະນະພັກ, ຄະນະປະຈໍາ ສພຊ ວາງອອກໃນແຕ່ລະໄລຍະ ໃຫ້ມີຜົນສໍາເລັດດ້ວຍຄຸນນະພາບ ແລະ ປະສິດທິຜົນ.

ກອງປະຊຸມໄດ້ຮັບຟັງການຜ່ານມະຕິກ່ຽວກັບເນື້ອໃນການສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ຂອງຄະນະພັກ ສພຊ; ບັນດາຮາກຖານພັກ ແລະ ຄະນະພັກຮາກຖານຂຶ້ນຜ່ານຂໍ້ແຂ່ງຂັນຂອງຕົນ ພ້ອມຈັບມືແຂ່ງຂັນ ແລະ ສໍາຜັດມືກັບສະຫາຍເລຂາທິການສູນກາງພັກ, ເລຂາຄະນະບໍລິຫານງານພັກ ສພຊ.

ໂອກາດດັ່ງກ່າວ, ກອງປະຊຸມຍັງໄດ້ຮັບຟັງການໂອ້ລົມ ແລະ ຊີ້ນໍາຈາກສະຫາຍເລຂາທິການສູນກາງພັກ, ເລຂາຄະນະບໍລິຫານງານພັກ ສພຊ  ເຊິ່ງໄດ້ຍົກໃຫ້ເຫັນຈຸດພິເສດ ແລະ ສະພາບຄວາມເປັນຈິງຂອງອົງຄະນະພັກ ສພຊ ແລະ 3 ຈຸດປະສົງຂອງຄໍາສັ່ງເລກທີ 01 ຂອງກົມການເມືອງສູນກາງພັກຄື: 1. ແມ່ນສືບຕໍ່ເສີມຂະຫຍາຍມູນເຊື້ອອັນດີງາມ, ອັນດີເດັ່ນຂອງພັກເຮົາ, ເດັດດ່ຽວປັບປຸງແກ້ໄຂຈຸດອ່ອນຂໍ້ຄົງຄ້າງ ແລະ ສິ່ງທ້າທາຍ, ແນໃສ່ເຊີດຊູບົດບາດ, ຄວາມສາມາດນໍາພາຂອງໜ່ວຍພັກ ແລະ ຍົກສູງຄວາມເປັນແບບຢ່າງນໍາໜ້າຂອງຖັນແຖວສະມາຊິກພັກ, ຮັບປະກັນໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ; 2. ເພື່ອຍົກສູງຄຸນນະພາບຂອງໜ່ວຍພັກ ແລະ ສະມາຊິກພັກໃຫ້ມີການປ່ຽນແປງຢ່າງຕັ້ງໜ້າ ດ້ວຍບາດກ້າວບຸກທະລຸ ສາມາດເປັນແກນນໍາທີ່ເຂັ້ມແຂງໃນລະບົບການເມືອງຢູ່ຮາກຖານ; 3. ເພື່ອຮັບປະກັນເຮັດໃຫ້ການນໍາພາຂອງພັກຕອບສະໜອງໄດ້ຄວາມເລັ່ງທວງຂອງການພັດທະນາປະເທດຊາດ ໃນເງື່ອນໄຂ ແລະ ສະພາບແວດລ້ອມໃໝ່ ພັກມີຄວາມຈໍາເປັນຕ້ອງກໍ່ສ້າງໜ່ວຍພັກ ແລະ ສະມາຊິກພັກໃຫ້ມີຄວາມສາມາດນໍາພາ ຈັດຕັ້ງປະຕິບັດໜ້າທີ່ການເມືອງຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດວາງອອກ ໃນແຕ່ລະໄລຍະໃຫ້ປາກົດຜົນເປັນຈິງ ພ້ອມນັ້ນ, ສະຫາຍຍັງຍົກໃຫ້ເຫັນເນື້ອໃນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະກອບມີ 5 ເນື້ອໃນຄື: 1. ການກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນທາງດ້ານການເມືອງ, 