ປະທານ ສພຊ ຕິດຕາມຊຸກຍູ້ບັນດາໂຄງການພັດທະນາຢູ່ ນວ
31/08/2020

           (ສພຊ) ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ (ສພຊ) ພ້ອມດ້ວຍຄະນະ ໄດ້ຕິດຕາມຊຸກຍູ້ບັນດາໂຄງການພັດທະນາ ຢູ່ນະຄອນຫລວງວຽງຈັນ (ນວ) ເພື່ອໃຫ້ດໍາເນີນໄປສອດຄ່ອງກັບແນວທາງນະໂຍບາຍ ແລະ ລະບຽບກົດໝາຍ ໂດຍໄດ້ຮັບການຕ້ອນຮັບຈາກທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ ແລະ ພາກສ່ວນກ່ຽວຂ້ອງ. ໃນວັນທີ 21 ສິງຫາ 2020 ໄດ້ລົງຢ້ຽມຢາມສູນການຄ້າທັນສະໄໝໜອງຈັນ  ເຂດພັດທະນາກວມລວມເສດຖາ, ພິພິຕະພັນວຽງຈັນສິລະປະຮ່ວມສະໄໝ, ຢ້ຽມຊົມງານວາງສະແດງສິນຄ້າ ໜຶ່ງເມືອງໜຶ່ງຜະລິດຕະພັນ ຢູ່ສູນການຄ້າລາວ-ໄອເຕັກ ແລະ ຢ້ຽມຊົມງານສະແດງຮູບພາບ 23​ ສິງຫາ ຄົບຮອບ 45 ປີ ຢູ່ສໍານັກງານປົກຄອງ ນວ.

           ໂອກາດດຽວກັນ ທ່ານປະທານ ສພຊ ແລະ ຄະນະ ຍັງໄດ້ຢ້ຽມຊົມໂຄງການ LIFE CENTER ຂອງບໍລິສັດ ກຣິດຕະພົງກຣຸບ ຕັ້ງຢູ່ລະຫວ່າງສູນການຄ້າວຽງຈັນເຊັນເຕີ ແລະ ສະຖານີລົດເມ ນວ ເຊິ່ງປັດຈຸບັນໂຄງການດັ່ງກ່າວຄືບໜ້າ 70% ພາຍຫລັງສໍາເລັດການຢ້ຽມຊົມ ຜູ້ລົງທຶນກໍໄດ້ສະເໜີໃຫ້ຊຸກຍູ້ຊ່ວຍເຫລືອໂຄງການນີ້ ໃຫ້ປະສົບຜົນສໍາເລັດຕາມລະດັບຄາດໝາຍ ປະກອບສ່ວນຊຸກຍູ້ເສດຖະກິດ-ສັງຄົມ ນວ ໃຫ້ມີໃບໜ້າອັນໃໝ່.

          ຈາກນັ້ນ ຄະນະ ກໍໄດ້ສືບຕໍ່ຢ້ຽມຢາມເຂດພັດທະນາກວມລວມໄຊເສດຖາ ເຊິ່ງຈະສ້າງເປັນເຂດອຸດສາຫະກໍາ ແລະ ພັດທະນາເປັນຕົວເມືອງໃໝ່ຂອງ ນວ ດ້ວຍການລົງທຶນ 5 ຕື້ໂດລາສະຫະລັດ ປັດຈຸບັນ ຢູ່ໃນໄລຍະພັດທະນາເຂດທີ 1 ເນື້ອທີ່ 400 ເຮັກຕາ ໃນນີ້, ສໍາເລັດພື້ນຖານໂຄງລ່າງ ແລະ ປັບພຽງໜ້າດິນພວມດໍາເນີນວຽກງານກໍ່ສ້າງໂຄງການໄລຍະທີ 2 ໂດຍຈະສ້າງເປັນເຂດທ່ອງທ່ຽວເຂດການຄ້າ ແລະ ຕົວເມືອງໃໝ່ຂອງນະຄອນຫລວງວຽງຈັນ ລວມທັງການສະໜອງການຄ້າ ຂະໜາດນ້ອຍແບບຄົບຊຸດ ປັດຈຸບັນໄດ້ລົງທຶນແລ້ວ 1,2 ຕື້ໂດລາສະຫະລັດ ສໍາເລັດການພັດທະນາໂຄງລ່າງພື້ນຖານແບບຄົບຊຸດ ແລະ ກ້າວສູ່ໄລຍະແຫ່ງການດຶງດູດການລົງທຶນ ມີຫົວໜ່ວຍວິສາຫະກິດເຂົ້າມາລົງທຶນແລ້ວ 82 ຫົວໜ່ວຍ ມູນຄ່າຈົດທະບຽນ 350 ລ້ານໂດລາສະຫະລັດ ແລະ ລົງທຶນຢູ່ເຂດພັດທະນາລວມມີທາງລົດໄຟລາວ-ຈີນ ຈໍາກັດ, ບໍລິສັດ ຄວາມຫວັງໃໝ່, ບໍລິສັດ ຜະລິດຢາສູບ, ບໍລິສັດ ໂຮຢາລາວຈໍາກັດ, ບໍລິສັດ ເປໂຕຣເຄມີລາວ ຈໍາກັດ, ບໍລິສັດ ກວດສອບຄຸນນະພາບ ແລະ ທົດສອບວິສະວະກໍາກໍ່ສ້າງລາວ ຈໍາກັດ, ບໍລິສັດ ສື່ສານ ແລະ ເຕັກໂນໂລຊີ ຈໍາກັດ, ບໍລິສັດ ຜະລິດເຄື່ອງນຸ່ງຫົ່ມ, ບໍລິສັດ ຜະລິດອຸປະກອນໄຟຟ້າ, ບໍລິສັດຜະລິດຢາ, ບໍລິສັດ ປຸງແຕ່ງຜະລິດຕະພັນກະສິກໍາ, ບໍລິສັດ ການຄ້າວັດສະດຸກໍ່ສ້າງ, ບໍລິສັດ ຂົນສົ່ງ ແລະ ອື່ນໆ  ພ້ອມນັ້ນ ຜູ້ລົງທຶນໄດ້ສະເໜີ ຢາກໃຫ້ສ້າງຫ້ອງການຕໍາຫລວດຢູ່ໃນເຂດນີ້ ເພື່ອສ້າງຄວາມເຂັ້ມແຂງໃນການຮັກສາ ຄວາມສະຫງົບ ແລະ ຊຸກຍູ້ສະໜັບສະໜູນໃຫ້ໂຄງການທາງດ່ວນ ລາວ-ຈີນ ທີ່ນອນຢູ່ໃນເຂດນີ້ ດໍາເນີນໄປ ແລະ ບັນລຸຕາມແຜນການ.

