ກອງປະຊຸມຝຶກອົບຮົມພາລະບົດບາດ ສສຊ ແລະ ສສຂ
05/04/2021

        (ສພຊ) ໂດຍໄດ້ຮັບການສະໜັບສະໜູນຈາກແຜນງານເຊກາ ແລະ  Lux Dev ໃນວັນທີ 27 ມີນາຜ່ານມາ ທີ່ຫ້ອງປະຊຸມສູນການຮ່ວມມືສາກົນ ແລະ ການເຝິກອົບຮົມ (ICTC) ນະຄອນຫລວງວຽງຈັນ ໄດ້ມີກອງປະຊຸມເຝິກ ອົບຮົມກ່ຽວກັບພາລະບົດບາດຂອງສະພາແຫ່ງຊາດ (ສພຊ) ແລະ ສະພາປະຊາຊົນແຂວງ (ສພຂ) ໃຫ້ແກ່ສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນແຂວງ (ສສຂ) ໂດຍການເປັນປະທານຂອງທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ມີທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ ຊຸດທີ VIII, ທ່ານ ຄໍາແພງ ວິລະພັນ ປະທານກຳມາທິການຍຸຕິທຳ, ທ່ານ ອໍາໄພ ຈິດມານົນ ຮອງປະທານກຳມາທິການກົດໝາຍ ເປັນວິທະຍາກອນ, ສສຊ ປະຈຳເຂດເລືອກຕັ້ງທົ່ວປະເທດ, ສສຂ 5 ແຂວງຄື: ນະຄອນຫລວງວຽງຈັນ, ບໍລິຄຳໄຊ, ຄຳມ່ວນ, ໄຊຍະບູລີ, ໄຊສົມບູນ, ຮອງເຈົ້າຄອງນະຄອນຫລວງ, ຮອງເຈົ້າແຂວງ, ຕາງໜ້າສານປະຊາຊົນຂັ້ນແຂວງ ແລະ ໄອຍະການປະຊາຊົນຂັ້ນແຂວງ, ຫົວໜ້າຫ້ອງວ່າການແຂວງ ແລະ ພະແນກຍຸຕິທຳຂັ້ນແຂວງເຂົ້າຮ່ວມ.

          ທັງນີ້, ເພື່ອຍົກລະດັບຄວາມສາມາດໃຫ້ແກ່ ສສຊ ຊຸດທີ IX ແລະ ສສຂ ຊຸດທີ II ແນໃສ່ການປະຕິບັດພາລະບົດບາດຂອງ ສພຊ ແລະ ສພຂ ຕາມທີ່ໄດ້ກຳນົດໄວ້ໃນກົດໝາຍໃຫ້ມີປະສິດທິຜົນຍິ່ງຂຶ້ນ ແລະ ເປັນເວທີປຶກສາຫາລືພົບປະ, ແລກປ່ຽນບົດຮຽນເຊິ່ງກັນແລະກັນ ລະຫວ່າງ ສສຊ ແລະ ສສຂ.

ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງພາລະບົດບາດ, ສິດ ແລະ ໜ້າທີ່ ຂອງ ສພຊ ແລະ ສສຊ; ພາລະບົດບາດ, ສິດ ແລະ ໜ້າທີ່ ຂອງ ສພຂ ແລະ ສສຂ ໃນຖານະເປັນອົງການຈັດຕັ້ງທີ່ເປັນຕົວແທນແຫ່ງສິດອຳນາດຂອງປະຊາຊົນບັນດາເຜົ່າ, ເປັນອົງການຮັບຮອງເອົາການສ້າງ ແລະ ປັບປຸງລັດຖະທຳມະນູນ ແລະ ກົດໝາຍ, ອົງການຮັບ ຮອງເອົາການສ້າງ ແລະ ປັບປຸງນິຕິກຳຂັ້ນທ້ອງຖິ່ນ, ຕິດຕາມກວດກາ ແລະ ຕົກລົງບັນຫາສຳຄັນພື້ນຖານຂອງສູນກາງ ແລະ ທ້ອງຖິ່ນ; ບົດຮຽນໃນການປະຕິບັດໜ້າທີ່ດ້ານນິຕິບັນຍັດ ໃນຂະບວນການສ້າງ, ປັບປຸງກົດໝາຍ ແລະ ນິຕິກຳຂອງທ້ອງຖິ່ນ ແລະ ບົດຮຽນໃນການແກ້ໄຂຄຳຮ້ອງຂໍຄວາມເປັນທໍາຂອງພົນລະເມືອງ ທີ່ຕິດພັນກັບການແກ້ໄຂບັນຫາຄວາມຍຸຕິທຳໃຫ້ແກ່ປະຊາຊົນ ກໍຄືສັງຄົມ; ພ້ອມນັ້ນ, ຜູ້ເຂົ້າຮ່ວມຍັງເຊີດຊູຄວາມຮັບຜິດຊອບສົນທະນາແລກປ່ຽນຄວາມຄິດຄວາມເຫັນເຊິ່ງກັນແລະກັນ ໃນການຈັດຕັ້ງປະຕິບັດວຽກງານຕ່າງໆ ເພື່ອໃຫ້ວຽກງານມີປະສິດທິພາບ, ປະສິດທິຜົນ ແລະ ບັນລຸຕາມລະດັບຄາດໝາຍທີ່ວາງໄວ້.

        ພ້ອມນັ້ນ, ປະທານກອງປະຊຸມ ຍັງໄດ້ເນັ້ນໃຫ້ບັນດາທ່ານ ສສຊ ແລະ ສສຂ ຈົ່ງນຳເອົາບົດຮຽນທີ່ໄດ້ໄປຈັດຕັ້ງຜັນຂະຫຍາຍເຂົ້າສູ່ໜ້າທີ່ການເມືອງຕົວຈິງໃຫ້ມີຄຸນນະພາບຍິ່ງຂຶ້ນ ແລະ ນຳເອົາບົດຮຽນ ແລະ ຄວາມຄິດຄວາມເຫັນທີ່ຖອດຖອນໄດ້ນຳໄປໝູນໃຊ້ເຂົ້າໃນວຽກງານຕົວຈິງໃນທ້ອງຖິ່ນຂອງຕົນ ໃຫ້ມີຄວາມຖືກຕ້ອງ, ສອດຄ່ອງ ສາ ມາດແກ້ໄຂໄດ້ຕາມລະດັບຄາດໝາຍທີ່ວາງໄວ້.

                                                                                         ແຫຼ່ງຂ່າວທີ່ມາ: ສະພາແຫ່ງຊາດ