ປະທານ ສພຊ ໃຫ້ສຳພາດກ່ຽວກັບຜົນສຳເລັດກອງປະຊຸມ ໄອປາ ຄັ້ງທີ 41 ທີ່ ສສ.ຫວຽດນາມ ເປັນເຈົ້າພາບ
15/09/2020

         ພາຍຫລັງສໍາເລັດການເຂົ້າຮ່ວມກອງປະຊຸມໄອປາ ຄັ້ງທີ 41 ແບບທາງໄກ ທີ່ ສສ.ຫວຽດນາມ ເປັນເຈົ້າພາບ, ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ (ສພຊ) ໄດ້ໃຫ້ສໍາພາດຕໍ່ສໍານັກຂ່າວສານຫວຽດນາມ ປະຈໍາ ສປປລາວ ໃນວັນທີ 10 ກັນຍາ 2020 ທີ່ຫໍສະພາແຫ່ງຊາດລາວ ວ່າ: ກ່ອນອື່ນ, ຂໍສະແດງຄວາມຍ້ອງຍໍຊົມເຊີຍ ຕໍ່ການເປັນເຈົ້າພາບຈັດກອງປະຊຸມໄອປາ ຄັ້ງທີ 41 ຂອງສະພາແຫ່ງຊາດ ສສ.ຫວຽດນາມ ໂດຍການເປັນປະທານຂອງທ່ານ ນາງ ຫງວຽນ ທິ ກິມ ເງີນ ປະທານໄອປາ, ປະທານສະພາແຫ່ງຊາດ ແຫ່ງ ສສ. ຫວຽດນາມ ດ້ວຍຜົນສໍາເລັດຢ່າງຈົບງາມ ເຊິ່ງໃນກອງປະຊຸມຄັ້ງນີ້ ໄດ້ກໍານົດຄໍາຂວັນ ທີ່ວ່າ “ການທູດລັດຖະສະພາ ເພື່ອອາຊຽນທີ່ໜຽວແໜ້ນ ແລະ ຕອບສະໜອງຕໍ່ສະພາບການ” ທີ່ສອດຄ່ອງກັບສະພາບຄວາມເປັນຈິງ ແລະ ຕອບສະໜອງຄວາມຮຽກຮ້ອງຕ້ອງການ ໃນການຮ່ວມມືເພື່ອຮັບມືກັບສິ່ງທ້າທາຍຕ່າງໆທີ່ເກີດຂຶ້ນໃນພາກພື້ນ. ຂ້າພະເຈົ້າ ຕີລາຄາສູງ ຕໍ່ການກະກຽມຄວາມພ້ອມທາງດ້ານເນື້ອໃນ, ດ້ານຮູບການ ແລະ ວິທີການດໍາເນີນກອງປະຊຸມພາຍໃນສະພາບແວດລ້ອມທີ່ມີການແຜ່ລະບາດຂອງພະຍາດໂຄວິດ-19 ໃນພາກພື້ນ ແລະ ໃນໂລກ ເຊິ່ງໄດ້ສະແດງໃຫ້ເຫັນເຖິງຄວາມຮັບຜິດຊອບ, ຫົວຄິດປະດິດສ້າງ, ຂີດຄວາມສາມາດ ແລະ ປະສົບການໃນການຈັດກອງປະຊຸມລະດັບສາກົນຂອງສະພາແຫ່ງຊາດ ສສ.ຫວຽດນາມ.

