ປະທານ ສພຊ ຢ້ຽມຢາມຜູ້ປະສົບໄພນ້ຳຖ້ວມ ຢູ່ແຂວງສະຫວັນນະເຂດ
04/11/2020

(ສພຊ) ວັນທີ 31 ຕຸລາ ຜ່ານມາ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ຢ້ຽມຢາມ ແລະ ພົບປະປະຊາຊົນຜູ້ທີ່ຖືກຜົນກະທົບຈາກໄພນໍ້າຖ້ວມ ຢູ່ 2 ຈຸດ ຄື: ບ້ານທ່າຂາມລຽນ, ບ້ານລະຫານໍ້າ ເມືອງສອງຄອນ ແລະ ບ້ານກອງປະທຸມວັນ ເມືອງຊົນນະບູລີ; ໂດຍການເຂົ້າຮ່ວມທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດ, ມີບັນດາການນຳແຂວງ, ພະແນກການອ້ອມຂ້າງແຂວງ, ການນຳເມືອງ ພ້ອມທັງພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມ.

ຢູ່ຈຸດທີໜຶ່ງ: ທ່ານ ພັອ. ລຳຄູນ ວິລະວົງ ເຈົ້າເມືອງໆສອງຄອນ ໄດ້ລາຍງານສະພາບນ້ຳຖ້ວມຢູ່ເຂດເມືອງສອງຄອນ ໃຫ້ຮູ້ວ່າ: ເຮືອນຊານຂອງປະຊາຊົນໄດ້ຮັບຜົນເສຍຫາຍ 23 ບ້ານ, 2.628 ຄອບຄົວ, 15.493 ຄົນ, ຜົນກະທົບຕໍ່ເນື້ອທີ່ທຳການຜະລິດຂອງປະຊາຊົນ ເນື້ອທີ່ນາປີຖືກນໍ້າຖ້ວມ 5.416,25 ເຮັກຕາ, ໜອງປາ 340 ໜອງ, ເນື້ອທີ່ສວນປູກພືດ 96,58 ເຮັກຕາ, ອ່າງເກັບນ້ຳ 1 ແຫ່ງ, ລະບົບຊົນລະປະທານ 9 ແຫ່ງ, ສະຖານີຈັກສູບນ້ຳ 9 ແຫ່ງ, ສັດລ້ຽງຕາຍ ແລະ ສູນຫາຍ 17 ໂຕ; ນອກຈາກນັ້ນ, ກໍຍັງມີຜົນກະທົບຕໍ່ພື້ນຖານໂຄງລ່າງຄື: ເສັ້ນທາງເສຍຫາຍຫລາຍກວ່າ 10 ເສັ້ນ, ໂຮງຮຽນຢຸດການຮຽນການສອນຊົ່ວຄາວ 12 ແຫ່ງ, ສຸກສາລາ 2 ແຫ່ງ, ນໍ້າສ້າງນໍ້າບາດານ 401 ໜ່ວຍ, ນໍ້າສ້າງທໍ່ 18​ ໜ່ວຍ ແລະ ວິດຖ່າຍ 1.544 ຫລັງ.

ຢູ່ຈຸດທີສອງ: ທ່ານ ສຸວິໄລ ຫລວງຊະລາດ ເຈົ້າເມືອງໆຊົນນະບູລີ ໄດ້ລາຍງານໃຫ້ຮູ້ວ່າ: ເມືອງຊົນນະບູລີ ໄດ້ຮັບຜົນເສຍຫາຍນໍ້າຖ້ວມ 15 ບ້ານ, 4.436 ຫລັງຄາເຮືອນ, ເນື້ອທີ່ຖືກຖ້ວມ 7.288 ເຮັກຕາ, ເນື້ອທີ່ສວນປູກພືດ 176 ເຮັກຕາ, ໜອງປາ 369 ໜອງ, ລະບົບຊົນລະປະທານ 9 ແຫ່ງ, ປະຕູນໍ້າ 3 ແຫ່ງ, ສັດລ້ຽງຕາຍ ແລະ ສູນຫາຍ 128 ໂຕ, ໂຮງຮຽນຖືກຖ້ວມ 27 ແຫ່ງ, ສຸກສາລາ 8 ເຂດ, ວັດ 13 ວັດ,  ນໍ້າສ້າງ-ນໍ້າບາດານ 402 ໜ່ວຍ, ວິດຖ່າຍ 1.228 ແລະ ເສັ້ນທາງເສຍຫາຍ 12 ເສັ້ນ.

