ຮອງປະທານ ສພຊ ພົບປະປະຊາຊົນແຂວງສະຫວັນນະເຂດ
23/02/2018

     (ສພຊ) ໃນລະຫວ່າງວັນທີ 13-21 ກຸມພາ 2018 ທ່ານ ພົທ. ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ), ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 13 ​ແຂວງ​ສະຫວັນ​ນະ​ເຂດ ແລະ ທ່ານ ສົມເພັດ ອິນທະທິລາດ ສະມາຊິກສະພາ​ແຫ່ງ​ຊາດ​ປະຈຳ​ເຂດ​ເລືອກ​ຕັ້ງ, ກໍາມະການກໍາມາທິການກົດໝາຍ ພ້ອມດ້ວຍຄະນະ ໄດ້ພົບປະຜູ້ມີສິດເລືອກຕັ້ງ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 4 ຂອງ ສພຊ ຊຸດທີ VIII ແລະ ຂອງສະພາ​ປະຊາຊົນ​ແຂວງ (ສພຂ) ສະວັນນະເຂດ ຊຸດທີ I ທີ່ເມືອງພະລານໄຊ ແລະ ເມືອງອາດສະພັງທອງ ​​ເຊິ່ງມີການຈັດ​ຕັ້ງ​ພັກ-ລັດ, ອຳນາດ​ການ​ປົກຄອງ​ເມືອງ-ບ້ານ, ພະນັກງານ​ຫລັກ​ແຫ​ລ່ງ, ພະນັກງານ-ລັດຖະກອນ, ນາຍ ​ແລະ ພົນທະຫານ-ຕຳຫລວດ, ອົງການ​ຈັດ​ຕັ້ງ​ມະຫາຊົນ​ຂັ້ນ​ບ້ານ ຕະຫລອດ​ຮອດ​ພໍ່​ແມ່ປະຊາຊົນ​ລາວ​ບັນດາ​ເຜົ່າ ​ເຂົ້າ​ຮ່ວມ​ຮັບ​ຟັງ​ຢ່າງ​ພ້ອມພຽງ.

     ການລົງພົບປະປະຊາຊົນ, ກໍເພື່ອເກັບກໍາສະພາບການ, ຄໍາຄິດເຫັນ ແລະ ຄໍາສະເໜີຂອງປະຊາຊົນຕໍ່ວຽກງານກໍ່ສ້າງຮາກຖານການເມືອງ, ພັດທະນາຊົນນະບົດ, ວຽກງານ 3 ສ້າງ, ການພັດທະນາເສດຖະກິດ-ສັງຄົມຂອງຂະແໜງການ, ທ້ອງຖິ່ນ ແລະ ບັນຫາອື່ນໆ; ພ້ອມທັງຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດລັດຖະທໍາມະນູນ, ກົດໝາຍ, ມະຕິກອງປະຊຸມຂອງຄະນະປະຈໍາ ສພຊ ກໍຄືຄະນະປະຈໍາ ສພຂ, ບັນດານິຕິກໍາຂອງອົງການອໍານາດລັດທຸກຂັ້ນ ແລະ ຕິດຕາມກວດກາການແກ້ໄຂຄໍາສະເໜີຂອງປະຊາຊົນຜ່ານໂທລະສັບສາຍດ່ວນໃນວາລະດໍາເນີນກອປະຊຸມ.

ການລົງເຜີຍແຜ່ໃນຄັ້ງນີ້, ໄດ້ແບ່ງອອກເປັນ 2 ຊຸດຄື: ຊຸດທີ 1 ລົງເຜີຍແຜ່ຢູ່ສະໂມສອນເມືອງພະລານໄຊ, ກອງພັນທະຫານຮາບທີ 13, ຈຸດສຸມບ້ານກະແສນ, ບ້ານນາຈັນໄຕ ແລະ ຊຸດທີ 2 ຢູ່ສະໂມສອນເມືອງອາດສະພັງທອງ, ກອງພັນ 14 ວິລະຊົນ, ຈຸດສຸມບ້ານແຈລະມອງ ແລະ ບ້ານສີວິໄລ ເພື່ອເຮັດໃຫ້ອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ, ພະນັກງານ-ລັດຖະກອນ, ທະຫານ-ຕໍາຫລວດ, ນັກຮຽນ-ນັກສຶກສາ ແລະ ປະຊາຊົນບັນດາເຜົ່າໃນທົ່ວແຂວງ ໄດ້ຮັບຮູ້ ແລະ ເຂົ້າໃຈ, ກໍາໄດ້ເນື້ອໃນຈິດໃຈກອງປະຊຸມ ເປັນຕົ້ນແມ່ນການສ້າງ ແລະ ປັບປຸງກົດໝາຍ 16 ສະບັບ, ກົດໝາຍສ້າງໃໝ່ 8 ສະບັບ, ບັນດາບົດລາຍງານຂອງລັດຖະບານ, ບົດລາຍງານຂອງພະແນກການຕ່າງໆຂອງແຂວງທີ່ກອງປະຊຸມສະໄໝສາມັນເທື່ອທີ 4 ຂອງ ສພຊ ຊຸດທີ VIII ແລະ ຂອງ ສພຂ ຊຸດທີ I ໄດ້ຮັບຮອງເອົາ.

        ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ມີຄໍາສະເໜີບັນຫາຕ່າງໆ ​ເປັນ​ຕົ້ນແມ່ນການຊົດເຊີຍປະຊາຊົນທີ່ຖືກຜົນກະທົບຈາກໂຄງການລົງທຶນພັດທະນາພື້ນຖານໂຄງລ່າງ, ແຫລ່ງທຶນສົ່ງເສີມການຜະລິດ-ຕະຫລາດຈໍາໜ່າຍຜົນຜະລິດ, ການແບ່ງປັນຕົວເລກລັດຖະກອນຄູ, ເສັ້ນທາງ ແລະ ຂົວ, ອາຄານຮຽນ, ບໍລິສັດສໍາປະທານດິນປະຊາຊົນ ປູກໄມ້ວິກ ຢູ່ຈຸດສຸມບ້ານນາຈັນໄຕ ບໍ່ຈ່າຍເງິນຄ່າເຊົ່າທີ່ດິນໃຫ້ຕາມສັນຍາ ແລະ ອື່ນໆ.

        ໂອກາດດັ່ງກ່າວ, ຄະນະຜູ້ແທນຍັງໄດ້ມອບເຄື່ອງອຸປະໂພກ, ບໍລິໂພກຈໍານວນໜຶ່ງ ເຊິ່ງປະກອບມີໝີ່ສໍາເລັດຮູບ ແລະ ຜ້າຫົ່ມ  270 ຜືນ ລວມມູນຄ່າ 16​​ ລ້ານກີບ ໃຫ້ກັບເມືອງດັ່ງກ່າວ ເພື່ອນໍາໄປຊ່ວຍເຫລືອປະຊາຊົນຄອບຄົວຜູ້ທຸກຍາກ, ກອງພັນທະຫານຮາບທີ 13 ແລະ ກອງພັນທີ 14 ວິລະຊົນ ຈາກການອຸປະຖໍາຂອງບໍລິສັດ ໃສທິລາດໂອໂຕ ແລະ ມູນລະນິທິຊ່ວຍເຫລືອຄົນທຸກຍາກ ສປປລາວ ສາຂານະຄອນຫລວງ.