        ອີກເທື່ອໜຶ່ງ ຂໍສະແດງຄວາມຊົມເຊີຍ ມາຍັງສະພາແຫ່ງຊາດ ແຫ່ງ ສສ.ຫວຽດນາມ ໂດຍການເປັນປະທານຂອງທ່ານ ນາງ ຫງວຽນ ທິ ກິມ ເງີນ ປະທານໄອປາ, ປະທານສະພາແຫ່ງຊາດຫວຽດນາມ ທີ່ໄດ້ມີການກະກຽມບັນດາເນື້ອໃນ ເຊິ່ງນໍາມາສະເໜີໃນກອງປະຊຸມຄັ້ງນີ້ ມີເນື້ອໃນຢ່າງລະອຽດໃນທຸກຂົງເຂດ, ບົນພື້ນຖານການຮັບຟັງ ແລະ ມີການກັ່ນຕອງບັນດາເນື້ອໃນທີ່ສໍາຄັນ ທັງສອດຄ່ອງກັບສະພາບຄວາມເປັນຈິງ ແລະ ຄວາມມຸ່ງມາດປາຖະໜາຂອງປະຊາຊົນອາຊຽນ. ສະນັ້ນ, ຈຶ່ງເຮັດໃຫ້ກອງປະຊຸມໄດ້ມີການຮັບຮອງດ້ວຍຄວາມເປັນເອກະສັນ ຕໍ່ບັນດາມະຕິດັ່ງກ່າວ. ສະພາແຫ່ງຊາດ ແຫ່ງ ສປປລາວ ໄດ້ມີທັດສະນະ ແລະ ປະກອບຄໍາຄິດຄໍາເຫັນ ຕໍ່ບັນດາຮ່າງມະຕິດັ່ງກ່າວຄື: ໄດ້ຢໍ້າຄືນເຖິງການສືບຕໍ່ແລກປ່ຽນຂໍ້ມູນ-ຂ່າວສານ ລະຫວ່າງບັນດາປະເທດສະມາຊິກລັດຖະສະພາໄອປາ ກ່ຽວກັບການສະກັດກັ້ນ ແລະ ການແຜ່ລະບາດຂອງພະຍາດໂຄວິດ-19 ເຊິ່ງໄດ້ສ້າງຜົນກະທົບອັນຮ້າຍແຮງຕໍ່ຊີວິດອິນຊີຂອງປະຊາຊົນ ກໍຄືການຟື້ນຟູເສດຖະກິດໃນໄລຍະການແຜ່ລະບາດ ກໍຄືພາຍຫລັງການແຜ່ລະບາດຂອງພະຍາດໂຄວິດ-19 ໄດ້ສິ້ນສຸດລົງ. ສະພາແຫ່ງຊາດລາວ ສະເໜີໃຫ້ມີການຊຸກຍູ້ການຈັດຕັ້ງປະຕິບັດການເຊື່ອມໂຍງເຊື່ອມຈອດທາງດ້ານເສດຖະກິດ ແລະ ພື້ນຖານໂຄງລ່າງ; ສົ່ງເສີມໃຫ້ເສດຖະກິດອາຊຽນ ໄດ້ມີການຂະຫຍາຍຕົວ, ສ້າງວຽກເຮັດງານທໍາ, ສ້າງຄວາມເຂັ້ມແຂງ ໃນເຂດອາຊຽນ ແລະ ພາກພື້ນ; ຮຽກຮ້ອງໃຫ້ບັນດາສະມາຊິກໄອປາ ຍົກສູງຄວາມສາມາດ ກົນໄກການຕິດຕາມກວດກາ ນະໂຍບາຍດ້ານວັດທະນະທໍາ-ສັງຄົມ ຂອງລັດຖະສະພາ ໂດຍສະເພາະການຮັກສາສຸຂະພາບ, ການຈັດການຂີ້ເຫຍື້ອ ແລະ ການປົກປ້ອງສິ່ງແວດລ້ອມ ໂດຍຖືເປັນເຄື່ອງມືທີ່ສໍາຄັນ ເພື່ອຮັບປະກັນທິດທາງນະໂຍບາຍ ດ້ານວັດທະນະທໍາ-ສັງຄົມ ທີ່ຖືກຕ້ອງ ເພື່ອປະກອບສ່ວນເຂົ້າໃນການສ້າງປະຊາຄົມ ວັດທະນະທໍາ-ສັງຄົມ ໃນການຕອບໂຕ້ການແຜ່ລະບາດຂອງພະຍາດໂຄວິດ-19; ຕໍ່ກັບບັນຫາການເມືອງຄວາມໝັ້ນຄົງ ຄະນະຜູ້ແທນລາວ ສະໜັບສະໜູນການປະສານງານ ແລະ ການຮ່ວມມືທີ່ໃກ້ສິດລະຫວ່າງອົງການບໍລິຫານ ແລະ ອົງການນິຕິບັນຍັດ ໃນການຮັກສາສັນຕິພາບ, ສະຖຽນລະພາບ ແລະ ຄວາມໝັ້ນຄົງທີ່ຍືນຍົງໃນພາກພື້ນອາຊຽນ ແລະ ການແກ້ໄຂບັນຫາຂໍ້ຂັດແຍ່ງທີ່ເກີດຂຶ້ນໃນພາກພື້ນຢ່າງສັນຕິວິທີ.

