ປະທານ ສພຊ ຕ້ອນຮັບຄະນະຜູ້ແທນລັດຖະສະພາ ສ.ອາເມລິກາ
26/02/2018

     ຕອນ​ເຊົ້າວັນ​ພະຫັດ​ທີ 22 ກຸມພາ 2018 ທີ່ສະພາ​ແຫ່ງ​ຊາດ,​ ​ທ່ານ ນາງ ປານີ ຢາ​ທໍ່ຕູ້ ປະທານ​ສະພາ​ແຫ່ງ​ຊາດ ໄດ້ຕ້ອນຮັບການຢ້ຽມຂ່ຳນັບຂອງຄະນະ​ຜູ້​ແທນ​ລັດຖະສະພາ ສະຫະລັດ​ອາ​ເມ​ລິ​ກາ ນໍາ​ໂດຍ​ທ່ານ ຣອດນີ ​ແຟຼລິງຮາ​ຍ​ແຊນ (Rodney Frelinghuysen) ປະທານ​ກໍາມາ​ທິການຈັດ​ສັນ​ງົບປະມານສະພາ ​ໃນ​ໂອກາດ​ເດີນທາງ​ມາ​ຢ້ຽມຢາມ ແລະ ​ເຮັດ​ວຽກ​ຢູ່ ສປປລາວ ​ໃນ​ລະຫວ່າງ​ວັນ​ທີ 21-22 ກຸມພາ 2018.