ໂອກາດດຽວກັນ, ທ່ານ ນາງ ປານີ ຢາທໍ່ຕູ້ ໄດ້ສະແດງຄວາມຍ້ອງຍໍຊົມເຊີຍອຳນາດການປົກຄອງທຸກຂັ້ນທີ່ເອົາໃຈໃສ່ຊ່ວຍເຫລືອປະຊາຊົນ ພ້ອມທັງສະແດງຄວາມເປັນຫວ່ງເປັນໃຍປະຊາຊົນທີ່ຖືກຜົນກະທົບຈາກໄພພິບັດນ້ຳຖ້ວມໃນຄັ້ງນີ້, ທ່ານຍັງໄດ້ເນັ້ນໃຫ້ປະຊາຊົນມີສະຕິລະວົງຕົວ ກະກຽມລ່ວງໜ້າແຕ່ຫົວປີໃນການຮັບມືກັບນໍ້າຖ້ວມ ເນື່ອງຈາກວ່າເຂດບ້ານດັ່ງກ່າວແມ່ນນໍ້າຖ້ວມທຸກປີ, ພ້ອມທັງໃຫ້ປະຊາຊົນພ້ອມພຽງກັນກະກຽມເຮັດນາແຊງ, ກະກຽມແນວພັນຜົນລະປູກອື່ນໆ ເພື່ອສືບຕໍ່ປູກໃນເວລາທີ່ນໍ້າລົງແລ້ວ; ໃຫ້ປະຊາຊົນຮັກສາສຸຂະອະນາໄມ ເພື່ອປ້ອງກັນບໍ່ໃຫ້ຕິດເຊື້ອພະຍາດ, ພ້ອມກັນອະນາໄມໂຮງຮຽນ ເພື່ອໃຫ້ໄດ້ເປີດການຮຽນການສອນໃນໄວໆນີ້; ນອກຈາກນັ້ນ, ຍັງໄດ້ເນັ້ນໜັກໃຫ້ສືບຕໍ່ເອົາໃຈໃສ່ວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດໂຄວິດ-19, ບໍ່ໃຫ້ຖືເບົາເດັດຂາດ; ໃນສະພາບທີ່ຍັງມີການລະບາດຂອງພະຍາດໂຄວິດ-19 ໃນບັນດາປະເທດ, ແຜນການພັດທະນາໃນຕໍ່ໜ້າໃຫ້ເອົາໃຈໃສ່ນຳໃຊ້ທ່າແຮງຂອງທ້ອງຖິ່ນໃຫ້ເກີດປະໂຫຍດສູງສຸດ ໂດຍສະເພາະສົ່ງເສີມປະຊາຊົນເພີ່ມພູນຜະລິດຜົນໃຫ້ເປັນຂະບວນການກວ້າງຂວາງ ເພື່ອຫລຸດຜ່ອນການນຳເຂົ້າສິນຄ້າ, ການໄປໃຊ້ແຮງງານໃນຕ່າງປະເທດ ສ້າງລາຍຮັບ ແລະ ປັບປຸງຊີວິດການເປັນຢູ່ຂອງເຂົາເຈົ້າໃຫ້ນັບມື້ດີຂຶ້ນ; ໃຫ້ສືບຕໍ່ຊ່ວຍເຫລືອປະຊາຊົນໃນຫລາຍດ້ານ ເປັນຕົ້ນອາຫານການກິນ, ນ້ຳດື່ມ, ຢາປົວພະຍາດ, ສືບຕໍ່ໃນການປຸກລະດົມຂົນຂວາຍເອົາເຄື່ອງໃຊ້ເພື່ອມາຊ່ວຍເຫລືອຜູ້ທີ່ຖືກຜົນກະທົບຈາກໄພນ້ຳຖ້ວມ; ໃຫ້ເບິ່ງຄວາມຕ້ອງການຂອງປະຊາຊົນ ບໍ່ວ່າຈະເປັນແນວພັນພືດ, ແນວພັນເຂົ້າ, ດ້ານສຸກສາລາ, ວິດຖ່າຍ, ແລະ ໂຮງຮຽນ; ພ້ອມດຽວກັນນັ້ນ, ແມ່ນໄດ້ນໍາເອົາຄໍາຄິດຄຳເຫັນຂອງພໍ່ແມ່ປະຊາຊົນໄປສະເໜີຕໍ່ພາກສ່ວນທີ່ກ່ຽວຂ້ອງຄົ້ນຄວ້າພິຈາລະນາ ເພື່ອຫາວິທີແກ້ໄຂ.

ໂອກາດທີ່ມາຢ້ຽມຢາມຄັ້ງນີ້, ທ່ານ ນາງ ປານີ ຢາທໍ່ຕູ້ ພ້ອມດ້ວຍຄະນະ ໄດ້ມອບເຄື່ອງອຸປະໂພກ ແລະ ບໍລິໂພກ ໃຫ້ປະຊາຊົນທີ່ຖືກຜົນກະທົບຢູ່ເມືອງສອງຄອນ, ຊົນນະບູລີ ປະກອບມີ: ເຂົ້າສານ, ອາຫານແຫ້ງ ແລະ ນ້ຳດື່ມ ລວມມູນຄ່າ 300 ກວ່າລ້ານກີບ ເຊິ່ງເຄື່ອງຈໍານວນດັ່ງກ່າວແມ່ນໄດ້ຮັບການອຸປະຖຳຈາກພາກສ່ວນຕ່າງໆໃນສັງຄົມ ເປັນຕົ້ນທະນາຄານ, ບໍລິສັດ, ຫ້າງຮ້ານ ແລະ ອື່ນໆ ເພື່ອໃຫ້ສະພາແຫ່ງຊາດນຳໄປມອບຕໍ່ໃຫ້ພໍ່ແມ່ປະຊາຊົນຜູ້ທີ່ຖືກຜົນກະທົບຈາກໄພນໍ້າຖ້ວມ.

 (ສົມນຶກ ແກ້ວໄຊຍະຈັກ)