ມອບ-ຮັບໜ້າທີ່ປະທານກຳມາທິການ ກສຕສ ຜູ້ເກົ່າ-ຜູ້ໃຫມ່
05/04/2021

     (ສພຊ) ວັນທີ 31 ມີນາ 2021 ທີ່ສະພາແຫ່ງຊາດ (ທາດຫລວງ) ໄດ້ມີພິທີມອບ-ຮັບໜ້າທີ່ ລະຫວ່າງທ່ານ ບຸນປອນ ສີສຸລາດ ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ຊຸດທີ VIII (ຜູ້ເກົ່າ) ແລະ ທ່ານ ລິນຄຳ ດວງສະຫວັນ ປະທານກຳມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ ຊຸດທີ IX (ຜູ້ໃໝ່) ໂດຍການໃຫ້ກຽດເຂົ້າຮ່ວມຂອງທ່ານ ສົມມາດ ພົລເສນາ ຮອງປະທານສະພາແຫ່ງຊາດ ພ້ອມດ້ວຍບັນດາທ່ານຮອງປະທານກຳມາທິການ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພະນັກງານ-ວິຊາການພາຍໃນກຳມາທິການເຂົ້າຮ່ວມ.

     ໃນພິທີ, ທ່ານ ບຸນປອນ ສີສຸລາດ ໄດ້ຂຶ້ນກ່າວມອບໜ້າທີ່ ເຊິ່ງມີເນື້ອໃນບາງຕອນວ່າ: ກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ (ກສຕສ) ເປັນ​ເສນາ​ທິການ​ໂດຍກົງ​ ໃຫ້​ແກ່​ສະພາ​ແຫ່ງ​ຊາດ ​ຊຸດ​ທີ VIII ແລະ ຄະນະ​ປະ​ຈໍາ​ສະພາ​ແຫ່ງ​ຊາດ ​​ໃນການຈັດຕັ້ງປະຕິບັດໜ້າ​ທີ່​ວຽກ​ງານ ​ຕາມ 3 ພາລະບົດບາດຂອງ​ຕົນ. ໃນລະຍະ 5 ປີຜ່ານມາ ກສຕສ ໄດ້ປະຕິບັດໜ້າທີ່ຂອງຕົນສຳເລັດຫລາຍດ້ານ ເປັນຕົ້ນ: ດ້ານນິຕິບັນຍັດ, ດ້ານການຕົກ​ລົງບັນຫາສຳຄັນພື້ນຖານຂອງປະເທດຊາດ, ​ ດ້ານການ​ຕິດຕາມ​ກວດກາ, ດ້ານການ​ແກ້​ໄຂ​ຄຳ​ຮ້ອງ​ຂໍ​ຄວາມ​ເປັນ​ທຳ, ດ້ານການສ້າງຄວາມເຂັ້ມແຂງ​ໃຫ້​ແກ່ກຳມາທິການ, ດ້ານການ​ເຄື່ອ​ນ​ໄຫວວຽກ​ງານ​ການຕ່າງປະເທດ ​ໂດຍ​ປະຕິບັດ​ຕາມ​ລັດຖະທຳ​ມະນູ​ນ ມາດຕາ 54, ກົດໝາຍວ່າ​ດ້ວຍ​ສະພາ​ແຫ່ງ​ຊາດ ມາດຕາ 6 ທີ່​ກຳ​ນົດວ່າ ອາຍຸ​ການ​ຂອງ​ສະພາ​ແຫ່ງ​ຊາດ ​ແມ່ນມີ​ອາຍຸ 5 ປີ ເຊິ່ງ​ເລີ່​ມ​ແຕ່​ກອງ​ປະຊຸມ​ຄັ້ງ​ປະຖົມ​ມະລືກ​ຂອງ​ສະພາ​ແຫ່ງ​ຊາດ​ຊຸດ​ນັ້ນ ​ໄປ​ເຖິງ​ກອງ​ປະຊຸມ​ຄັ້ງ​ປະຖົມມະລືກ​ຂອງ​ສະພາ​ແຫ່ງ​ຊາດຊຸດ​  ໃໝ່​ ພາຍຫລັງ​ທີ່​ມີການ​ເລືອກ​ຕັ້ງ​​ແລ້ວ; ສະ​ນັ້ນ, ມາຮອດເວລານີ້ ອາຍຸການຂອງສະພາ​ແຫ່ງຊາດ ຊຸດທີ VIII ກໍຖືວ່າສິ້ນສຸດລົງ ຕາມລັດຖະທຳ​ມະນູນ ​ແລະ ກົດຫມາຍ; ດັ່ງນັ້ນ, ຈຶ່ງຂໍຖືໂອກາດນີ້ປະກາດການສິ້ນສຸດວາລະຂອງ ກສຕສ ຊຸດທີ VIII ​ແລະ ນັບແຕ່ມື້ວັນທີ 1 ​ເມສາ 2021 ນີ້ເປັນຕົ້ນໄປ ຂໍ​​ມອບ​ໜ້າ​ທີ່​ອັນສຳຄັນທີ່​ມີ​ກຽດ​ອັນ​ສູງ​ສົ່ງ​ນີ້ ​ໃຫ້​ທ່ານ​ປະທານ​ກສຕສ ສະພາ​ແຫ່ງ​ຊາດ ຊຸດ​ທີ IX ກໍຄືທ່ານ ລິນ​ຄຳ ດວງ​ສະຫວັນ ​ເປັນຜູ້​ສື​ບຕໍ່​ນຳພາ ​ແລະ ຊີ້​ນຳການຈັດ​ຕັ້ງ ​ແລະ ການ​ເຄື່ອນ​ໄຫວ​ວຽກ​ງານ​ຂອງ​ ກສຕສ ສະພາ​​ແຫ່ງ​ຊາດ ຊຸດ​ທີ IX ​ໃຫ້​ໄດ້​ຮັບ​ຜົນສຳ​ເລັດ​ໃໝ່ ​ແລະ ຍິ່ງ​ໃຫຍ່​ກວ່າ​ເກົ່າ ​ເປັນ​ຕົ້ນ ການ​​ປັບປຸງພາລະ​ບົດບາດ​, ການຈັດ​ຕັ້ງ​ປະຕິບັດ​ທິດ​ທາງ​ແຜນການ 5 ປີ (2021-2025) ຂ​ອງ ກສຕສ ​ແລະ ວຽກ​ງານ​ອື່ນໆ ຂອງ​ກຳມາ​ທິການ​ໃຫ້​ສຳ​ເລັດ.