      ໃນ​ການຕ້ອນຮັບຄັ້ງ​ນີ້, ທ່ານ ນາງ ປານີ ຢາ​ທໍ່ຕູ້ ​​ໄດ້ສະ​ແດງ​ຄວາມ​ຍິນ​ດີ​ຕ້ອນຮັບທ່ານ ຣອດນີ ແຟຼລິງຮາຍແຊນ​ ດ້ວຍຄວາມຈິງໃຈທີ່​ໄດ້ມາຢ້ຽມຢາມ​ ສປປລາວ ​ຄັ້ງ​ນີ້ ​ເຊິ່ງ​​ເປັນຄັ້ງ​ທໍາ​ອິດ ​ແລະ ມີ​ຄວາມ​ໝາຍ​ສຳຄັນ, ຖື​ວ່າ​ເປັນ​ນິມິ​ດໝາຍ​ທີ່​ດີ​ໃຫ້​ແກ່​ການ​ເສີມ​ຂະຫຍາຍ​ການ​ພົວພັນ​ຮ່ວມ​ມື​ ລະຫວ່າງ​ ສປປລາວ ​ແລະ ສ.ອາ​ເມ​ລິ​ກາ ​ໂດຍ​ສະ​ເພາະ​ລະຫວ່າງ​ສະພາ​ແຫ່ງ​ຊາດ​ລາວ ​ແລະ ລັດຖະສະພາ​ ສ.ອາ​ເມ​ລິ​ກາ ພາຍ​ຫລັງ​ທີ່​ໄດ້​ມີ​ການ​ຍົກ​ລະດັບ​ການ​ພົວພັນ​ຮ່ວມ​ມື ລາວ-ອາ​ເມ​ລິ​ກາ​ຂຶ້ນ​ເປັນ “ຄູ່​ຮ່ວມ​ມືແບບ​ກວມລວມ” ນໍາກັນ ​ໃນ​ປີ 2016 ​ໃນ​ໂອກາດ​ການ​ຢ້ຽມຢາມ​ຄັ້ງ​ປະຫວັດສາດ​ຂອງ​ທ່ານ ບາຣັກ ​ໂອ​ບາ​ມາ ປະທານາທິບໍດີ ສ.ອາ​ເມ​ລິ​ກາ; ພ້ອມ​ນັ້ນ, ທ່ານປະທານ​ສະພາ​ແຫ່ງ​ຊາດ ຍັງ​ໄດ້ຕີ​ລາຄາ​ສູງ​ຕໍ່​ການ​ພົວພັນ​ຮ່ວມ​ມື​ລາວ-ອາ​ເມ​ລິ​ກາ ທີ່​ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ​ເທື່ອ​ລະ​ກ້າວ ​ເຊິ່ງລັດຖະບານລາວ ​ກໍ​ໄດ້​ປະຕິບັດນະໂຍບາຍດ້ານ​ມະນຸດສະທຳຂອງ​ຕົນ​ ຕໍ່​ປະຊາຊົນ​ອາ​ເມ​ລິ​ກາ ໂດຍ​ສະ​ເພາະ​ຕໍ່​ຄອບຄົວ​ຂອງ​ທະຫານ​ອາ​ເມ​ລິ​ກາ​ທີ່​ຫາຍ​ສາບ​ສູນ ​ຢູ່​ລາວ​ໃນ​ປາງ​ສົງຄາມ ​ໂດຍ​ໄດ້ອະນຸຍາດ​ໃຫ້​ທະຫານ​ອາ​ເມ​ລິ​ກາ ເຂົ້າມາດໍາເນີນ​ການ​ຂຸດ​ຄົ້ນ​ຊອກ​ຫາ​ຊາກ​ສົບ​ຂອງ​ທະຫານ​ອາ​ເມ​ລິ​ກາທີ່​ຫາຍ​ສາບ​ສູນຢູ່ລາວ​ໃນ​ປາງ​ສົງຄາມ. ສຳລັບການ​ມາ​ຢ້ຽມຢາມຂອງ​ທ່ານ ຣອດນີ ​ແຟຼລິງຮາ​ຍ​ແຊນ ພ້ອມ​ດ້ວຍ​ຄະນະ​​ຄັ້ງ​ນີ້ ກໍຍັງ​ເປັນ​ການ​ສືບຕໍ່ເສີມ​ຂະຫຍາຍສາຍ​ພົວພັນ​ມິດຕະພາບ ແລະ ການຮ່ວມມື ລະຫວ່າງສອງປະເທດ ​ທັງເປັນ​ບາດກ້າວ​ເລີ່​ມຕົ້ນ​ອັນ​ສຳຄັນ​ໃນ​ການ​ເສີມ​ຂະຫຍາຍ​ການ​ພົວພັນ​ຮ່ວມ​ມື ລະຫວ່າງ​ອົງການ​ນິຕິ​ບັດ​ຍັດ​ຂອງ​ສອງ​ປະ​ເທດ​ ລາວ ແລະ ອາ​ເມ​ລິ​ກາ. ​ໃນ​ໂອກາດ​ດັ່ງກ່າວ, ທ່ານປະທານສະພາແຫ່ງຊາດຍັງ​ໄດ້​ສະ​ແດງ​ຄວາມ​ຂອບ​ໃຈຕໍ່​ລັດຖະບານ​, ລັດຖະສະພາ ​ແລະ ປະຊາຊົນ​ອາ​ເມ​ລິ​ກາ ທີ່​ໃຫ້ການ​ສະໜັບສະ​ໜູນຊ່ວຍ​ເຫຼືອ ສປປລາວ ​ໃນ​ການ​ເກັບ​ກູ້​ລະ​ເບີດ​ບໍ່​ທັນ​ແຕກ ທີ່​ຕົກ​ຄ້າງ​ແຕ່​ສະ​ໄໝ​ສົງຄາມ, ການ​ຊ່ວຍ​ເຫລືອ​ດ້ານ​ການ​ສຶກສາ, ສາທາລະນະ​ສຸກ ​ແລະ ຂະ​ແໜງ​ການ​ອື່ນໆ​ຢູ່ ສປປລາວ.

​      ໃນ​ການ​ຢ້ຽມ​ຂ່ຳນັບ, ທ່ານ ຣອດນີ ​ແຟຼລິງຮາ​ຍ​ແຊນ ​ໄດ້ສະ​ແດງ​ຄວາມ​ຂອບ​ໃຈ​ຕໍ່​ການ​ຕ້ອນຮັບອັນ​ອົບ​ອຸ່ນ​ຈາກ​ທ່ານ​ປະທານ​ສະພາ​ແຫ່ງ​ຊາດ ພ້​ອມ​ດ້ວຍ​ຄະນະ ທັງ​​ແຈ້ງຈຸດ​ປະສົງ​ໂດຍ​ສັງ​ເຂ​ບຂອງ​ການ​ມາ​ຢ້ຽມຢາມ ​ແລະ ​ເຮັດ​ວຽກ​ທີ່ ສປປລາວ ຄັ້ງ​ນີ້ ​ໂດຍ​ສະ​ເພາະ​ແມ່ນ​ຜົນ​ຂອງການ​ພົບ​ປະ​ກັບ​ທ່ານ​ ວິ​ໄລ​ວົງ ບຸດດາ​ຄໍາ ປະທານ​ກໍາມາ​ທິການ​ແຜນການ ການ​ເງິນ ​ແລະ ການກວດ​ສອບ ສະພາແຫ່ງຊາດ, ທັງ​ເປັນ​ປະທານ​ຄະນະ​ມິດຕະພາບ​ລັດຖະສະພາລາວ-ອາ​​ເມ​ລິ​ກາ ພ້ອມ​ດ້ວຍ​ຄະນະ ​ເຊິ່ງທັງ​ສອງ​ຝ່າຍ​ໄດ້​ມີ​ການ​ປຶກສາ​ຫາລືຫລາຍ​ບັນ​ຫາສຳຄັນ​ ເພື່ອເສີມຂະຫຍາຍການຮ່ວມມືໃນຕໍ່ໜ້າ.

