ຫາລືກ່ຽວກັບການຈັດຕັ້ງປະຕິບັດໂຄງການກໍ່ສ້າງທາງລົດໄຟ ລາວ-ຈີນ
20/09/2021

          (ສ​ພ​ຊ) ກອງ​ປະ​ຊຸມ​ວິ​ດີ​ໂອ​ທາງ​ໄກ ເພື່ອປຶກ​ສາ​ຫາ​ລື​ກ່ຽ​ວ​ກັບ​ກາ​ນ​ຈັດ​ຕັ້ງ​ປະ​ຕິ​ບັດ​ວຽກ​ງານ​ຂອງ​ໂຄງ​ການກໍ່​ສ້າງ​ທາງ​ລົດ​ໄຟ ​ລາວ-ຈີນ ແລະ ການ​ພັດ​ທະ​ນາ​ເຂດ​ໂລ​ຊິດ​ສະ​ຕິກ ທີ່​ຕິດ​ພັນ​ກັບ​ການ​ຂົນ​ສົ່ງ​ຜ່ານ​ທາງ​ລົດ​ໄຟ ລາວ-ຈີນ ໄດ້​ຈັ​ດ​ຂຶ້ນ​ໃນ​ວັນ​ທີ 17 ກັນ​ຍາ 2021 ໂດຍ​ການ​ເປັນປະ​ທານ​ຂອງ​ທ່ານ ຮ​ສ. ປອ. ລິນ​ຄ​ຳ ດວງ​ສະ​ຫວັນ ປະ​ທານ​ກຳ​ມາ​ທິ​ກາ​ນ​ເສ​ດ​ຖະ​ກິດ, ເຕັກ​ໂນ​ໂລຢ​ີ ແລະ ສິ່ງ​ແວດ​ລ້ອມ ສ​ະ​ພາ​ແຫ່ງ​ຊາດ; ​ເຂົ້າ​ຮ່ວມ​ມີ​ພາກ​ສ່ວນ​ກ່ຽວ​ຂ້ອງ​ຈາກ​ກຳ​ມາ​ທິ​ການວັດ​ທະ​ນະ​ທໍາ-ສັງ​ຄົມ, ກໍາ​ມາ​ທິ​ການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ, ກະ​ຊວງໂຍ​ທາ​ທິ​ການ ແລະ ຂົນ​ສົ່ງ, ກະ​ຊວງ​ແຜນ​ການ ແລະ ການ​ລົງ​ທຶນ, ກະ​ຊວງ​ຊັບ​ພະ​ຍ​າ​ກອນ​ທ​ໍາ​ມະ​ຊາດ ແລະ ສິ່ງ​ແວດ​ລ້ອມ, ກະ​ຊວງ​ການ​ເງິນ, ສະ​ພາ​ປະ​ຊາ​ຊົນ​ແຂວງ 5 ແຂວງ ແລະ ນ​ະ​ຄອນ​ຫລວງວຽງ​ຈັນ.

          ທັງ​ນີ້, ກໍເພື່ອ​ຮັບ​ຟັງ​ການ​ລາຍ​ງານ ແລະ ປຶກ​ສາ​ຫາ​ລື ກ່​ຽວ​ກັບ​ຄວາມ​ຄືບ​ໜ້າ​ຂອງ​ການ​ຈັດ​ຕັ້ງ​ປະ​ຕິ​ບັດ​ໂຄງ​ການກໍ່​ສ້າງ​ທາງ​ລົດ​ໄຟ​ລາ​ວ-ຈີນ ແລະ ການ​ຍົກ​ຍ້າຍ​ຈັດ​ສັນ ແລະ ຊົດ​ເຊີຍ​ໃຫ້​ແກ່ປ​ະ​ຊາ​ຊົນ ຜູ້​ທີ່​ຖືກ​ຜົນ​ກະ​ທົບ​ຈາກ​ການກໍ່​ສ້າງ​ເສັ້ນ​ທາງ​ລົດ​ໄຟ ເຂົ້າ​ໃນ​ການ​ຂະ​ຫຍາ​ຍ​ພື້ນ​ຖານ​ເສດ​ຖະ​ກິດ​ແຂວງ ແລະ ຮັບ​ຟັງ​ການ​ລາຍ​ງານ​ສະ​ພາບ​ການ​ພັດ​ທະ​ນາ​ເຂດ​ໂລ​ຊິດ​ສະ​ຕິກ​ທີ່​ຕິດ​ພັນ​ກັບ​ການ​ຂົນ​ສົ່ງ​ຜ່ານ​ທາງ​ລົດ​ໄຟ ລາວ-ຈີນ ລວມ​ທັງ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສ​ະ​ຫງົບ.

          ​ໃນ​ກອງ​ປະ​ຊຸມ, ຜູ້ເຂົ້າຮ່ວມໄດ້​ຮັ​ບ​ຟັງ​ການ​ລາຍ​ງານ ​ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ໂຄງ​ການກໍ່​ສ້າງ​ທາງ​ລົດ​ໄຟ ລາວ-ຈີນ ຢູ່​ນະ​ຄອນຫລວງວ​ຽງ​ຈັນ ແລະ ບັນ​ດາ​ແຂວງ​ຕ່າງໆ ເຊັ່ນ: ຈາກ​ສ​ະ​ພາ​ປະ​ຊາ​ຊົນ​ແຂວງ​ຫລວງ​ນ້ຳ​ທາ, ອຸ​ດົມ​ໄຊ, ຫລວ​ງ​ພະ​ບາງ, ວຽງ​ຈັ​ນ ແລະ ນະ​ຄອນ​ຫລວງວຽງ​ຈັນ ແລະ ຜູ້​ເຂົ້າ​ຮ່ວມ​ກໍ​ໄດ້​ສຸມ​ໃສ່ປະ​ກອບ​ຄຳ​ເຫັ​ນ, ປຶກ​ສາ​ຫາ​ລື​ຕໍ່​ບັນ​ຫາ​ດັ່ງ​ກ່າວ ເພື່ອ​​​ເສີ​ມ​ຂະ​ຫຍາຍ, ຊ​ຸກ​ຍູ້, ສົ່ງ​ເສີ​ມດ້ານ​ດີ ແລະ ຊອກ​ຫາ​ວິ​ທ​ີ​ແກ້​ໄຂ​ດ້ານ​ອ່ອນ, ຂໍ້​ຄົງ​ຄ້າງ ໃຫ​້​ຖືກ​ຕ້ອງ​ຕາມ​ກົດ​ໝາຍ ແລະ ສອດ​ຄ່ອງ​ກັບ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມ ແຕ່​ລະ​ໄລ​ຍະ.

(ນາງ ປາ​ກາ​ລັກ ພົມ​ມີ​ໄຊ)