ສພຊ ຈັດພິທີມອບ-ຮັບບັດສະມາຊິກພັກ
05/10/2020

          (ສພຊ) ຕອນບ່າຍວັນທີ 30 ກັນຍາ 2020, ສະພາແຫ່ງຊາດ (ສພຊ) ໄດ້ມີພິທີມອບ-ຮັບບັດສະມາຊິກພັກສົມບູນ ຊຸດທີ VII ໃຫ້ແກ່ສະມາຊິກພັກພາຍໃນອົງຄະນະພັກສະພາແຫ່ງຊາດ ໂດຍການເປັນປະທານຂອງສະຫາຍ ນາງ ສີໃສ ລືເດດມູນສອນ ກຳມະການສູນກາງພັກ, ຮອງເລຂາຄະນະບໍລິຫານງານພັກ, ຮອງປະທານສະພາແຫ່ງຊາດ; ມີບັນດາສະຫາຍຜູ້ຕາງໜ້າຈາກບັນດາຮາກຖານພັກ, ໜ່ວຍພັກ ພາຍໃນອົງຄະນະພັກສະພາແຫ່ງຊາດ ແລະ ບັນດາສະຫາຍສະມາຊິກພັກສົມບູນທັງໝົດເຂົ້າຮ່ວມ.

          ໃນພິທີ, ສະຫາຍ ວຽງແກ້ວ ວັນນະຈັກ ຫົວໜ້າກົມຈັດຕັ້ງພະນັກງານ ໄດ້ອ່ານຂໍ້ຕົກລົງຂອງຄະນະປະຈຳ ພັກສະພາແຫ່ງຊາດ ວ່າດ້ວຍການຮັບຮອງການອອກບັດສະມາຊິກພັກສົມບູນ ຂອງອົງຄະນະພັກສະພາແຫ່ງຊາດ ຊຸດທີ VII ຂອງບັນດາສະຫາຍສະມາຊິກພັກສົມບູນ ຈຳນວນ 34 ສະຫາຍ.

          ກອງປະຊຸມ ໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາ ຈາກສະຫາຍ ນາງ ສີໃສ ລືເດດມູນສອນ ເຊິ່ງສະຫາຍໄດ້ເນັ້ນໃຫ້ສະມາຊິກພັກຮັບຮູ້ເຖິງຄວາມໝາຍຄວາມສໍາຄັນຂອງບັດສະມາຊິກພັກ, ພາລະບົດບາດ, ສິດ ແລະ ໜ້າທີ່ ຂອງການເປັນສະມາຊິກພັກສົມບູນ, ຄວນເປັນແບບຢ່າງໃຫ້ມະຫາຊົນ, ເອົາໃຈໃສ່ຄົ້ນຄວ້າຫລັກມູນກໍາແໜ້ນທິດສະດີ ແລະ ພຶດຕິກໍາຕົວຈິງ, ບັນດາສະຫາຍສະມາຊິກພັກ ເປັນກຳລັງແຮງສຳຄັນຂອງສະພາແຫ່ງຊາດ, ໃຫ້ເອົາໃຈໃສ່ສືບຕໍ່ບຳລຸງທິດສະດີ-ການເມືອງໃຫ້ເປັນລະບົບຕໍ່ເນື່ອງ; ສືບຕໍ່ສຶກສາຮ່ຳຮຽນເອົາແນວຄິດຂອງປະທານ ໄກສອນ ພົມວິຫານ ຢ່າງເປັນລະບົບໃນສະຖາບັນການສຶກສາຕ່າງໆ ແລະ ທິດທາງການເຄື່ອນໄຫວຂອງສະພາແຫ່ງຊາດແຕ່ລະໄລຍະ.

                                                                                      ແຫຼ່ງຂ່າວທີ່ມາ: ສະພາແຫ່ງຊາດ