ຄປຈ ສພຊ ຈັດກອງປະຊຸມການຕິດຕາມກວດກາ
09/09/2020

             (ສພຊ) ໃນວັນທີ 28 ສິງຫາ 2020 ທີ່ຫ້ອງປະຊຸມຄະນະເລຂາທິການສະພາແຫ່ງຊາດ (ສພຊ) ຫລັກ 6 ນະຄອນຫລວງວຽງຈັນ ຄະນະປະຈໍາສະພາແຫ່ງຊາດ (ຄປຈ ສພຊ) ໄດ້ຈັດກອງປະຊຸມການຕິດຕາມກວດກາຂອງ ຄປຈ ສພຊ ໂດຍການເປັນປະທານຂອງທ່ານ ບຸນປອນ ບຸດຕະນະວົງ ຮອງປະທານ ສພຊ, ເຂົ້າຮ່ວມມີທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ມີປະທານ-ຮອງປະທານກໍາມາທິການ, ຄະນະກົມ, ຄະນະພະແນກ ພ້ອມດ້ວຍພະນັກງານວິຊາການຈາກກໍາມາທິການກົດໝາຍ, ກໍາມາທິການວັດທະນະທໍາ-ສັງຄົມ, ກໍາມາທິການແຜນການ ການເງິນ ແລະ ການກວດສອບ ແລະ ຕາງໜ້າຈາກກະຊວງການເງິນ, ກະຊວງແຜນການ ແລະ ການລົງທຶນ ແລະ ອົງການກວດສອບແຫ່ງລັດ.

            ຈຸດປະສົງຂອງການຈັດກອງປະຊຸມຄັ້ງນີ້ ເພື່ອເປັນການສືບຕໍ່ຈັດຕັ້ງປະຕິບັດທິດທາງແຜນການລວມຄະນະປະຈໍາ ສພຊ ໃນ 6 ເດືອນທ້າຍປີ 2020 ແລະ ເພື່ອເປັນຂໍ້ມູນພື້ນຖານໃຫ້ແກ່ ຄປຈ ສພຊ ໃນການກະກຽມຄວາມ ພ້ອມທາງດ້ານເນື້ອໃນທີ່ຈະນໍາເຂົ້າພິຈາລະນາຮັບຮອງເອົາຢູ່ໃນວາລະກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດຊຸດທີ VIII.      

             ໂອກາດດັ່ງກ່າວ ປະທານກອງປະຊຸມ ໄດ້ມີຄໍາເຫັນຕໍ່ກອງປະຊຸມວ່າ: ການຈັດກອງປະຊຸມການຕິດຕາມກວກາຂອງ ຄປຈ ສພຊ ໃນຄັ້ງນີ້  ກໍເພື່ອເປັນການກະກຽມຂໍ້ມູນອັນສໍາຄັນໃຫ້ແກ່ການກະກຽມກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດຊຸດທີ VIII ພາຍຫລັງທີ່ໄດ້ຮັບຟັງການລາຍງານຈາກພາກສ່ວນຕ່າງໆແລ້ວ ກໍາມາທິການຕ່າງໆ ພາຍໃນສະພາແຫ່ງຊາດ ຈະໄດ້ລົງໄປຕິດຕາມເກັບກໍາຂໍ້ມູນຢູ່ທ້ອງຖິ່ນ ເພື່ອຕິດຕາມການຈັດຕັ້ງປະຕິບັດວຽກງານຂອງອົງການປົກຄອງທ້ອງຖິ່ນ, ເພື່ອປຶກສາຫາລືວຽກງານ ແລະ ບັນຫາຕ່າງໆ ເຊິ່ງລາຍລະອຽດຂອງການຈັດກອງປະຊຸມຕິດຕາມກວດກາຂອງ ຄປຈ ສພຊ ແມ່ນກໍາມາທິການແຜນການ ການເງິນ ແລະ ການກວດສອບ ໄດ້ສົ່ງຄໍາຖາມເຈາະຈີ້ມໄປໃຫ້ບັນດາພາກສ່ວນຕ່າງໆແລ້ວ ສະນັ້ນຈຶ່ງຮຽກຮ້ອງໃຫ້ພາກສ່ວນຕ່າງໆ ທີ່ເຂົ້າຮ່ວມກອງປະຊຸມ ລາຍງານການປະຕິບັດມະຕິເລກທີ 21 ຂອງສະພາແຫ່ງຊາດ ໃນໄລຍະຜ່ານມາ ວ່າໄດ້ດໍາເນີນຮອດໃສ ໄດ້ດໍາເນີນການຄືແນວໃດ, ມີຂໍ້ຫຍຸ້ງຍາກ ແລະ ສະດວກຄືແນວໃດ. 

                                                                       ແຫຼ່ງຂ່າວທີ່ມາ: ສະພາແຫ່ງຊາດ