          ຈາກນັ້ນ, ທ່ານ ລິນຄຳ ດວງສະຫວັນ ກໍໄດ້ຂຶ້ນກ່າວຮັບໜ້າທີ່ ເຊິ່ງທ່ານໄດ້ກ່າວວ່າ: ເພື່ອໃຫ້ສົມກັບຄວາມເຊື່ອໝັ້ນ ແລະ ໄວ້ວາງໃຈຈາກຂັ້ນເທິງ, ຕາງໜ້າຄະນະປະທານ ກສຕສ ສະພາແຫ່ງຊາດ ຊຸດທີ IX ຂໍໃຫ້ຄໍາຫມັ້ນສັນຍາຕໍ່ຂັ້ນເທິງວ່າ: ຈະສືບຕໍ່ຊີ້ນໍາ-ນໍາພາ ບັນດາກົມ, ຈະຮັກສາ ແລະ ເສີມຂະຫຍາຍມູນເຊື້ອອັນດີງາມ ແລະ ຜົນງານທີ່ຄະນະກໍາມາທິການຊຸດເກົ່າສ້າງໄວ້; ຈະພ້ອມກັນຄົ້ນຄວ້າ ແລະ ຊອກວິທີການ, ມາດຕະການຕ່າງໆ ເພື່ອຈໍາກັດ ແລະ ແກ້ໄຂບັນດາຈຸດອ່ອນ, ຂໍ້ຂາດຕົກບົກຜ່ອງ ໃນຂົງເຂດວຽກງານຂອງກໍາມາທິການຮັບຜິດຊອບໃຫ້ດີຂຶ້ນເທື່ອລະກ້າວ; ຈະເພີ່ມທະວີຮັດແໜ້ນຄວາມສາມັກຄີພາຍໃນໝູ່ຄະນະ ເພື່ອເຕົ້າໂຮມຄວາມສາມັກຄີພາຍໃນກໍາມາທິການ ແລະ ນໍາພາພະນັກງານ-ລັດຖະກອນ ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ໂດຍສະເພາະແມ່ນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ປະຕິບັດຕາມ 3 ພາລະບົດບາດ ຂອງສະພາແຫ່ງຊາດ ໃຫ້ໄດ້ຮັບຜົນສໍາເລັດເປັນຢ່າງດີ; ເອົາໃຈໃສ່ນໍາພາ-ຊີ້ນໍາການປັບປຸງກໍ່ສ້າງພະນັກງານ ແລະ ແບບແຜນນໍາພາ, ແບບແຜນວິທີເຮັດວຽກທີ່ມີວິທະຍາສາດແທດເໝາະຕົວຈິງ ແລະ ຢຶດໝັ້ນນປະຕິບັດຫລັກການລວມສູນປະຊາທິປະໄຕຢ່າງເຂັ້ມງວດ; ຈະຕັ້ງໜ້າປັບປຸງການຈັດຕັ້ງພາຍໃນກໍາມາທິການ ໃຫ້ມີຄວາມໜັກແໜ້ນເຂັ້ມແຂງ ເພື່ອປະຕິບັດພາລະບົດບາດເປັນເສນາທິການຊ່ວຍຄະນະນໍາສະພາແຫ່ງຊາດ ແນໃສ່ຕອບສະຫນອງຕາມຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່; ຈະເສີມຂະຫຍາຍບົດບາດການພົວພັນຮ່ວມມືກັບສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາແຫ່ງຊາດທີ່ເປັນກໍາມະການຂອງກໍາມາທິການ ແລະ ບັນດາຂະແໜງການທີ່ກ່ຽວຂ້ອງ ຂອງສູນກາງ ແລະ ທ້ອງຖິ່ນ; ຈະສືບຕໍ່ຮັກສານາມມະຍົດເປັນໜ່ວຍພັກຮາກຖານ ກສຕສ ໃຫ້ເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ; ຈະສືບຕໍ່ແກ້ໄຂວຽກງານທີ່ຍັງຄົງຄ້າງທັງໝົດ ແລະ ປະຕິບັດວຽກງານຕາມພາລະບົດບາດ, ສິດ, ໜ້າທີ່ ຂອງຕົນ ແລະ ວຽກງານອື່ນໆ ຕາມການຊີ້ນໍາຂອງຄະນະປະຈໍາສະພາແຫ່ງຊາດ. ພ້ອມນີ້, ທ່ານຍັງຮຽກຮ້ອງມາຍັງບັນດາພະນັກງານ-ລັດຖະກອນພາຍໃນກາໍມາທິການ ຈົ່ງໄດ້ໃຫ້ຄວາມຮ່ວມມື, ສາມັກຄີເປັນເອກະພາບ, ຍົກສູງຄວາມຮັບຜິດຊອບ ເພື່ອເຮັດສໍາເລັດຫນ້າທີ່ການເມືອງທີ່ໄດ້ຮັບມອບໝາຍຈາກຂັ້ນເທິງໃຫ້ໄດ້ຮັບຫມາກຜົນເປັນຢ່າງດີ.