           ສໍາລັບຕອນບ່າຍວັນດຽວກັນ, ທ່ານປະທານ ສພຊ ພ້ອມດ້ວຍຄະນະ ໄດ້ສືບຕໍ່ຢ້ຽມຢາມພິພິຕະພັນວຽງຈັນສິລະປະຮ່ວມສະໄໝ ໂດຍໄດ້ຮັບການຕ້ອນຮັບຈາກທ່ານ ອານຸພາບ ຕຸນາລົມ ປະທານສະພາປະຊາຊົນນະຄອນຫລວງວຽງຈັນ ເຊິ່ງພິພິຕະພັນນີ້ ໄດ້ສະສົມໄມ້ເສດເຫລືອຕາມຫົວໄຮ່ປາຍນາຂອງປະຊາຊົນ ມາສ້າງໃຫ້ມີຄຸນຄ່າດ້ວຍການແກະສະຫລັກເປັນລວດລາຍຕ່າງໆ ທີ່ຕິດພັນກັບວັດທະນະທໍາລາວ ແລະ ວັດທະນະທໍາຂອງປະເທດສະມາຊິກອາຊຽນ ລວມມີຫລາຍກວ່າ 3.000 ອັນ ໄດ້ເປີດໃຫ້ບໍລິການ ໃນປີ 2019 ນອກນີ້ ຄະນະ ຍັງໄດ້ຢ້ຽມຊົມງານວາງສະແດງສິນຄ້າ ODOP ແລະ ສິນຄ້າຄອບຄົວຕົວແບບຂອງ ນວ ຢູ່ສູນການຄ້າ ລາວ-ໄອເຕັກ ຈັດຂຶ້ນເພື່ອຊຸກຍູ້ສົ່ງເສີມຜະລິດຕະພັນຂອງຄົນລາວ ພາຍໃຕ້ຫົວຂໍ້ “ລາວຊ່ວຍລາວຊົມໃຊ້ຜະລິດຕະພັນລາວ” ແລະ ຢ້ຽມຊົມງານວາງສະແດງຮູບພາບ 23 ສິງຫາ ຄົບຮອບ 45 ປີ ຢູ່ສໍານັກງານປົກຄອງ ນວ ຈັດຂຶ້ນ ເພື່ອສະເຫລີມສະຫລອງວັນຍຶດອໍານາດ ເຊິ່ງໃນງານດັ່ງກ່າວ ໄດ້ວາງສະແດງຮູບພາບທີ່ສະແດງໃຫ້ເຫັນມູນເຊື້ອອັນພິລະອາດຫານ ການຕໍ່ສູ້ບໍ່ຍອມຈໍານົນຂອງບັນພະບູລຸດ ແລະ ມູນເຊື້ອດຸໝັ່ນຂະຫຍັນພຽນ ໃນການສ້າງສາພັດທະນາບ້ານເມືອງ ກໍຄື ນວ ໃຫ້ມີຄວາມຈະເລີນຮຸ່ງເຮືອງສີວິໄລ.

                                                                                 ແຫຼ່ງຂ່າວທີ່ມາ: ສະພາແຫ່ງຊາດ