ຮອງປະທານ ສພຊ ເຄື່ອນໄຫວຕິດຕາມຊຸກຍູ້ວຽກງານບຸກຄະລາກອນ
25/02/2021

        (ສພຊ) ລະຫວ່າງວັນທີ 3-8 ກຸມພາ 2021, ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ (ສພຊ), ຮອງຫົວໜ້າອະນຸກຳມະການໂຄງປະກອບ ແລະ ບຸກຄະລາກອນ ໄດ້ເຄື່ອນໄຫວຕິດຕາມກວດກາການໂຄສະນາຫາສຽງ ຂອງຜູ້ສະໝັກຮັບເລືອກຕັ້ງ ແລະ ການດຳເນີນການປ່ອນບັດເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ IX ແລະ ສະມາຊິກສະພາປະຊາຊົນແຂວງ (ສສຂ) ຊຸດທີ II ຢູ່ 3 ແຂວງຄື: ບໍລິຄຳໄຊ, ຄຳມ່ວນ ແລະ ສະຫວັນນະເຂດ.

        ທັງນີ້, ເພື່ອເປັນການປະສານສົມທົບກັບກຳມະການເລືອກຕັ້ງຂັ້ນທ້ອງຖິ່ນຕິດຕາມກວດກາຊຸກຍູ້ການໂຄສະນາຫາສຽງຂອງຜູ້ສະໝັກຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II; ເພື່ອຕິດຕາມຄວາມພ້ອມໃນການກະກຽມປ່ອນບັດເລືອກຕັ້ງ ແລະ ການດຳເນີນການປ່ອນບັດເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II  ແລະ ເພື່ອປະສານສົມທົບ ແລະ ປຶກສາຫາລືວຽກງານຕ່າງໆກ່ຽວກັບການສະຫລຸບການເລືອກຕັ້ງ ແລະ ລາຍງານໃຫ້ຄະນະກຳມະການເລືອກຕັ້ງລະດັບຊາດ.