          ໃນຕອນທ້າຍ, ທ່ານ ສົມມາດ ພົລເສນາ ຍັງໄດ້ມີຄຳເຫັນໂອ້ລົມວ່າ: ການມອບຮັບໜ້າທີ່ລະຫວ່າງປະທານ ກສຕສ ຊຸດທີ VIII ແລະ ຊຸດທີ IX  ແມ່ນມີຄວາມໝາຍສຳຄັນ ເພື່ອສືບຕໍ່ຊີ້ນຳ-ນຳພາວຽກງານຂອງກຳມາທິການ ໃຫ້ດຳເນີນໄປຢ່າງເປັນປົກກະຕິ, ໃນຕະຫລອດໄລຍະເວລາ 5 ປີຜ່ານມາ ກສຕສ ຂອງສະພາແຫ່ງຊາດ ຊຸດທີ VIII ໂດຍມີທ່ານ ບຸນປອນ ສີສຸລາດ ເປັນປະທານກຳມາທິການ ໄດ້ພ້ອມກັບບັນດາທ່ານຮອງປະທານກຳມາທິການ ໄດ້ເຕົ້າໂຮມຄວາມສາມັກຄີພະນັກງານ-ລັດຖະກອນ ພາຍໃນກຳມາທິການໄດ້ເປັນຢ່າງດີ ທັງໄດ້ຊີ້ນຳ-ນຳພາປະຕິບັດຫນ້າທີ່ ເປັນເສນາທິການໃຫ້ຄະນະປະທານສະພາແຫ່ງຊາດ ກໍຄືຄະນະປະຈຳສະພາແຫ່ງຊາດ ຕາມ 3 ພາລະບົດບາດ ຂອງສະພາແຫ່ງຊາດ (ນິຕິບັນຍັດ, ຕົກລົງບັນຫາສຳຄັນພື້ນຖານຂອງຊາດ, ຕິດຕາມກວດກາ) ເຊິ່ງຍາດໄດ້ຜົນງານ ແລະ ຜົນສຳເລັດອັນໃຫຍ່ຫລວງໃນຫລາຍດ້ານ, ເປັນກຳມາທິການທີ່ຢູ່ແຖວໜ້າຂອງສະພາແຫ່ງຊາດຊຸດທີ VIII ແລະ ໃນວຽກງານ 5 ປີຕໍ່ໜ້າ ໃນຂົງເຂດເສດຖະກິດແມ່ນຫລວງຫລາຍ ແລະ ໜັກໜ່ວງ ແຕ່ເຊື່ອໝັ້ນວ່າພາຍໃຕ້ການນຳພາຂອງທ່ານ ລິນຄຳ ດວງສະຫວັນ ພ້ອມດ້ວຍຄະນະປະທານ ກສຕສ ຊຸດທີ IX ຈະສືບຕໍ່ເສີມຂະຫຍາຍມູນເຊື້ອຄວາມສາມັກຄີ ແລະ ຊີ້ນຳ-ນຳພາກຳມາທິການ ແບກຫາບພາລະໜ່າທີ່ອັນໜັກໜ່ວງ ທີ່ສະພາແຫ່ງຊາດ ກໍຄືຄະນະປະຈຳສະພາແຫ່ງຊາດ ມອບໝາຍໃຫ້ ແລະ ຈະສາມາດຍາດໄດ້ຜົນງານ ແລະ ຜົນສຳເລັດອັນໃຫຍ່ຫລວງກວ່າເກົ່າ.

                                                                ແຫຼ່ງຂ່າວທີ່ມາ: ສະພາແຫ່ງຊາດ