ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ສະພາແຫ່ງຊາດ ເປີດຂະບວນການແຂ່ງຂັນຮັກຊາດ ແລະ ພັດທະນາ
26/03/2018

ພິທີເປີດ ຂະບວນການແຂ່ງຂັນ ຮັກຊາດ ແລະ ພັດທະນາ ຂອງ ສະພາແຫ່ງຊາດ ໄດ້ຈັດ ຂຶ້ນ ໃນວັນ 23 ມີນາ 2018, ໂດຍການເປັນປະທານ ຂອງ ທ່ານ ນາງ ປານີ ຢາທໍ່ຕູ້ ປະທານສະພາ ແຫ່ງຊາດ, ໂດຍມີພະນັກງານ​-ລັດຖະກອນ ອ້ອມ​ຂ້າງ ສະພາ​ແຫ່ງ​ຊາດ ​ເຂົ້າຮ່ວມ.

ໃນພິທີເປີດ ຂະບວນການດັ່ງກ່າວ, ໄດ້ຜ່ານມະຕິ ຂອງຄະນະປະຈຳຂອງ ສະພາແຫ່ງຊາດ ​ແລະ ຂໍ້ ຕົກລົງ ຂອງຄະນະເລຂາທິການ ສະພາແຫ່ງຊາດ ວ່າດ້ວຍ ການຍ້ອງຍໍບຸກຄົນ ທີ່ມີຜົນງານ ດີເດັ່ນ ໃນການ ປະຕິບັດວຽກງານ ຂອງສະພາແຫ່ງຊາດ ປະຈຳປີ 2017 ແລະ ຜ່ານຂໍ້ແຂ່ງຂັນຂອງ ຄະນະປະຈຳສະພາແຫ່ງຊາດ “ຮັກຊາດ ແລະ ພັດທະນາ”. ທັງນີ້, ກໍເພື່ອ ເສີມຂະຫຍາຍມູນເຊື້ອ ອັນດີງາມ ຂອງພັກ, ຍົກສູງ ຄວາມເປັນແບບຢ່າງນຳໜ້າ ຂອງຖັນແຖວ ສະມາຊິກພັກ ແລະ ເພື່ອຮັບ ປະກັນໃຫ້ອົງຄະນະພັກ ສະພາແຫ່ງຊາດມີຄວາມປອດໃສ, ເຂັ້ມແຂງ ແລະ ໜັກແໜ້ນ; ໂຄສະນາ ເຜີຍແຜ່, ສຶກສາອົບຮົມ ໃຫ້ພະນັກງານ-ສະມາຊິກພັກ ເຫັນໄດ້ເຖິງມູນເຊື້ອ ການເຕີບໃຫຍ່ຂະຫຍາຍ ຕົວ, ຜົນງານອັນພົ້ນເດັ່ນ ຂອງພັກ ໃນການຊີ້ນຳ-ນຳພາຂອງພັກ ໃນການປະຕິບັດ ສອງໜ້າທີ່ຍຸດທະ ສາດ ໃນໄລຍະໃໝ່ຮອບດ້ານ; ເພື່ອເປີດບັ້ນ ແຂ່ງຂັນສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ເປີດຂະບວນການ “ຮັກຊາດ ແລະ ພັດທະນາ” ໃຫ້ ເປັນຂະບວນການຟົດຟື້ນຢູ່ພາຍ ໃນການ ຈັດຕັ້ງ ຂອງສະພາແຫ່ງຊາດ ແລະ ປະສົບຜົນສຳເລັດ ເປັນຢ່າງດີ ທັງເປັນການຍ້ອງຍໍ ຜົນງານ ຂອງ​ພະນັກງານ-​ລັດຖະກອນ ທີ່​ມີ​ຜົນງານ ​ດີ​ເດັ່ນ​ ໃນ​ປີ 2017 ທີ່ ຜ່ານ​ມາ.

​ ໂອກາດ​ດັ່ງກ່າວ, ທ່ານ ​ນາງ ປານີ ຢາທໍ່ຕູ້ ກໍ​ໄດ້​ມອບໃບຍ້ອງຍໍ​ ໃຫ້​ຄະນະ​ເລຂາທິການ​ສະພາ​ແຫ່ງ​ຊາດ ​ແລະ ບຸກຄົນ ທີ່ມີຜົນງານດີ​​ເດັ່ນ ໃນ​ການ​ປະຕິບັດ​ ວຽກງານ​ປະຈຳ​ ປີ 2017 ຈຳນວນ 233 ທ່ານ, ​ຍິງ 105 ທ່ານ ຫລັງ​ຈາກ​ນັ້ນ, ປະທານ​ ສະພາ​ແຫ່ງ​ຊາດ ກໍ​ໄດ້​ມີ​ຄຳ​ເຫັນ​ໂອ້ລົ​ມ, ​ໂດຍ​ໄດ້​ສະ​ແດງ ​ຄວາມ​ຍ້ອງຍໍ​ຊົມ​ເຊີຍ ​ຕໍ່​ຜົນງານ ​ຂອງຄະນະ​ພັກ, ຄະນະ​ນຳ, ​ພະນັກງານ​ ຫລັກແຫ​ລ່ງ, ພະນັກງານ​-ລັດ ຖະກອນອ້ອມ​ຂ້າງ ສະພາ​ແຫ່ງ​ຊາດ ທີ່​ຍາດ​ມາ​ໄດ້ ​​ໃນຕະຫລອດ​ໄລຍະ​ຜ່ານ​ມາ ພ້ອມ​ທັງ​ເນັ້ນ​ໃຫ້ ພ້ອມ​ກັນ ​ເປີດ​ຂະ​ບວນການ ​ແຂ່ງຂັນຮັກ​ຊາດ ​ແລະ ພັດທະນາ ​ໃຫ້​ເປັນ​ຂະ​ບວນການ​ຟົດ​ຟື້ນ ​ແລະ ອື່ນໆ.