ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ຄະນະບໍລິຫານງານພັກສະພາແຫ່ງຊາດສະຫລຸບວຽກງານປະຈຳປີ 2017
06/01/2018

ທ່ານ ສຸບັນ ສະວະບຸດ ກຳມະການຄະນະພັກ, ເລຂາຄະນະພັກຮາກຖານ, ຫົວໜ້າຄະນະຊ່ວຍ ວຽກຄະນະພັກ, ຮອງເລຂາທິການສະພາແຫ່ງຊາດ ໄດ້ຂຶ້ນຜ່ານບົດສະຫລຸບ ການເຄື່ອນໄຫວ ວຽກງານໃນ 1 ປີຜ່ານມາ ສາມາດຍາດໄດ້ຜົນສຳເລັດຫລາຍດ້ານ ເປັນຕົ້ນແມ່ນ ໄດ້ຮັບຮອງເອົາການສ້າງ ແລະ ປັບປຸງກົດໝາຍໄດ້ທັງໝົດ 28 ສະບັບ, ບັນລຸໄດ້ 94% ຂອງແຜນປີ ແລະ ກວມ 29,52% ທຽບໃສ່ແຜນ ການ 5 ປີ. ໃນນີ້, ກົດໝາຍສ້າງໃໝ່ 12 ສະບັບ, ຄະນະພັກກຳມາທິການກົດໝາຍ ເປັນເຈົ້າການສົມ ທົບກັນໃນການຊຸກຍູ້ ບັນດາກະຊວງ, ອົງການ ແລະ ຂະແໜງການຕ່າງໆ ໃນການຄົ້ນຄວ້າ ກະກຽມ, ກວດກາເນື້ອໃນຮ່າງກົດໝາຍ ແລະ ສາມາດນຳເຂົ້າພິຈາລະນາຮັບຮອງ ໃນກອງປະຊຸມສະໄໝສາມັນ ເທື່ອທີ 3 ແລະ ເທື່ອທີ 4 ຂອງສະພາແຫ່ງຊາດ ຊຸດທີ VIII ໄດ້ທັງໝົດ 28  ສະບັບ, ເປັນເຈົ້າການໃນ ການຄົ້ນຄວ້າປະກອບຄຳເຫັນ ຕໍ່ການໃຫ້ສັດຕະຍາບັນແກ່ສົນທິສັນຍາ, ສັດຕະຍາບັນທີ່ສປປ ລາວ ເປັນພາຄີໄດ້ຈຳນວນໜຶ່ງ.

ຄະນະບໍລິຫານງານພັກພະສາແຫ່ງຊາດ ໄດ້ເອົາໃຈໃສ່ນຳພາ ຕາມຫລັກການລວມສູນປະຊາທິປະໄຕ, ຕົກລົງຕັດສິນບັນຫາ ທີ່ສຳຄັນເປັນໝູ່ຄະນະ, ມີການແບ່ງງານ, ແບ່ງຄວາມຮັບຜິດຊອບ ພາຍໃນຄະນະພັກເປັນ 4 ຂົງເຂດການນຳພາ ຄື: ຂົງເຂດວຽກງານ ຈັດຕັ້ງພັກ-ພະນັກງານ, ວຽກງານໂຄສະນາຂະບວນການ ແລະ ອົງການຈັດຕັ້ງມະຫາຊົນ, ວຽກງານປ້ອງກັນ ແລະ ວຽກງານເສດຖະກິດ ການຄັງ. ນອກນີ້, ຍັງປະຕິບັດລະບອບປະຊຸມ ແລະ ລະບອບການສ່ອງແສງ ລາຍງານຢ່າງເປັນປົກກະຕິ ເອົາໃຈໃສ່ປັບປຸງວິທີການ ແລະ ເນື້ອໃນຂອງການດຳເນີນຊີວິດການເມືອງ ຂອງບັນດາຮາກຖານພັກ ໃຫ້ແທດກັບ ຕົວຈິງ ໄດ້ວາງຫລາຍນິຕິກຳເພື່ອເປັນບ່ອນອີງ ໃນການເຄື່ອນໄຫວນຳພາຂອງຄະນະພັກ ຂັ້ນຕ່າງໆ ຖືກ ກັບໜ້າທີ່ການເມືອງ ໃນແຕ່ລະໄລຍະນຳພາບັນດາຮາກຖານພັກ ເອົາໃຈໃສ່ສ້າງ ແລະ ປັບປຸງຕາມ 5 ຫລັກການ ແລະ 3 ທິດນຳ ເພື່ອເພີ່ມທະວີຄວາມຮັບຜິດຊອບ ໃນການນຳພາດຳເນີນຊີວິດການເມືອງປົກ ກະຕິ.

ສຳລັບທິດທາງແຜນການ 2018 ຄະນະບໍລິຫານງານ ພັກສະພາແຫ່ງຊາດ ຈະເພີ່ມທະວີ ແລະ ຍົກສູງບົດບາດການນຳພາ ຂອງອົງຄະນະພັກສະພາແຫ່ງຊາດ ຕໍ່ທຸກຂົງເຂດວຽກງານຂອງສະພາແຫ່ງ ຊາດ, ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ສະພາແຫ່ງຊາດ ເປັນອັນລະອຽດ ແຕ່ລະດ້ານ ແລະ ຈັດຕັ້ງປະຕິບັດໃຫ້ມີຜົນສຳເລັດ, ປັບປຸງກົງຈັກເສນາທິການຂັ້ນຕ່າງໆ ໃຫ້ເປັນລະບົບ ແລະ ຮັບປະກັນການເຄື່ອນໄຫວຢ່າງມີຄຸນນະພາບ ແລະ ຮັບປະກັນການກໍ່ສ້າງ ແລະ ປັບປຸງຕົນເອງ ຂອງອົງຄະນະພັກສະພາແຫ່ງຊາດຕາມ 5 ຫລັກການ ແລະ 3 ທິດ.

ໃນໂອກາດດັ່ງກ່າວ, ທ່ານ ສົມພູ ດວງສະຫວັນ ກຳມະການຄະນະພັກ, ປະທານກຳມະທິການ ວັດທະນະທຳ-ສັງຄົມ ຍັງໄດ້ໃຫ້ກຽດປະຖະກະຖາ ເນື່ອງໃນໂອກາດວັນຕ້ານ ການສໍ້ລາດບັງຫລວງ ສາກົນ ຄົບຮອບ 14 ປີ (9/12/2003 - 9/12/2017) ເພື່ອເປັນການທົບທວນຄືນ ການສ້າງຕັ້ງວັນຕ້ານວັນດັ່ງ ກ່າວ ໃນການຈັດຕັ້ງປະຕິບັດ ການສະກັດກັ້ນ ແລະ ຕ້ານການສໍ້ລາດບັງຫລວງ ຢູ່ ສປປ ລາວ ໃນໜຶ່ງ ປີຜ່ານມາ ແລະ ວາງທິດທາງ, ໜ້າທີ່ສະເພາະ ເພື່ອເຮັດໃຫ້ວຽກງານສະກັດກັ້ນ ແລະ ຕ້ານການສໍ້ລາດ ບັງຫລວງ ໄດ້ກາຍເປັນໜ້າທີ່ ແລະ ຄວາມຮັບຜິດຊອບ ຂອງທົ່ວປວງຊົນ ໃນການຕິດຕາມ, ກວດກາ, ແກ້ໄຂ ພຶດຕິກຳທີ່ເປັນການສໍ້ລາດບັງຫລວງ ຮ່ວມກັນຢ່າງກວ້າງຂວາງ ແລະ ເລິກເຊິງເຖິງຖອງ.