     ກ່ອນໜ້າ​ນີ້​ໃນ​ວັນ​ດຽວ​ກັນ ທີ່​ຫ້ອງ​ຮັບ​ແຂກ​ກຳມາ​ທິການ​ສະພາ​ແຫ່ງ​ຊາດ, ​ໄດ້​ມີການ​ພົບ​ປະສອງ​ຝ່າຍລະ​ຫວ່າງສະພາ​ແຫ່ງ​ຊາດ​ລາວ ນຳ​ໂດຍທ່ານ​ ວິ​ໄລ​ວົງ ບຸດດາ​ຄຳ ​ແລະ ລັດຖະສະພາ​ ສ.ອາ​ເມ​ລິ​ກາ ນຳ​ໂດຍ​ທ່ານ ຣອດນີ ​ແຟຼລິງຮາ​ຍ​ແຊນ ເຊິ່ງທັງ​ສອງ​ຝ່າຍ​ໄດ້​​​ປຶກສາ​ຫາລື​ຮ່ວມ​ກັນ​ກ່ຽວ​​ການ​ພົວພັນ​ຮ່ວມ​ມື​​ດ້ານ​ການ​ຄ້າ, ການ​ລົງທຶນ ​ແລະ ການ​ຮ່ວມ​ມື​ໃນ​ຂະ​ແໜງ​ການ​ຕ່າງໆ. ​​​ໂອກາດດັ່ງກ່າວ, ຝ່າຍ​ສະພາ​ແຫ່ງ​ຊາດລາວ ​ໄດ້​ແລກປ່ຽນ ​ແລະ ສະ​ເໜີ​ໃຫ້ຝ່າຍ ສ.ອາ​ເມ​ລິ​ກາ ສືບຕໍ່ໃຫ້​ການ​ຊ່ວຍ​ເຫຼືອ​ໃນ​ໂຄງການ​ເກັບ​ກູ້​ລະ​ເບີດ​ບໍ່​ທັນ​ແຕກຢູ່ ສປປລາວ; ນອກນັ້ນ, ຍັງໄດ້ສະ​ເໜີ​ໃຫ້ລັດຖະສະພາ ສ.ອາ​ເມ​ລິ​ກາ​ ພິຈາລະນາບັນຫາການໃຫ້ສິດພິເສດດ້ານການຄ້າ ໃຫ້ແກ່ ສປປລາວ, ການ​ຮ່ວມ​ມື​ລະ​ຫວ່າງ​ສະພາ​ແຫ່ງ​ຊາດ​ລາວ ​ແລະ ລັດຖະສະພາ ສ.ອາ​ເມ​ລິ​ກາ ​ໂດຍ​ຜ່ານ​ກົນ​ໄກ​ຄະນະ​ມິດຕະພາບ​ລັດຖະສະພາ ແລະ ບັນຫາອື່ນໆທີ່ເປັນຜົນປະໂຫຍດແກ່ສອງປະເທດ ກໍຄືປະຊາຊົນສອງຊາດ.

     ຕອນບ່າຍຂອງວັນດຽວກັນ, ​ ຄະນະ​ຜູ້ລັດຖະສະພາ​ ສ.ອ​າ​ເມ​ລິ​ກາ ເຂົ້າ​ຢ້ຽມ​ຂ່ຳນັບ​ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ແຫ່ງ ສປປລາວ ​ແລະ ຕອນເຊົ້າ​ຂອງ​ວັນ​ດຽວ​ກັນ, ຍັງ​​ໄດ້​ເຂົ້າ​ພົບ​ປະ​ກັບ​ທ່ານ ສະ​ເຫຼີ​ມ​ໄຊ ກົມມະ​ສິດ ລັດຖະມົນຕີ​ກະຊວງ​ການ​ຕ່າງປະ​ເທດອີກດ້ວຍ.