ປະທານກໍາມາທິການການຕ່າງປະເທດ ໄດ້ຕ້ອນຮັບເອກອັກຄະຣາຊະທູດ ແຫ່ງ ລາຊະອານາຈັກມາຣົກ ປະຈໍາ ສປປລາວ
27/02/2018

(ສພຊ) ໃນຕອນເຊົ້າວັນທີ 25 ກຸມພາ 2018, ທີ່ສະພາແຫ່ງຊາດ ທ່ານ ເອກສະຫວ່າງ ວົງວິຈິດ ປະທານກໍາມາທິການການຕ່າງປະເທດ ໄດ້ຕ້ອນຮັບທ່ານ ອາເດນລີລາ ເອຮາວສ໌ນີ (Addelilah El Housni) ເອກອັກຄະຣາຊະທູດ ແຫ່ງ ລາຊະອານາຈັກມາຣົກ ປະຈໍາ ສປປລາວ; ໃນໂອກາດຢ້ຽມຢາມ ສປປລາວ ຢ່າງເປັນທາງການ.

        ທ່ານ ອາເດນລີລາ ເອຮາວສ໌ນີ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນໃນ ຄັ້ງນີ້  ພ້ອມທັງສະເໜີການຮ່ວມມື-ແລກປ່ຽນບົດຮຽນ,​ ການຢ້ຽມຢາມສອງຝ່າຍ ທ່ານຍັງໄດ້ເຊື້ອ ເຊີນທ່ານປະທານສະພາແຫ່ງຊາດລາວ ໄປຢ້ຽມຢາມລາຊະອານາຈັກມາຣົກ; ຂໍການສະໜັບສະ ໜູນຈາກສະພາແຫ່ງຊາດລາວ ໃນການສະເໜີເຊື້ອເຊີນລາຊະອານາຈັກມາຣົກ ເພື່ອເຂົ້າຮ່ວມ ກອງປະຊຸມໃນນາມແຂກຖືກເຊີນໃນກອງປະຊຸມສະມັດຊາລັດຖະສະພາອາຊຽນ (AIPA)  ຄັ້ງທີ 39 ທີ່ຈະຈັດຂຶ້ນທີ່ປະເທດສິງກະໂປ ລະຫວ່າງວັນທີ 3-7 ກັນຍາ 2018; ແລະ ກອງປະຊຸມລັດ ຖະສະພາອາຊີ-ປາຊີຟິກ (APPF) ຄັ້ງທີ 27 ທີ່ຈະຈັດຂຶ້ນທີ່ສຽມຣຽບ ລາຊະອານາຈັກກໍາປູເຈຍ ໃນເດືອນມັງກອນ 2019; ທ່ານໄດ້ກ່າວຕື່ມວ່າ ໃນໄລຍະຜ່ານມາ ລາຊະອານາຈັກມາຣົກ ໄດ້ເຄື່ອນໄຫວຢ່າງຫ້າວຫັນໃນການຕິດຕາມສະໜັບສະໜູນກອງປະຊຸມດັ່ງກ່າວຕະຫລອດມາ.

ທ່ານ ເອກສະຫວ່າງ ວົງວິຈິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍຕໍ່ການ ຢ້ຽມຢາມ ສປປລາວ ໃນຄັ້ງນີ້ ພ້ອມທັງສະເໜີໃຫ້ມີການແລກປ່ຽນຄະນະຜູ້ແທນລະຫວ່າງສອງ ອົງການນິຕິບັນຍັດ; ສະເໜີຂໍການຊ່ວຍເຫລືອ-ແລກປ່ຽນການເຝິກອົບຮົມແກ່ພະນັກງານສະພາ ແຫ່ງຊາດລາວ, ທ່ານເອກອັກຄະຣາຊະທູດ ກໍໄດ້ຕອບຮັບການສະເໜີ ໂດຍໃຫ້ທັດສະນະວ່າເຫັນ ສົມຄວນໃຫ້ມີກິດຈະກຳຄືດັ່ງກ່າວ ໃຫ້ແກ່ພະນັກງານຈໍານວນ 1 ຫລື 2 ທ່ານ ລະຫວ່າງສະພາຂອງ ສອງປະເທດ.

(ສົມນຶກ ແກ້ວໄຊຍະຈັກ)