2. ທາງດ້ານແນວຄິດ, 3 ທາງດ້ານການຈັດຕັ້ງ, 4. ທາງດ້ານແບບແຜນການນໍາພາ ແລະ 5. ການນໍາພາປະຕິບັດໜ້າທີ່ການເມືອງ; ໃຫ້ເອົາໃຈໃສ່ກໍາແໜ້ນ ຈົ່ງພ້ອມກັນຄົ້ນຄວ້າຮໍ່າຮຽນເອົາບັນດາຄໍາສັ່ງ ເລກທີ 01 ຂອງກົມການເມືອງສູນກາງພັກ ແລະ ສະມາຊິກພັກ  ເຊິ່ງທ່ານເຫັນດີທີ່ທົ່ວອົງຄະນະພັກ ສພຊ ໄດ້ພ້ອມກັນຈັດຕັ້ງພິທີເປີດບັ້ນການແຂ່ງຂັນສ້າງໜ່ວຍພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນຢ່າງຟົດຟື້ນ ບັນດາສະຫາຍຕາງໜ້າແຕ່ລະໜ່ວຍພັກ ກໍໄດ້ຜ່ານເນື້ອໃນຂໍ້ແຂ່ງຂັນລວມຂອງຕົນ ເພື່ອເປັນບ່ອນອີງໃຫ້ໜ່ວຍພັກໄດ້ຄົ້ນຄວ້າ ແລະ ຫັນເປັນເນື້ອໃນແຂ່ງຂັນຂອງຕົນ ເພື່ອໃຫ້ສອດຄ່ອງກັບໜ້າທີ່ການເມືອງຂອງແຕ່ລະໜ່ວຍພັກ ການເປີດຂະບວນການແຂ່ງຂັນຄັ້ງນີ້, ອາດເວົ້າໄດ້ວ່າເປັນບັ້ນຂະບວນການທໍາອິດຂອງຄະນະພັກສະພາແຫ່ງຊາດສະໄໝທີ 3; ບັນດາເນື້ອໃນທີ່ບັນດາສະຫາຍຄະນະໜ່ວຍພັກແຕ່ລະໜ່ວຍພັກນໍາມາອ່ານ, ນໍາມາເປັນຂໍ້ແຂ່ງຂັນ ເຊິ່ງກັນ ແລະ ກັນນັ້ນ ລ້ວນແຕ່ມີເນື້ອໃນຫລາກຫລາຍອຸດົມສົມບູນແຕກຕ່າງກັນ ແຕ່ຈຸດປະສົງ ແລະ ເປົ້າໝາຍລວມ ແມ່ນເພື່ອກໍ່ສ້າງໜ່ວຍພັກ ແລະ ສະມາຊິກພັກໃນໜ່ວຍຂອງຕົນໃຫ້ກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ແລະ ສ້າງສະມາຊິກພັກກໍຄືກັນ ພ້ອມນັ້ນ, ຍັງໄດ້ຮຽກຮ້ອງມາຍັງໜ່ວຍພັກ ແລະ ສະມາຊິກພັກ ແຕ່ລະສະຫາຍ ເຊິ່ງເປັນກໍາລັງນໍາໜ້າຊົນຊັ້ນກໍາມະກອນ ແລະ ຊາວຜູ້ອອກແຮງງານບັນດາເຜົ່າ ຈົ່ງພ້ອມກັນຕັ້ງໜ້າສູ້ຊົນສ້າງໃຫ້ໜ່ວຍພັກຂອງຕົນກາຍເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ແລະ ສ້າງຕົນເອງແຕ່ລະຄົນໃຫ້ກາຍເປັນສະມາຊິກພັກປອດໃສ, ເຂັ້ມແຂງ ແລະ ໜັກແໜ້ນ ເຊື່ອໝັ້ນວ່າໃນທ້າຍປີນີ້ ພວກເຮົາຈະໄດ້ມີການສະຫລຸບຕີລາຄາ ປະເມີນຜົນທົ່ວອົງຄະນະພັກສະພາແຫ່ງຊາດໃນເວລານັ້ນ ກໍຈະຊອກໄດ້ໜ່ວຍພັກ ແລະ ສະມາຊິກພັກປອດໃສ, ເຂັ້ມແຂງ ແລະ ໜັກແໜ້ນຢ່າງແນ່ນອນ.

(ສອນສັກ ວັນວິໄຊ)