        ໃນການເຄື່ອນໄຫວ, ໄດ້ຮັບຟັງບົດລາຍງານການເຄື່ອນໄຫວວຽກງານ, ການກະກຽມໃຫ້ແກ່ການເລືອກຕັ້ງ ສສຊ ຊຸດທີ IX ແລະ ສສຂ ຊຸດທີ II ຈາກຄະນະກຳມະການເລືອກຕັ້ງຂັ້ນແຂວງ, ຂັ້ນເມືອງ ແລະ ຂັ້ນບ້ານ ເຊິ່ງທ່ານ ສຸວັນນີ ໄຊຊະນະ ປະທານສະພາປະຊາຊົນແຂວງ (ສພຂ) ບໍລິຄຳໄຊ ໄດ້ລາຍງານໃຫ້ຮູ້ວ່າ: ແຂວງບໍລິຄຳໄຊ ມີໜ່ວຍປ່ອນບັດເລືອກຕັ້ງທັງໝົດ 201 ໜ່ວຍ ໃນນັ້ນ, ເມືອງປາກຊັນ 32 ໜ່ວຍ, ເມືອງທ່າພະບາດ 18 ໜ່ວຍ, ເມືອງປາກກະດິງ 26 ໜ່ວຍ, ເມືອງບໍລິຄັນ 43 ໜ່ວຍ, ເມືອງຄຳເກີດ 40 ໜ່ວຍ, ເມືອງວຽງທອງ 25 ໜ່ວຍ, ເມືອງໄຊຈຳພອນ 8 ໜ່ວຍ, ກອງບັນຊາການ ປກຊ ແຂວງ 8 ໜ່ວຍ ແລະ ກອງບັນຊາການ ປກສ ແຂວງ 1 ໜ່ວຍ ມີຜູ້ປ່ອນບັດເລືອກຕັ້ງຕາມສຳມະໂນຄົວ 199.287 ຄົນ ຍິງ 97.001 ຄົນ, ຜູ້ມີສິດປ່ອນບັດເລືອກຕັ້ງຢູ່ໃນບ້ານຂອງຕົນ ຕາມສຳມະໂນຄົວ 171.505 ຄົນ ຍິງ 83.143 ຄົນ,  ຜູ້ມີສິດປ່ອນບັດເລືອກຕັ້ງຢູ່ທ້ອງຖິ່ນອື່ນ ຕາມສໍາມະໂນຄົວ 19.746 ຄົນ ຍິງ 8.625 ຄົນ, ຜູ້ໄປເຮັດວຽກຢູ່ຕ່າງປະເທດ ຕາມສຳມະໂນຄົວ 8.036 ຄົນ ຍິງ 5.233 ຄົນ, ຜູ້ມີສິດມາຈາກທ້ອງຖິ່ນອື່ນ 1.167 ຄົນ ຍິງ 502 ຄົນ,  ສຳລັບຜູ້ທີ່ຈະມາໃຊ້ສິດປ່ອນບັດຕົວຈິງ ໃນວັນທີ 21 ກຸມພາ 2021 ມີທັງໝົດ 172.672  ຄົນ ຍິງ 83.645 ຄົນ (ຕົວຈິງ ຕົວເລກສະຖິຕິດັ່ງກ່າວ ອາດມີການຄາດເຄື່ອນຕື່ມອີກ); ທ່ານ ສົມໃຈ ເພັດສີນວນ ປະທານ ສພຂ ຄຳມ່ວນ ໄດ້ລາຍງານໃຫ້ຮູ້ວ່າ: ແຂວງຄຳມ່ວນ ມີໜ່ວຍປ່ອນບັດທັງໝົດ 369 ໜ່ວຍ ໃນນັ້ນ, ເມືອງທ່າແຂກ 70 ໜ່ວຍ, ເມືອງໄຊບົວທອງ 27 ໜ່ວຍ, ເມືອງເຊບັ້ງໄຟ 19 ໜ່ວຍ, ເມືອງນາກາຍ 23 ໜ່ວຍ, ເມືອງຄູນຄຳ 23 ໜ່ວຍ, ເມືອງໜອງບົກ 54 ໜ່ວຍ, ເມືອງຍົມມະລາດ 29 ໜ່ວຍ, ເມືອງມະຫາໄຊ 54 ໜ່ວຍ, ເມືອງບົວລະພາ 23 ໜ່ວຍ, ເມືອງຫີນບູນ 47 ໜ່ວຍ ແລະ ມີຜູ້ມີສິດເລືອກຕັ້ງທັງໝົດ 230.331 ຄົນ ຍິງ 119.746 ຄົນ; ທ່ານ ຄໍາເຜີຍ ຜັນທະຈອນ ປະທານ ສພຂ ສະຫວັນນະເຂດ ລາຍງານໃຫ້ຮູ້ວ່າ: ແຂວງສະຫວັນນະເຂດ ມີໜ່ວຍເລືອກຕັ້ງທັງໝົດ 863 ໜ່ວຍ ໃນນັ້ນ, ນະຄອນໄກສອນພົມວິຫານ 75 ໜ່ວຍ,​ ເມືອງອຸທຸມພອນ 88 ໜ່ວຍ, ເມືອງໄຊບູລີ 52 ໜ່ວຍ, ເມືອງອາດສະພອນ 76 ໜ່ວຍ, ເມືອງອາດສະພັງທອງ 47 ໜ່ວຍ, ເມືອງພະລານໄຊ 30 ໜ່ວຍ, ເມືອງພິນ 47 ໜ່ວຍ, ເມືອງເຊໂປນ 64 ໜ່ວຍ, ເມືອງນອງ 38 ໜ່ວຍ, ເມືອງວິລະບູລີ 46 ໜ່ວຍ, ເມືອງໄຊພູທອງ 45 ໜ່ວຍ, ເມືອງສອງຄອນ 65 ໜ່ວຍ, ເມືອງຈຳພອນ 86 ໜ່ວຍ, ເມືອງຊົນບູລີ 41 ໜ່ວຍ ແລະ ເມືອງທ່າປາງທອງ 61 ໜ່ວຍ; ຄາດຄະເນມີຜູ້ມີສິດເລືອກຕັ້ງອາຍຸ 18 ປີຂຶ້ນໄປ 664.319 ຄົນ ຍິງ 336.379 ຄົນ, ຜູ້ມີສິດເລືອກຕັ້ງມີໜ້າຕົວຈິງ 539.822 ຄົນ ຍິງ 279.557 ຄົນ, ໄປສຶກສາຮ່ຳຮຽນຢູ່ທ້ອງຖິ່ນອື່ນພາຍໃນປະເທດ 5.308 ຄົນ ຍິງ 2.196 ຄົນ ແລະ ສຶກສາຕ່າງປະເທດ 813 ຄົນ ຍິງ 427 ຄົນ, ໄປອອກແຮງງານຢູ່ທ້ອງຖິ່ນອື່ນພາຍໃນປະເທດ 31.982 ຄົນ ຍິງ 11.703 ຄົນ ແລະ ໄປອອກແຮງງານຕ່າງປະເທດ 80.652 ຄົນ ຍິງ 42.983 ຄົນ; ພ້ອມທັງຕິດຕາມກວດກາການກະກຽມຄວາມພ້ອມໃຫ້ແກ່ການປ່ອນບັດເລືອກຕັ້ງ ແລະ ການດຳເນີນການປ່ອນບັດເລືອກຕັ້ງ ຂອງຄະນະກຳມະການເລືອກຕັ້ງຂັ້ນທ້ອງຖິ່ນ ຢູ່ສະຖານທີ່ໂຕຈິງໜ່ວຍປ່ອນບັດເລືອກຕັ້ງເມືອງປາກຊັນ ແລະ ບ້ານໜອງປໍ ເມືອງຄຳເກີດ ແຂວງບໍລິຄຳໄຊ, ໜ່ວຍປ່ອນບັດເລືອກຕັ້ງບ້ານຈອມທອງ ເມືອງທ່າແຂກ ແລະ ບ້ານແກ້ງຈອນ ເມືອງໄຊບົວທອງ ແຂວງຄຳມ່ວນ, ໜ່ວຍປ່ອນບັດເລືອກຕັ້ງບ້ານນາເລົ່າ ນະຄອນໄກສອນພົມວິຫານ ແລະ ເມືອງພິນ ແຂວງສະຫວັນນະເຂດຕື່ມອີກ.