         ທ່ານຍັງໃຫ້ຮູ້ຕື່ມວ່າ: ອັນທີ່ພົ້ນເດັ່ນໃນກອງປະຊຸມຄັ້ງນີ້ ສະມາຊິກໄອປາ ໄດ້ຮັບຮອງເອົາມະຕິຫລາຍສະບັບ (ມະຕິ 19 ສະບັບ) ແລະ ບົດລາຍງານ (6 ສະບັບ) ບົນຫລັກການຄວາມເປັນເອກະສັນ ຍຶດໝັ້ນຈິດໃຈສາມັກຄີ ແລະ ຄວາມເຂົ້າອົກເຂົ້າໃຈ ແລະ ຄວາມເຊື່ອໝັ້ນເຊິ່ງກັນແລະກັນ ຂອງບັນດາລັດຖະສະພາສະມາຊິກອາຊຽນ; ກອງປະຊຸມໃຫ້ຄວາມສຳຄັນໃນການປຶກສາຫາລື ກ່ຽວກັບນະ​ໂຍ​​ບາຍ, ວິ​ທີ​ການ ແລະ ມາດ​ຕະ​ການໃນ​ການ​ຕອບ​ໂຕ້​ທີ່​ມີ​ປະ​ສິດ​ທິ​ພາບ ແລະ ທັນ​ການ ​ເພື່ອປົກປ້ອງຊີວິດ ແລະ ສຸຂະພາບຂອງປະຊາຊົນ ປົກປັກຮັກສາສິ່ງແວດລ້ອມ, ຕ້ານຜົນກະທົບຈາກພະຍາດໂຄວິດ-19 ໃນພາກພື້ນ; ສະພາແຫ່ງຊາດລາວ ສະແດງຄວາມຍ້ອງຍໍຊົມເຊີຍຕໍ່ສະພາແຫ່ງຊາດຫວຽດນາມ ທີ່ມີແນວຄວາມຄິດລິເລີ່ມໃນການສ້າງກົນໄກໃນການປຶກສາຫາລືໃໝ່ ຢູໃນກອງປະຊຸມໃຫຍ່ໄອປາ ເພື່ອສ້າງໂອກາດໃຫ້ແກ່ສະມາຊິກສະພາແຫ່ງຊາດໜຸ່ມສະແດງຄວາມຄິດເຫັນ ແລະ ທັດສະນະໃນການປະກອບສ່ວນສ້າງປະຊາຄົມອາຊຽນໃຫ້ສຳເລັດຕາມແຜນວຽກງານຂອງຊາວໜຸ່ມອາຊຽນ; ກອງປະຊຸມຄັ້ງນີ້ ໄດ້ເປັນເອກະສັນຮັບຮອງເອົາລັດຖະສະພາຂອງປະເທດ ນໍເວ ແລະ ມາຣົກ ເປັນປະເທດສັງເກດການຂອງໄອປາ. ຂ້າພະເຈົ້າເອງ ແລະ ທ່ານຮອງປະທານສະພາແຫ່ງຊາດຫວຽດນາມ ກໍໄດ້ຮັບລາງວັນກິດຕິມະສັກໄອປາ ປະຈຳປີ 2020; ສະພາແຫ່ງຊາດລາວ ຈະນຳເອົາຜົນສຳເລັດ ກໍຄືເນື້ອໃນຈິດໃຈຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍຕາມພາລະບົດບາດຂອງຕົນ ແລະ ຊຸກຍູ້ໃຫ້ລັດຖະບານຈັດຕັ້ງປະຕິບັດ ເນື້ອໃນຈິດໃຈທີ່ຜູ້ນຳອາຊຽນ ກໍຄື ຜູ້ນຳໄອປາ ໄດ້ຕົກລົງຮ່ວມກັນ ກ່ຽວກັບການຕ້ານການແຜ່ລະບາດຂອງພະຍາດໂຄວິດ-19 ໃຫ້ປາກົດຜົນເປັນຈິງ; ເອົາໃຈໃສ່ສົ່ງເສີມການມີສ່ວນຮ່ວມຂອງປະຊາຊົນ ກໍຄືທຸກພາກສ່ວນໃນສັງຄົມ ເຂົ້າໃນຂະບວນການສ້າງປະຊາຄົມອາຊຽນ; ຕອບສະໜອງທາງດ້ານນິຕິກຳ ທີ່ມີຄວາມສອດຄ່ອງກົມກຽວກັນ, ພິຈາລະນາໃຫ້ສັດຕະຍາບັນແກ່ສົນທິສັນຍາ ແລະ ສັນຍາຕ່າງໆໃນຂອບການຮ່ວມມືອາຊຽນ, ຮັບປະກັນໃຫ້ແກ່ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ; ແລກປ່ຽນປະສົບການທີ່ດີນຳກັນໃນການປະຕິບັດໜ້າທີ່ລັດຖະສະພາສະມາຊິກໄອປາ ແນໃສ່ເພື່ອຮັບປະກັນໃຫ້ແກ່ການຈັດຕັ້ງປະຕິບັດວິໄສທັດປະຊາຄົມອາຊຽນ ແລະ ແຜນແມ່ບົດຂອງສາມເສົາຄໍ້າປະຊາຄົມອາຊຽນ 2025 ໃຫ້ປາກົດຜົນເປັນຈິງ; ໃນໂອກາດນີ້, ຂໍອວຍພອນໃຫ້ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ຈົ່ງໝັ້ນຄົງທະນົງແກ່ນຕະຫລອດກາລະນານ.

                                                                      ແຫຼ່ງຂ່າວທີ່ມາ: ສະພາແຫ່ງຊາດ