       ທ່ານ ແສງນວນ ໄຊຍະລາດ ໄດ້ມີຄໍາເຫັນເນັ້ນໃຫ້ແຕ່ລະໜ່ວຍເລືອກຕັ້ງຮີບຮ້ອນສືບຕໍ່ກະກຽມ, ປະຕິບັດໜ້າທີ່ວຽກງານ ແລະ ສ້າງຂະບວນການຕ່າງໆໃຫ້ມີຄວາມຟົດຟື້ນ ເພື່ອໃຫ້ກາຍເປັນປາງບຸນໃຫຍ່ສຳຄັນຂອງຊາດ ທັງຮັບປະກັນໃຫ້ໄດ້ຄວາມສະຫງົບທົ່ວສັງຄົມ ກໍຄືພາຍໃນຄອບຄົວ, ບ້ານ, ເມືອງ ແລະ ແຂວງຂອງຕົນ; ສືບຕໍ່ເກັບກຳສະຖິຕິພົນລະເມືອງຂອງຕົນທີ່ໄປອາໄສ ຫລື ເຮັດວຽກຢູ່ເຂດແຂວງອື່ນ ແລະ ພົນລະເມືອງແຂວງອື່ນທີ່ມາອາໄສຢູ່ພາຍໃນແຂວງຂອງຕົນໃຫ້ລະອຽດຈະແຈ້ງ; ເອົາໃຈໃສ່ຕິດຕາມເກັບກຳສະພາບການຕ່າງໆໃນທົ່ວສັງຄົມ ແລະ ຕີຖອຍປາກົດການຫຍໍ້ທໍ້ຕ່າງໆ ໂດຍສະເພາະໃນສື່ສັງຄົມອອນລາຍ; ຮັບປະກັນໃຫ້ການເລືອກຕັ້ງໃຫ້ໄດ້ 300/100 ເພື່ອໃຫ້ຜູ້ມີສິດເລືອກຕັ້ງນຳໃຊ້ສິດຢ່າງເຕັມສ່ວນ ທັງຮັບປະກັນບໍ່ໃຫ້ມີບັດຕາຍ; ເອົາໃຈໃສ່ຈັດແຈງສະຖານທີ່ ແລະ ອຸປະກອນຮັບໃຊ້ໃນການປ່ອນບັດເລືອກຕັ້ງ ໃຫ້ຮັບປະກັນໄດ້ຄວາມປອດໄພ ແລະ ມີປະສິດທິພາບຫລາຍທີ່ສຸດ ພ້ອມທັງຄຸມເຂັ້ມປ້ອງກັນການແຜ່ລະບາດຂອງພະຍາດໂຄວິດ-19 ຕາມການຊີ້ນຳຂອງຄະນະສະເພາະກິດ.

                                                          ແຫຼ່ງຂ່າວທີ່ມາ: ສະພາແຫ່ງຊາດ